Freastalóidh an tAire Heydon agus an tAire Dooley ar chruinniú na Comhairle AgriFish sa Bhruiséil
- Foilsithe: 27 Eanáir 2026
- An t-eolas is déanaí: 27 Eanáir 2026
Ag labhairt dó roimh chruinniú Chomhairle Agraibhia na Bruiséile inniu, dúirt an tAire Talmhaíochta, Bia agus Mara, Martin Heydon, TD:
"Cuireann cruinniú an lae inniu deis ar fáil chun raon ceisteanna atá i gcroílár chlár oibre reatha talmhaíochta an Aontais Eorpaigh a phlé. Áirítear orthu sin na deiseanna a bhaineann leis an mbithgheilleagar, an tábhacht a bhaineann le slándáil bia an Aontais Eorpaigh agus saincheisteanna a bhaineann le trádáil. Tapaím an deis freisin béim a leagan ar a thábhachtaí atá sé a chinntiú go bhfanfaidh an Comhbheartas Talmhaíochta mar an phríomhuirlis chun tacú le táirgeadh bia, ioncam feirme a chobhsú agus pobail tuaithe a chothú. Áireofar ar an gclár oibre freisin plé ar leasú spriocdhírithe ar an rialachán maidir le feirmeoireacht orgánach." ”
Lean an tAire Heydon ar aghaidh:
“Maidir le trádáil, leagfaidh mé béim ar a thábhachtaí atá éagsúlú margaí, lena n-áirítear trí chomhaontuithe saorthrádála an Aontais Eorpaigh a thabhairt chun críche, agus an gá le hearnálacha leochaileacha a chosaint á athdhearbhú agam ag an am céanna. Sa chomhthéacs sin, bhí mé thar a bheith soiléir faoi na hábhair imní atá ag Éirinn maidir leis an gComhaontú AE–Mercosur, agus go háirithe faoin tionchar féideartha a d’fhéadfadh a bheith aige ar earnáil na mairteola.
Athdhearbhóidh mé freisin na hábhair imní atá agam maidir leis an Rialachán um an Sásra Coigeartaithe Teorann Carbóin (CBAM). Is ionchur ríthábhachtach costais í an leasachán do thalmhaíocht na hÉireann agus an Aontais Eorpaigh, agus d’fhéadfadh tionchar an rialacháin CBAM ar chostais leasacháin iomaíochas feirme, táirgeadh bia agus inbhuanaitheacht na hearnála a chur i mbaol.”
Ag tabhairt faoi deara gurb é seo an chéad Chomhairle faoi Uachtaránacht na Cipire, chuir an tAire Heydon a chuid cainte i gcrích:
“Guím gach rath ar Uachtaránacht na Cipire ina clár oibre don chéad sé mhí eile. Ar ndóigh, agus níos lú ná sé mhí fágtha go dtí Uachtaránacht AE na hÉireann, táim ag tnúth le bheith ag obair go dlúth leis an gCipir chun seachadadh a dhéanamh ar son an Aontais Eorpaigh ar fad in 2026.”
Ag trácht dó freisin roimh chruinniú an lae inniu, dúirt an tAire Stáit sa Roinn Talmhaíochta, Bia agus Mara, a bhfuil freagracht speisialta aige as Iascach, Timmy Dooley, TD::
“Inniu, táim ag ardú an ghá atá le gníomh práinneach ar leibhéal an Aontais Eorpaigh maidir le hiascaireacht tríú tíortha ag leibhéil neamh-inbhuanaithe ar ronnach san Atlantach Thoir Thuaidh. Táim ag éileamh freagairt phráinneach chomhordaithe ón Aontas Eorpach chun teachtaireacht láidir a chur chuig idirbheartaí na Stát Cósta atá ag teacht le chéile inniu i Londain. Iarrfaidh mé freisin ar an gCoimisiún tacaíocht earnála a chur ar fáil trí bhearta margaidh éigeandála do na hiascairí atá buailte. Aontaím dea-ghuí an Aire Heydon d’Uachtaránacht na Cipire agus muid ag cur tús le clár oibre thar a bheith tábhachtach do 2026.”