Fógraíonn an tAire Heydon beagnach €147 milliún in íocaíochtaí le beagnach 34,000 feirmeoir ACRES
- Foilsithe: 10 Samhain 2025
- An t-eolas is déanaí: 12 Samhain 2025
D’fhógair an tAire Talmhaíochta, Bia agus Mara, Martin Heydon TD, go bhfuil tús curtha anois le réamhíocaíochtaí €146.94 milliún do rannpháirtithe Tráinse 1 sa Scéim um Chomhshaol Tuaithe Talmhaíochta-Aeráide (ACRES).
Agus an fógra á dhéanamh, dúirt an tAire Heydon:
“Tá áthas orm a dhearbhú go bhfuil tús curtha le réamhíocaíochtaí le rannpháirtithe in ACRES i leith 2025, agus €146.94 milliún á íoc an tseachtain seo le 33,794 feirmeoir a chuaigh isteach in ACRES in 2023. Táim ag súil go bhfaighidh 8,000 feirmeoir breise a chuaigh isteach in ACRES in 2024 €32.69 milliún an tseachtain seo chugainn. Is fianaise ar an obair a rinneadh le bliain anuas chun tráthúlacht íocaíochtaí ACRES a fheabhsú é eisiúint réamhíocaíochtaí 2025 do 42,000 feirmeoir, nó 78% de na rannpháirtithe uile i ACRES, sna chéad ritheanna pá seo. Tá próiseáil conarthaí do na rannpháirtithe atá fágtha ag leanúint ar aghaidh.”
Ag tagairt don Scéim i gcoitinne, dúirt an tAire:
“Tabharfaidh na híocaíochtaí seo an méid a íocadh i leith ACRES ó cuireadh tús leis in 2023 go dtí thart ar €697 milliún. Léiríonn an tiomantas an Rialtais raon cuspóirí comhshaoil, bithéagsúlachta, cáilíochta uisce agus aeráide a bhaint amach trí thacú le teaghlaigh feirmeoireachta ar a n-aistear comhshaoil. Is scéim uaillmhianach í ACRES agus tá dúshláin ann mar gheall ar leibhéal uaillmhian na hÉireann. Is léir go bhfuilimid ag sárú na ndúshlán sin trí thiomantas gach duine atá bainteach leis an scéim - na feirmeoirí féin, comhairleoirí ACRES agus Foirne Tionscadail Chomhair ACRES.”
Mar fhocal scoir, dúirt an tAire:
“Ba mhaith liom an móiminteam reatha in ACRES a choinneáil, agus is príomhghné d’eisiúint íocaíochtaí ná tuairisceáin a chuireann na rannpháirtithe isteach. Molaim d’aon duine nár chuir isteach a ndearbhú ACRES LESS do 2025 é sin a dhéanamh a luaithe is féidir, agus molaim freisin d’fheirmeoirí atá ag gabháil don ghníomh um Chaomhnú Pórtha Neamhchoitianta a dtuairisceáin a sheoladh isteach faoin 15 Samhain 2025. Cuidíonn cur isteach tráthúil na gconarthaí seo leis an Roinn dul chun cinn a dhéanamh maidir le híocaíocht.”
Notes
Is í an Scéim um Chomhshaol Tuaithe Talmhaíochta-Aeráide (ACRES) an beart náisiúnta aeráide talmhaíochta-chomhshaoil faoi Phlean Straitéiseach CBT na hÉireann don tréimhse 2023-2027. Tá an Scéim á cómhaoiniú ag an Aontas Eorpach agus ag an Státchiste Náisiúnta.
Tá dhá chur chuige laistigh den Scéim:
- ACRES Ginerálta, atá ar fáil go náisiúnta (lasmuigh den limistéar geografach ardtosaíochta mar a shainmhínítear le haghaidh chur chuige Comhair ACRES thíos), lena gcuirtear raon beart ar fáil (ar oideas agus bunaithe ar thorthaí araon)
- Comhoibriú ACRES, atá ar fáil d’fheirmeoirí i limistéir gheografacha ardtosaíochta shainithe.
Bhí iontráil isteach sa Scéim ar bhonn céimnithe (is é sin, i ndá thráinse). Tá beagán os cionn 53,700 feirmeoir rannpháirteach in ACRES faoi láthair.
Tá tuilleadh faisnéise faoi ACRES ar fáil ag: gov.ie - Scéim Chomhshaoil Tuaithe Talmhaíochta-Aeráide (ACRES).