An tAire Hackett ag oscailt Lá Eolais na Gairneoireachta Orgánaí i mBiorra ar an 29 Feabhra
- Foilsithe: 28 Feabhra 2024
- An t-eolas is déanaí: 12 Aibreán 2025
Tá Oiliúint Orgánach Náisiúnta Skillnet (NOTS) agus Aonad Orgánach na Roinne Talmhaíochta, Bia agus Mara ag gabháil i gcomhpháirtíocht chun seisiún faisnéise 1 lá saor in aisce a chur ar fáil do shaothróirí gairneoireachta ar an Scéim Feirmeoireachta Orgánaí agus sochair ghaolmhara. Tabharfaidh an tAire Stáit, an Seanadóir Pippa Hackett an t-aitheasc oscailte, agus táthar ag súil le freastal ar níos mó ná 100 saothróir agus próiseálaí.
Agus an t-imeacht ar siúl Déardaoin an 29 Feabhra sa County Arms Hotel, Biorra, is lá malartaithe eolais aonuaire, domhain é seo ina mbeidh ionchur ó phríomhfhoireann DAFM, ó Shaothróirí Orgánacha na hÉireann, ó Theagasc, ó Chumann na gComhairleoirí Talmhaíochta, agus ó go leor de na príomhshaothróirí orgánacha atá ag obair in Éirinn an lae inniu.
Dúirt an tAire Hackett:
“Is minic gurb iad torthaí agus glasraí orgánacha an chéad chéim do thomhaltóirí agus bia orgánach á cheannach acu. Tá acmhainn ollmhór ann dúinn bia dúchasach a chur in ionad bia iompórtáilte agus ioncam a chur ar fáil do shaothraithe Éireannacha atá ag obair go crua. Is féidir linn i bhfad níos mó a dhéanamh chun tacú le saothróirí gairneoireachta orgánacha, agus is fíor deis é an ócáid seo dúinn eolas a roinnt agus a mhalartú agus muid ag iarraidh an earnáil a fhás. Tá fáilte roimh gach duine a bhfuil spéis acu sa ghairneoireacht orgánach Déardaoin – saothróirí, garraíodóirí, garraíodóirí margaidh, feirmeoirí, próiseálaithe, agus miondíoltóirí.”
Beidh seisiúin tiomnaithe Ceisteanna & Freagraí ann tar éis gach cur i láthair, chomh maith le ceardlanna comhchéime idirghníomhacha le príomhpháirtithe leasmhara.
Thug Sean McGloin, Bainisteoir NOTS, cuntas ar an réasúnaíocht taobh thiar d'eagrú na hócáide:
“Is é aidhm na hócáide ná saothróirí beaga a chur ar an eolas faoi na tacaíochtaí atá amuigh ansin dóibh má théann siad isteach sa Scéim Feirmeoireachta Orgánaí. Cuideoimid freisin le hachoimre a thabhairt ar conas rochtain a fháil ar na tacaíochtaí seo. Ó thaobh úsáid talún de, táirgeann saothróirí glasraí orgánacha níos mó barra in aghaidh an heicteáir ná aon chineál úsáide talún eile, agus tá sé tábhachtach go dtugtar aitheantas dóibh agus go dtugtar luach saothair dóibh as a gcuid iarrachtaí."
Príomheolas faoin Imeacht:
• Dáta: Déardaoin, an 29 Feabhra, 2024
• Am: 10.00r.n. go dtí 4.00i.n.
• Ionad: County Arms Hotel, Biorra, Co. Uíbh Fhailí
• Costas: Níl aon chostas nuair a chláraíonn tú trí NOTS. Beidh tae, caife, sólaistí, agus lón orgánach iomlán ar fáil don lucht freastail.
I measc na Seisiún /na n-Ábhar Plé, beidh:
• Aitheasc Tosaigh ón Aire Pippa Hackett
• Gairdín beag margaidh a chur ar bun & a reáchtáil (Jim Cronin)
• Na céimeanna chun dul isteach sa Scéim Feirmeoireachta Orgánaí
• Plé ar thairseach láimhdeachais €8,000 na Roinne Talmhaíochta, Bia agus Mara
• Comhairleoir agus príomhthairbhí a fháil.
• Cad is Uimhir FBO ann, agus conas a fhaigheann tú í?
• Iarratas a dhéanamh ar Uimhir DVO (cad é agus cén fáth a dteastaíonn sé uait)
• Iarratas BISS - cad atá i gceist agus conas é a bhaint amach
• Plean gnó orgánach a chur le chéile
• Cad iad na tacaíochtaí eile atá ar fáil
• Ceardlanna Comhchéime a bhaineann leis na hábhair thuas (beidh saineolaithe gairneoireachta agus comhairleacha ar fáil chun do cheisteanna a fhreagairt agus cabhrú le scaipeadh eolais)
Le haghaidh tuilleadh eolais nó sleachta athfhriotail, déan teagmháil le Sean McGloin, Bainisteoir NOTS, ar 086 172 8442.
DEIREADH