Fógraíonn an tAire McConalogue seoladh Scéim nua Feabhsaithe Caorach agus oscailt na háise iarratais ar líne
- Foilsithe: 22 Samhain 2022
- An t-eolas is déanaí: 15 Aibreán 2025
Tá sé fógartha ag an Aire Talmhaíochta, Bia agus Mara, Charlie McConalogue TD, inniu go bhfuil Scéim nua Feabhsaithe Caorach á seoladh agus go bhfuil an áis iarratais ar líne á hoscailt.
Agus an scéim nua á hoscailt go foirmiúil aige, dúirt an tAire:
“Tá áthas orm seoladh Scéim Feabhsaithe Caorach a fhógairt inniu ionas gur féidir le feirmeoirí iarratas a chur isteach. Tugadh an scéim isteach agus é mar aidhm aici tógáil ar an dul chun cinn faoi Scéim Leasa na gCaorach (SWS) i gClár um Fhorbairt Tuaithe 2014-2022.”
Dearadh Scéim Feabhsaithe Caorach, atá mar chuid de Phlean Straitéiseach Chomhbheartas Talmhaíochta na hÉireann (CBT) don tréimhse 2023-2027, chun tacú le feirmeoirí tabhairt faoi ghníomhartha a fheabhsaíonn leas ainmhithe in earnáil na gcaorach.
Dúirt an tAire:
“Beidh an íocaíocht faoin scéim ag ráta €12 in aghaidh na gcaorach pórúcháin incháilithe, ar méadú é ón €10 in aghaidh na gcaorach pórúcháin incháilithe faoi Scéim Leasa an gCaorach. Is tacaíocht thábhachtach iad na híocaíochtaí seo d'fheirmeoirí caorach chun príomhghníomhartha leasa a sheachadadh agus cuireann siad borradh airgeadais ar fáil d'fheirmeoirí aonair agus don gheilleagar tuaithe i gcoitinne.
Is féidir leis an bhfeirmeoir nó le Comhairleoir ón gCóras Comhairleach Feirme (FAS) iarratais ar an scéim a dhéanamh tríd an áis iarratais ar www.agfood.ie.. Is é an dáta deiridh chun iarratais a chur isteach ná meán oíche Dé Luain an 19 Nollaig 2022.
Nótaí d'Eagarthóirí
Tá tuilleadh sonraí faoin scéim, lena n-áirítear cóip de théarmaí agus coinníollacha na scéime, doiciméad maidir le Ceisteanna Coitianta, agus treoir maidir le conas iarratas a dhéanamh, ar fáil ar láithreán gréasáin na Roinne ag gov.ie - Sheep Improvement Scheme (www.gov.ie).
Tá iarratais ar an Scéim Feabhsaithe Caorach á nglacadh anois ag an Roinn ar www.agfood.ie. Féadfaidh feirmeoirí an t-iarratas a chur isteach iad féin nó féadfaidh siad iarraidh ar Chomhairleoir atá faofa ag an gCóras Comhairleach Feirme (FAS) iarratas a chur isteach thar a gceann. Tá liosta de Chomhairleoirí faofa FAS ar fáil freisin ar láithreán gréasáin na Roinne ag: gov.ie - Farm Advisory System (FAS) (www.gov.ie).
Má bhíonn aon fhadhb ag feirmeoir nó comhairleoir logáil isteach ar www.agfood.ie, , is féidir leo teagmháil a dhéanamh leis an Roinn ag agfood@agriculture.gov.ie nó 049 -4368288.
Chun tuilleadh eolais a fháil faoin scéim, déan teagmháil leis an Roinn ar an bhfón nó trí ríomhphost ar na bealaí seo a leanas:
- Fón: 057-8674422
- Ríomhphost: sheepscheme@agriculture.gov.ie