Fógraíonn an tAire Healy-Rae síneadh leis an spriocdháta chun iarratais a dhéanamh faoin Scéim Náisiúnta um Shábháilteacht Feirme
- Foilsithe: 6 Samhain 2025
- An t-eolas is déanaí: 11 Samhain 2025
D’fhógair an tAire Stáit ag an Roinn Talmhaíochta, Bia agus Mara, a bhfuil freagracht speisialta air as Sábháilteacht Feirme, Michael Healy-Rae TD, síneadh coicíse leis an spriocdháta chun léirithe spéise agus iarratais ar íocaíocht a chur isteach faoin Scéim Náisiúnta um Shábháilteacht Feirme.
Ag fógairt an tsínithe, dúirt an tAire Healy-Rae:
“Tá áthas orm an spriocdháta le haghaidh léirithe spéise a dhéanamh agus iarratais ar íocaíocht a chur isteach a shíneadh ar feadh coicíse eile, go dtí Dé hAoine, an 21 Samhain 2025. Iarraim ar gach feirmeoir an tréimhse seo a úsáid chun riocht chlúdaigh an seafta PTO ar innealra feirme a sheiceáil agus, más damáistithe nó ar iarraidh iad, iad a athsholáthar agus a n-éilimh a chur isteach roimh an dáta deiridh sínte.”
Chun iarratas a dhéanamh faoin scéim, ní mór don fheirmeoir nó don chomhairleoir faofa FAS léiriú spéise a chur isteach sula gceannaítear clúdaigh seafta cumhachta (PTO). Nuair a chuireann an t-iarratasóir léiriú spéise isteach, ní mór an t-iarratas ar íocaíocht (éileamh) a chur isteach faoi Dé hAoine, an 21 Samhain 2025, ar a dheireanaí.
Ag cur in iúl a imní faoi líon na n-eachtraí marfacha ar fheirmeacha i mbliana, leag an tAire Healy-Rae béim ar an ngá atá le feirmeoirí a bheith gníomhach maidir le cosc a chur ar eachtraí.
“Cé go mbíonn clúdaigh seafta PTO sách saor, tá cásanna báis agus gortuithe a d’athraigh beathaí mar thoradh ar theacht i dteagmháil le seaftaí den chineál sin. Molaim do gach feirmeoir na clúdaigh seafta PTO ar a gcuide trealaimh a sheiceáil, cibé acu atá siad in úsáid nó curtha ar leataobh don gheimhreadh, agus aon chlúdaigh atá lochtach nó ar iarraidh a athsholáthar. Nuair a shocraímid nach fiú an riosca a bhaineann le trealamh lochtach nó míchuí a úsáid, sin an tráth a fheicfimid fíor-fheabhsuithe i sábháilteacht ar ár bhfeirmeacha.”
Soláthraíonn an beartas seo deontas 60 % suas go dtí uaschostas incháilithe de €100 do suas le ceithre chlúdach seafta PTO.
Meabhraítear d’fheirmeoirí go gcaithfidh na hadmhálacha a chur in iúl go gcomhlíonann na clúdaigh seafta PTO na caighdeáin cháilíochta atá leagtha amach sna téarmaí agus coinníollacha.
Le haghaidh tuilleadh eolais faoin Scéim Náisiúnta um Shábháilteacht Feirme 2025, féach www.gov.ie/farmsafety. Ba cheart aon cheisteanna maidir leis an scéim a chur chuig: farmsafetymeasure@agriculture.gov.ie.