Casann an tAire Dooley le Cumann Náisiúnta Iascairí Cladaigh
- Foilsithe: 8 Aibreán 2026
- An t-eolas is déanaí: 8 Aibreán 2026
Chas an tAire Stáit sa Roinn Talmhaíochta, Bia agus Mara, a bhfuil freagracht speisialta air as an Iascach, Timmy Dooley TD, le hionadaithe ó Chumann Náisiúnta Iascairí Cladaigh, Dé Céadaoin, an 1 Aibreán, chun plé a dhéanamh, go háirithe, ar a n-imní faoi thionchar na coimhlinte idir Stáit Aontaithe Mheiriceá (SAM)/Iosrael agus an Iaráin ar phraghsanna breosla.
Dúirt an tAire Dooley:
“D’éist mé go cúramach leis na hábhair imní a chuir Cumann Náisiúnta Iascairí Cladaigh in iúl, agus ba mhaith liom buíochas a ghabháil leo as na saincheisteanna seo a ardú liom. Tá an Rialtas seo tiomanta do thacaíocht a choinneáil don earnáil iascaigh cladaigh.Tá earnáil na hiascaireachta cladaigh, agus go deimhin an earnáil bia mara i gcoitinne, mar aon le gach earnáil de gheilleagar na hÉireann, thíos leis an méadú ar chostais bhreosla atá á bhraiteadh mar thoradh ar an gcoimhlint idir SAM/Iosrael agus an Iaráin. Tá scála suntasach ag baint leis na méaduithe seo agus tá imní mhór mar thoradh orthu don earnáil iomlán bia mara, agus do na pobail chósta atá ag brath ar chabhlach iascaireachta gníomhach.”
Lean an tAire ar aghaidh:
“Cé go bhfuil tacaíochtaí curtha i bhfeidhm cheana féin ag an Rialtas seo, tuigim go bhfuil an earnáil iascaigh, agus go háirithe an earnáil chladach, go mór nochta don ardú ar chostais bhreosla.Mhínigh mé do Chumann Náisiúnta Iascairí Cladaigh gurb é sin an fáth gur mhol mé go láidir ag cruinniú Chomhairle Talmhaíochta agus Iascaigh an Aontais Eorpaigh Dé Luain go gcuirfí socruithe i bhfeidhm go práinneach ar leibhéal an Aontais Eorpaigh chun tacú leis an earnáil.Ní bheidh tacaíochtaí géarchéime den sórt sin incháilithe do mhaoiniú ach amháin faoi Rialachán an Chiste Eorpaigh Muirí, Iascaigh agus Dobharshaothraithe nuair a bheidh Cinneadh Cur Chun Feidhme déanta ag an gCoimisiún Eorpach faoi Airteagal 26, ag aithint an teagmhais eisceachtúil.”
Dúirt an tAire Dooley freisin:
“Ag cruinniú Agra-Éisc Dé Luain, chuir mé fáilte roimh chomharthaí ó Choimisinéir Eorpach um Iascach agus Aigéin, Costas Kadis, go bhfuil obair ar siúl anois chun scrúdú a dhéanamh ar fhorbairt Cinnidh Cur Chun Feidhme dá leithéid agus táim ag tnúth le conclúid thapa ar an bpróiseas seo. Chuirfeadh aon chinneadh dá leithéid ar chumas na hÉireann breithniú breise a dhéanamh ar na hábhair seo, faoi réir maoiniú agus údarú cuí a bheith ar fáil ar leibhéal náisiúnta.”
Mar fhocal scoir, dúirt an tAire:
“Labhair mé freisin le Cumann Náisiúnta Iascairí Cladaigh inniu faoin ngrúpa oibre atá bunaithe ag an Aire Heydon agus agam faoi choimirce Food Vision 2030.Tá Cumann Náisiúnta Iascairí Cladaigh ionadaithe ar an ngrúpa oibre seo. Breithneoidh an grúpa na saincheisteanna atá os comhair earnáil bia mara na hÉireann, lena n-áirítear an cabhlach cladaigh. Tá sé de chúram ar an ngrúpa freisin creat beart a fhorbairt chun freagairt do na dúshláin shuntasacha atá romhainn, lena n-áirítear na dúshláin don earnáil mar thoradh ar an méadú ar phraghsanna breosla.Chuir mé fáilte roimh an aighneacht le déanaí ó Chumann Náisiúnta Iascairí Cladaigh chuig Cathaoirleach an ghrúpa, ina leagtar amach na bearta a mheasann Cumann Náisiúnta Iascairí Cladaigh is gá chun freagairt do na dúshláin atá os comhair na hearnála iascaigh cladaigh.Táim ag súil le Tuarascáil an Chathaoirligh a fháil sna míonna amach romhainn ionas gur féidir na bearta cuí a chur i bhfeidhm chomh luath agus is féidir chun tacú lenár n-earnáil ríthábhachtach bia mara le linn na tréimhse dúshlánaí seo.”