“Mar Aire Sláinte, ba mhaith liom leithscéal a ghabháil leis an triúr leanaí óga agus lena dteaghlaigh ar dtús.

"Bhí an méid a tharla mícheart, níl sé ceart nó cóir gur tharla sé agus níor cheart go ligfí dó tarlú.

"Mar othair agus mar thuismitheoirí, cuirimid ár muinín i ngairmithe cúraim sláinte. Is amhlaidh an cás go háirithe anseo nuair a chuireann tuismitheoirí a muinín i gcliniceoirí chun cóir leighis a chur ar a leanaí atá an-tinn.

"Is léir ón tuarascáil HIQA seo gur sáraíodh a muinín sa chás seo.

"Ní raibh na leanaí seo cosanta ón mbaol díobhála, mar ba chóir.

"Bhuail mé le Príomhfheidhmeannach agus Cathaoirleach Sláinte Leanaí Éireann inné. Phléamar an tuarascáil, a torthaí, agus na moltaí.

"Chuir mé in iúl go soiléir dóibh mo mhíshuaimhneas mór faoin méid a tharla anseo agus an méid atá mé ag súil leis maidir le hathchóiriú agus athrú chun a chinntiú nach dtarlóidh sé arís.

"Tugaim faoi deara gur ghlac CHI agus FSS araon le moltaí an athbhreithnithe seo ina n-iomláine agus gur thosaigh siad cheana féin iad a chur i bhfeidhm. Tugaim faoi deara freisin go bhfuil leithscéal iomlán déanta acu leis na hothair agus leis na teaghlaigh as na teipeanna a leagtar amach sa tuarascáil seo.

"Gabhaim buíochas le HIQA as an athbhreithniú reachtúil neamhspleách a rinne sé ar rialachas agus ar mhaoirseacht na n-ionchlannán máinliachta agus na bhfeistí leighis so-ionchlannaithe i Sláinte Leanaí Éireann (CHI), lena n-áirítear CHI i Sráid an Teampaill.

"Ba mhaith liom freisin mo bhuíochas ó chroí a ghabháil leis na teaghlaigh a chuidigh leis an athbhreithniú seo agus a chuir a dtaithí ar fáil ionas go bhféadfadh HIQA a chuid oibre a chur i gcrích. Tá a fhios agam nach mbeadh sé seo éasca, go háirithe agus iad ag leanúint orthu ag tabhairt aire dá leanaí óga.”