Fógraíonn an tAire McConalogue tús le clárú don Idirphlé Náisiúnta ar Mhná sa Talmhaíocht
- Foilsithe: 11 Eanáir 2023
- An t-eolas is déanaí: 12 Aibreán 2025
D'fhógair an tAire Talmhaíochta, Bia agus Mara, Charlie McConalogue TD, inniu go bhfuil clárú don Idirphlé Náisiúnta ar Mhná sa Talmhaíocht oscailte ar láithreán gréasáin na Roinne.
Dúirt an tAire McConalogue:
“Beidh sé seo ina dheis thábhachtach don earnáil dul i ngleic le saincheisteanna comhionannais inscne in agraibhia, agus aird ar leith á tabhairt ar fheirmeoireacht.
“Beidh an t-iar-Aire Talmhaíochta Mary Coughlan i gceannas ar an idirphlé, agus beidh plé painéil agus ceardlanna ann, d’fhonn tuairimí a bhailiú ar cheisteanna mar cheannaireacht agus infheictheacht, oideachas agus feasacht, inbhuanaitheacht, chomh maith le cúrsaí airgeadais agus dlí.
“Is é an aidhm atá ann go gcuirfidh toradh an idirphlé le beartas náisiúnta amach anseo. Táim ag súil go mór leis an lá agus plé a dhéanamh maidir leis an ábhar tábhachtach seo.”
Chomh maith le díospóireachtaí agus ceardlanna, beidh roinnt cainteoirí ann lena n-áirítear iar-Aire Talmhaíochta na Gearmáine, Julia Klöckner, POF Glanbia plc, Siobhán Talbot, chomh maith leis an Aire McConalogue agus a chomhghleacaithe Airí Stáit Pippa Hackett agus Martin Heydon.
Dúirt an tAire Stáit Hackett:
“Mar bhanfheirmeoir mé féin tuigim go maith go bhfuil gá lenár nglór a mhéadú in earnáil atá faoi cheannas fir den chuid is mó. Tugann an Idirphlé Náisiúnta seo deis do mhná a bhfuil baint acu le haon fhiontar feirme ar fud na tíre béim a leagan ar conas is féidir linn leanúint ar aghaidh ag cur le todhchaí na feirmeoireachta agus tugaim spreagadh do na mná go léir a bhfuil baint acu leis an bhfeirmeoireacht clárú agus freastal air.”
Dúirt an tAire Stáit Heydon:
“Bhí mná i gcónaí lárnach i bhfiontair feirme thar na glúnta, ach go minic i róil nach bhfuil sofheicthe nó nach bhfuil aitheantas tugtha dóibh. Tá an t-idirphlé seo, chomh maith leis na bearta sonracha atá tugtha isteach againn sa CAP nua, mar chuid d’iarrachtaí chun an éagothroime sin a cheartú agus ionadaíocht níos mó ag mná mar shealbhóirí feirme agus i gcinnteoireacht ar fheirmeacha a áirithiú.”
Tá tinreamh saor in aisce agus tá clárú ar bhonn tús freastail ar an gceann is túisce.
Clárú ar oscailt anois Item was unpublished or removed
Nótaí d'Eagarthóirí
Scrúdóidh an Chomhdháil saincheisteanna inscne san fheirmeoireacht agus san earnáil agraibhia agus déanfaidh sí iniúchadh ar an gcaoi a bhféadfaimis an chothromaíocht inscne a fheabhsú sa todhchaí. Is mná iad 18,000 nó 13% de na sealbhóirí feirme in Éirinn faoi láthair.
Tiomsófar torthaí na Comhdhála i dtuarascáil, a chuirfidh le beartas sa todhchaí ina leith seo.
Léigh faisnéis chúlra faoin Idirphlé Náisiúnta ar Mhná sa Talmhaíocht - "Cothromaíocht Inscne san Earnáil Agraibhia a Fheabhsú".
Foilsítear sonraí chlár oibre na hócáide agus cainteoirí deimhnithe anseo.