Fógra tugtha ag an Roinn go gcuirfear deireadh leis an riachtanas dlíthiúil maidir le sainbhearta bithshlándála

Tá sé fógartha ag an Roinn Talmhaíochta, Bia agus Mara gur cuireadh deireadh leis an gceanglas dlíthiúil do shainbhearta bithshlándála chun leathadh fliú éanúil (fliú na n-éan) a mhaolú ar an 1 Meitheamh 2023.

Baineann na bearta atá á mbaint amach anois le ceanglais bhithshlándála infhorghníomhaithe ar leith a tugadh isteach ar an 19 Meán Fómhair 2022 (I.R. Uimh. 462 de 2022).

Tá an cinneadh maidir leis na bearta seo a bhaint bunaithe ar tháscairí maidir le riosca laghdaithe fliú éanúil - lena n-áirítear an fhíric nár deimhníodh aon chás den ghalar seo in éin fhiáine in Éirinn ar feadh tréimhse níos mó ná 6 seachtaine, líon na n-éan uisce imirceach atá ag laghdú agus teochtaí comhshaoil agus uaireanta sholas an lae ag méadú.

Molann an Roinn, áfach, d’úinéirí tréada a bheith airdeallach fós agus leanúint de na caighdeáin is airde bithshlándála a úsáid mar, d’ainneoin an riosca laghdaithe, tá an fhéidearthacht ann fós go mbeadh an víreas sa timpeallacht nó go bhféadfadh éin fhiáine an víreas a tharchur chuig a dtréad.

Meabhraíonn an Roinn freisin do gach úinéir éanlaithe clóis, lena n-áirítear iad siúd nach gcoimeádann ach 1 nó 2 éan, an dualgas dlíthiúil atá orthu a n-áitreabh a chlárú leis an Roinn. Tá treoir maidir le conas d’éanlaith chlóis a chlárú le fáil anseo.

Is féidir tuilleadh eolais faoin bhfliú éanúil a fháil anseo

Tá liosta d’oifigí na Roinne Talmhaíochta, Bia agus Mara agus a sonraí teagmhála ar fáil anseo

Beolíne an fhliú éanúil: Teil: 01 607 2512 nó 01 492 8026 (lasmuigh d'uaireanta oifige)

Aip éan fiáin: https://aviancheck.apps.rhos.agriculture.gov.ie/