“Is cúis áthais dom a chur in iúl go bhfuil tús curtha le heisiúint íocaíochtaí iarmhéid i leith rannpháirtíochta in ACRES in 2025, agus go n-íocfar thart ar €37 milliún le 47,000 rannpháirtí ACRES an tseachtain seo. Tabharfaidh rithí pá na seachtaine seo an méid iomlán a íocadh, i gcroí-íocaíochtaí na scéime, le feirmeoirí in ACRES go €783.5 milliún ó cuireadh tús leis an scéim i mí Eanáir 2023.

“Taispeánann tús na n-íocaíochtaí iarmhéid do 2025 i lár mhí Aibreáin, atá mí níos luaithe ná tús íocaíochtaí iarmhéid 2024 i mí na Bealtaine 2025, an obair shuntasach atá déanta ag mo Roinn maidir le híocaíochtaí a dhéanamh faoin scéim. Chuir cur isteach na ndoiciméad scéime ag feirmeoirí agus ag a gcomhairleoirí ACRES leis an tráthúlacht agus leis an líon íocaíochtaí is féidir a dhéanamh freisin. Meastar go mbeidh os cionn 88% de na feirmeoirí in ACRES tar éis a n-íocaíocht iarmhéid 2025 a fháil faoi dheireadh na seachtaine seo.”

“Tuigim, cé go bhfuil breis agus 99% de na rannpháirtithe go hiomlán íoctha i leith a rannpháirtíochta sa scéim do 2023 agus 2024, go bhfuil íocaíochtaí fós le déanamh i leith roinnt conarthaí. D’fhéadfadh sé nach ndéanfar íocaíochtaí i leith cuid de na conarthaí sin go dtí go mbeidh próisis dlíthiúla tar éis bhás an rannpháirtí bunaidh curtha i gcrích, agus tá réiteach ar na saincheisteanna a bhaineann le conarthaí eile fós ar siúl. Ba mhaith liom a chinntiú do na feirmeoirí sin atá ag fanacht le híocaíochtaí go ndéanfar íocaíochtaí a luaithe a réiteofar na saincheisteanna sin agus go mbeidh na conarthaí glanta le haghaidh íocaíochta.”

“Tá sé tábhachtach agus tráthúil a thabhairt faoi deara an toradh atá Éire ag fáil ón tacaíocht seo a chuirtear ar fáil do fheirmeoirí chun gníomhartha comhshaoil a dhéanamh ar a gcuid feirmeacha. Áirítear leis an toradh seo bainistiú ar bhreis agus 285,000 heicteár de chomhthailte a tugadh isteach sa scéim, rud a spreagann feirmeoirí trí íocaíochtaí bunaithe ar thorthaí chun an talamh ardluacha seo a bhainistiú go cuí. Tá tacaíocht á cur ar fáil freisin faoin scéim chun struchtúr an fhéir a chothabháil agus a fheabhsú ar bhreis agus 212,000 heicteár de thailte atá á mbainistiú go fairsing, rud a rachaidh chun tairbhe do réimse inveirteabraigh, éan agus speiceas eile. Tá tacaíocht á soláthar freisin, faoi ghníomhartha Féarach Íseal-Ionchuir agus Féarach Portaigh Íseal-Ionchuir na scéime, chun bainistiú íogair a dhéanamh ar bhreis agus 130,000 heicteár de fhéarach ar ithreacha portaigh chun astaíochtaí dé-ocsaíd charbóin (CO2) a laghdú. Is cúis áthais dom a bheith in ann luach saothair a thabhairt d’fheirmeoirí, caomhnóirí na talún, as a rannchuidiú le réimse cuspóirí comhshaoil, bithéagsúlachta, aeráide agus cáilíochta uisce trína rannpháirtíocht in ACRES.”