Fógraíonn an tAire Heydon go bhfuil deireadh curtha leis na rialacháin bhithshlándála éanlaithe clóis maidir leis an bhfliú éanúil
- Foilsithe: 27 Bealtaine 2025
- An t-eolas is déanaí: 28 Bealtaine 2025
Tá sé fógartha ag an Aire Talmhaíochta, Bia agus Mara, Martin Heydon TD, go bhfuil deireadh curtha leis na rialacháin bhithshlándála d'éanlaith chlóis a tugadh isteach i Nollag 2024 mar gheall ar an riosca a bhaineann le fliú na n-éan. Cúlghairfear na rialacháin maidir leis an bhfliú éanúil (bearta bithshlándála) (SI 666/2024) le héifeacht ón 31 Bealtaine 2025.
Dúirt an tAire:
“Agus muid ag bogadh isteach sa samhradh, tá an baol go dtarlódh ráig den fhliú éanúil inár n-éanlaith chlóis níos ísle ná mar a bhí sé le linn mhíonna níos fuaire an gheimhridh. Is cuí anois deireadh a chur leis na rialacháin a rinne dianbhearta bithshlándála éigeantach chun éanlaith chlóis na hÉireann a chosaint. Is dea-chleachtas fós iad na gníomhaíochtaí bithshlándála seo agus molaim go láidir d'aon duine le héanlaith chlóis, bídís ina bhfeirm mhór nó cúpla cearc sa ghairdín cúil, leanúint dá gcur i bhfeidhm. Tá baol ann go fóill, agus táthar ag súil go leanfaidh an fliú éanúil de bheith ina bhagairt d’earnáil éanlaithe clóis na hÉireann i rith na bliana. Is í an bhithshlándáil an bealach is éifeachtaí chun cosc a chur ar leathadh an víris ó éin fhiáine go héanlaith chlóis, nó idir ealtaí éanlaithe clóis, agus ní mór í a chleachtadh ar feadh na bliana.”
Dúirt an tAire freisin:
“Is mian liom moladh a thabhairt do na hiarrachtaí ollmhóra atá déanta ar fud na hearnála éanlaithe clóis chun ár dtionscal éanlaithe clóis a chosaint ar fhliú na n-éan agus ar na hiarmhairtí tromchúiseacha a bhaineann le ráig”.
Moltar don phobal gan éin fhiáine atá breoite nó marbh a láimhseáil agus aon eipeasóid d’éin fhiáine atá breoite nó marbh a thuairisciú dá nOifig Tréidliachta Réigiúnach nó, má tá siad lasmuigh d’uaireanta gnó, teagmháil a dhéanamh leis an mBeolíne Náisiúnta Éigeandála Galar ar 01 492 8026 nó AipSeiceála Éanlaith na Roinne a úsáid.
Tá tuilleadh eolais, lena n-áirítear nuashonrú teicniúil mionsonraithe, ar fáil ag gov.ie/birdflu.