Leagann McConalogue béim ar thosaíochtaí na hÉireann do chomhairliúcháin an AE/an RA maidir le cuótaí éisc 2021
- Foilsithe: 22 Feabhra 2021
- An t-eolas is déanaí: 23 Feabhra 2021
D’fhógair an tAire Talmhaíochta, Bia agus Mara, Charlie McConalogue, T.D., buarthaí agus tosaíochtaí na hÉireann arís eile inniu do chomhairliúcháin an AE/an RA maidir le cuótaí iascaigh 2021. Tá Coimisiún an AE ag tabhairt faoi idirbheartaíocht den chéad uair leis an RA ar cheart go ndéanfar cinneadh, faoi dheireadh mhí an Mhárta, faoi na cuótaí iascaigh bliana iomláine do gach stoc a roinntear leis an AE.
Ag labhairt ag cruinniú neamhfhoirmiúil Airí Talmhaíochta agus Iascaigh inniu, ghabh an tAire McConalogue buíochas leis an gCoimisiún Eorpach as an obair a rinne sé ar chomhairliúcháin go dtí seo agus as leibhéal maith comhordaithe leis an gComhairle a sholáthar.
Dúirt an tAire:
“Luaigh mé go soiléir ón tosach gur gá d’Airí sa Chomhairle páirt dhíreach a bheith acu san idirbheartaíocht agus cuirim fáilte roimh an deis seo chun dearcthaí faoi shuíomh an AE sna comhairliúcháin leis an RA a mhalartú.”
Agus cuntas á thabhairt ar thosaíochtaí na hÉireann do na comhairliúcháin, thug an tAire chun solais an tábhacht a bhaineann le machaire réidh a chinntiú:
“Anuas ar chomhaontú a dhéanamh ar na Gabhálacha Iomlána is Incheadaithe (GIIanna) leis an RA, tá sé tábhachtach freisin comhaontú a bhaint amach maidir le saincheisteanna gaolmhara, cosúil le coinníollacha, solúbthacht, bearta feabhais agus cur i bhfeidhm na hoibleagáide um chur i dtír a chur san áireamh nuair a bhíonn GIIanna á socrú.”
Thug an tAire McConalogue an tsaincheist chun solais freisin a bhaineann leis an ualach díréireach atá ar Éirinn i dtaobh an mhéid a chuirimid leis na haistrithe cuótaí chuig an RA faoi Chomhaontú Trádála agus Comhair an AE/an RA.
“Ceist thábhachtach é seo nach féidir neamhaird a thabhairt air agus leanfaidh mé le hiarracht a dhéanamh úsáid a bhaint as gach féidearthacht chun dul i ngleic leis an toradh éagórach seo a bhí ar an idirbheartaíocht ar Chomhaontú Trádála agus Comhair an AE/an RA.”
CRÍOCH