Fógraíonn an tAire Heydon oscailt scéime €28 milliún d'fheirmeoirí diúil
- Foilsithe: 13 Lúnasa 2025
- An t-eolas is déanaí: 25 Lúnasa 2025
Méadú ar líon na n-ainmhithe atá incháilithe le haghaidh íocaíochta
Dheimhnigh an tAire Talmhaíochta, Bia agus Mara, Martin Heydon TD, inniu go bhfuil an Scéim Leasa Mairteola 2025 oscailte d’iarratais anois.
Dúirt an tAire Heydon:
“Léiríonn scéim na bliana seo méadú suntasach ar mhaoiniú i gcomparáid le 2024. Tugann sé deis d'fheirmeoirí réimse níos leithne de bhearta simplí a chur i gcrích chomh maith le méadú ar an uasteorainn ar ainmhithe incháilithe. Chun an deis is mó a thabhairt d'fheirmeoirí pleanáil a dhéanamh, d’fhógair mé sonraí na scéime sin i mí Aibreáin. Tá sé mar aidhm ag na bearta praiticiúla seo feidhmíocht ainmhithe a bharrfheabhsú ar feadh a saoil.’’
Tacóidh an Scéim Leasa Mairteola (BWS) le feirmeoirí laonna diúil a bheathú le béile ag an scoitheadh agus ligfidh sí dóibh gníomhartha deonacha eile a dhéanamh chun a n-íocaíochtaí scéime a uasmhéadú. Mar a tharla sna blianta roimhe seo, tá gach feirmeoir diúil a bhfuil laonna incháilithe acu a rugadh ar a ngabháltais idir an 1 Iúil 2024 agus an 30 Meitheamh 2025 incháilithe chun iarratas a dhéanamh ar an scéim sin.
Ní mór iarratais a chur isteach ar líne trí agfood.ie agus is é an 24 Meán Fómhair 2025 an dáta deiridh. Níl aon deis ann le haghaidh iarratais dhéanacha chun a chinntiú gur féidir íocaíochtaí le rannpháirtithe a bhfuil na seiceálacha bailíochtaithe riachtanacha go léir déanta acu a thosú i mí na Nollag 2025.
Is féidir le feirmeoirí diúil páirt a ghlacadh ag an am céanna sa BWS agus sa Chlár um Éifeachtúlacht Carbóin Bó Diúil cúig bliana (SCEP). Beidh feirmeoirí a ghlacann páirt sa dá cheann incháilithe suas le €225 a thuilleamh in aghaidh na bó/an phéire lao do na chéad 22 péire i mbólacht.
Mar fhocal scoir, dúirt an tAire Heydon:
“Is fiú €28 milliún an scéim sin d’fheirmeoirí diúil. Dearbhaíonn sé arís tacaíocht leanúnach an Rialtais don earnáil agus mholfainn do gach feirmeoir incháilithe na téarmaí agus coinníollacha a sheiceáil agus a n-iarratais a chur isteach in am. I dteannta leis an SCEP, cabhróidh na tacaíochtaí spriocdhírithe sin le todhchaí tháirgeadh mairteola diúil a chosaint.”
Tá téarmaí agus coinníollacha iomlána na scéime, lena n-áirítear sonraí faoi phionóis i gcás ina n-aithnítear neamhchomhlíonadh, ar fáil anseo.
Meabhraítear do rannpháirtithe cóipeanna de na hadmhálacha a choinneáil le haghaidh an bheathaithe béile agus le haghaidh na ngníomhartha vacsaínithe agus tástála, má roghnaíonn siad na roghanna sin freisin. Ba chóir dóibh na taifid sin a choinneáil agus iad a chur faoi bhráid na Roinne, ach iad a iarraidh, chun próiseáil éifeachtach íocaíochtaí a éascú.
Níor chóir do rannpháirtithe BWS atá ag glacadh páirt freisin sa Chomhairliúchán Srianta Seadán faoin tSeirbhís Spriocdhírithe Chomhairleach um Shláinte Ainmhithe (TASAH) agus ar mian leo an gníomh comhaireamh d'uibheacha faecacha a dhéanamh faoin scéim sin an rogha comhaireamh faecach a roghnú i BWS 2025.
Nótaí d’Eagarthóirí
Tá an gníomh beathaithe béile éigeantach ach tá an rogha ag feirmeoirí laonna a vacsaíniú i gcoinne galair chlóistridiam agus/nó niúmóine laonna chomh maith le tástáil fhaecach nó tástáil foráiste a dhéanamh nuair a oireann sé dá gcórais táirgthe.
Ní mór d’fheirmeoirí (nó comhairleoir FAS atá ag gníomhú thar a gceann) a chur in iúl ag céim an iarratais na gníomhartha deonacha, más ann dóibh, atá beartaithe acu a chur i gcrích. Beidh an rogha acu ag céim an iarratais líon níos lú ainmhithe a roghnú don ghníomh vacsaínithe ná don ghníomh beathaithe béile, más mian leo. Má roghnaítear an gníomh tástála, is ionann líon na n-ainmhithe atá incháilithe le haghaidh íocaíochta agus líon na n-ainmhithe a roghnaítear le haghaidh beathú béile ag céim an iarratais.
I gcás ina mbíonn ró-éileamh ar an scéim, féadfar laghdú a chur i bhfeidhm ar an líon uasta ainmhithe atá incháilithe le haghaidh íocaíochta ar ghníomh amháin nó níos mó.