Íocaíochtaí Scéim Dreasachta Curaíochta fógartha ag an Aire McConalogue
- Foilsithe: 21 Nollaig 2022
- An t-eolas is déanaí: 12 Aibreán 2025
Inniu d'fhógair an tAire Talmhaíochta, Bia agus Mara, Charlie McConalogue T.D., go bhfuil tús le cur le híocaíochtaí 2022 faoin Scéim Dreasachta Curaíochta (TIS). Tá beagnach €9m den €10m á íoc anois le thart ar 3,100 feirmeoir. Leanfar le tuilleadh íocaíochtaí a dhéanamh chomh luath agus is féidir.
Sheol an tAire an Scéim Dreasachta Curaíochta i mí Márta 2022 mar chuid de phacáiste tacaíochta, mar thoradh ar an gcogadh neamhdhleathach sa Úcráin. Bunaíodh an Scéim chun feirmeoirí a spreagadh chun barra curaíochta breise a chur in 2022 chun cabhrú leis an spleáchas ar ábhar beatha ainmhithe iompórtáilte a laghdú.
Bhí an méid seo a leanas le rá ag an Aire McConalogue:
“Cúis áthais dom go bhfuil ag éirí go breá leis an Scéim Dreasachta Curaíochta agus go bhfuil íocaíochtaí luach €400 don heicteár á n-eisiúint chuig an oiread sin feirmeoirí. Chuir feirmeoirí an-spéis sa Scéim Dreasachta Curaíochta agus cúis áthais é sin. Bunaíodh an Scéim go luath in 2022 agus tá mé fíorshásta gur léirigh feirmeoirí spéis sna tacaíochtaí a cuireadh ar fáil.”
Beidh na híocaíochtaí i gcuntais bhainc na bhfeirmeoirí as seo go ceann cúpla lá.
Bhí an méid seo a leanas le rá ag an Aire McConalogue freisin:
“Chomh maith leis sin, cúis áthais dom a fhógairt go leanfar leis an Scéim Dreasachta Curaíochta in 2023. D'éirigh liom buiséad luach €10 milliún a fháil don scéim i mBuiséad 2023.”
Beidh íocaíocht luach €200 don heicteár ar fáil d'fheirmeoirí a bhí páirteach i Scéim Dreasachta Curaíochta 2022, má chinntíonn siad go mbeidh barra curaíochta incháilithe á bhfás ar an talamh in 2023. Beidh íocaíocht luach €400 don heicteár ar fáil d'fheirmeoirí in 2023 d'aon talamh breise a bheidh in úsáid acu chun barra curaíochta a fhás.
Notaí
- Tá an Scéim Dreasachta Curaíochta á cur chun feidhme de bhua an Chreata Géarchéime Sealadaí do bhearta Státchabhrach chun tacú leis an ngeilleagar i ndiaidh ionradh na Rúise ar an Úcráin.
- Rinne 4,081 iarrthóir iarratas ar an Scéim Dreasachta Curaíochta. D'fhonn a bheith incháilithe don Scéim Dreasachta Curaíochta, ní mór go mbeadh méadú le tabhairt faoi deara sa líon iomlán barr curaíochta atá á fhás ar an ngabháltas in 2022 i gcomparáid le 2021. Ní mór gur talamh féaraigh nó barra neamhchuraíochta eile a bheadh ag fás ar an talamh ar a bhfuil barra incháilithe breise á bhfás in 2021.
- Eiseofar tuilleadh íocaíochtaí sna laethanta agus sna seachtainí amach romhainn, lena n-áirítear íocaíochtaí le haghaidh comhpháirtíochtaí.
- Sa chás go bhfuil an limistéar incháilithe fós faoi réir athraithe go dtí go mbíonn na híocaíochtaí ar fad eisithe, glactar leis go mbeidh sé cothrom le thart ar 25,000 heicteár.
- Seo a leanas na barra incháilithe - Coirce Earraigh, Coirce Geimhridh, Cruithneacht Earraigh, Cruithneacht Gheimhridh, Eorna Earraigh, Eorna Gheimhridh, Seagal, Grán Buí, Fodar/biatas siúcra, Barr Síl Ola Ráibe Earraigh agus Barr Síl Ola Ráibe Geimhridh.