Fógraíonn an tAire Heydon oscailt cheathrú bliain den Scéim Feabhsúcháin Caorach d’iontrálaithe nua
- Foilsithe: 30 Márta 2026
- An t-eolas is déanaí: 30 Márta 2026
D’fhógair an tAire Talmhaíochta, Bia agus Mara, Martin Heydon TD, oscailt cheathrú bliain den Scéim Feabhsúcháin Caorach d’iontrálaithe nua. Soláthraíonn an Scéim Feabhsúcháin Caorach, ar scéim cúig bliana ar fiú €100 milliún í, tacaíocht airgeadais d’fheirmeoirí chun céimeanna breise a ghlacadh chun leas a dtréada a fheabhsú.
Ag trácht ar oscailt na scéime, dúirt an tAire Heydon:
“Is mór an sásamh dom a fhógairt go bhfuil iarratais ar iontráil i mbliain a ceathair den Scéim Feabhsúcháin Caorach oscailte anois d’iontrálaithe nua incháilithe. Is í seo an ceathrú bliain den Scéim Feabhsúcháin Caorach, a thógann ar an dul chun cinn a rinneadh faoin Scéim Leasa Caorach sa CBT roimhe seo agus go deimhin sna trí bliana dheireanacha den Scéim Feabhsúcháin Caorach freisin. Léiríonn an scéim seo, a chuireann ar chumas oscailt bhliantúil d’iontrálaithe nua, tiomantas leanúnach an Rialtais seo don earnáil chaorach.”
Nuair a chuirtear an Scéim Feabhsúcháin Caorach agus an Scéim Náisiúnta Leasa Caorach, a bhfuil leithdháileadh €22 milliún aici in 2026, le chéile, cuireann siad tacaíocht airgeadais suas le €25 in aghaidh na caorach ar fáil chun bearta a dhéanamh a fheabhsóidh leas an tréada náisiúnta.
Maoinítear an Scéim Feabhsúcháin Caorach faoi Phlean Straitéiseach CBT na hÉireann 2023–2027 le leithdháileadh buiséid €20 milliún in aghaidh na bliana ar feadh thréimhse an phlean. Faigheann feirmeoirí suas le €12 in aghaidh na caorach pórúcháin sa bhliain as bearta leasa tréada a chur i gcrích.
Ní mór iarratais a dhéanamh ar agfood.ie. Is é Dé Céadaoin, an 25 Márta 2026, dáta oscailte na n-iarratas. Is é 23.59 an 29 Aibreán 2026 an dáta deiridh le haghaidh iarratas.
Nótaí do na hEagarthóirí
Maidir le Plean Straitéiseach CBT na hÉireann 2023–2027
Is comhpháirtíocht idir an tsochaí agus an talmhaíocht é Comhbheartas Talmhaíochta an Aontais Eorpaigh (CBT) a chinntíonn soláthar cobhsaí bia, a chosnaíonn ioncam feirmeoirí, a chosnaíonn an timpeallacht agus a choinníonn ceantair thuaithe beomhar. Cuireann tíortha an Aontais Eorpaigh an CBT chun feidhme ar an leibhéal náisiúnta trí Phlean Straitéiseach CBT don tréimhse 2023–2027.
Tugadh isteach an Scéim Feabhsúcháin Caorach chun sláinte agus leas ainmhithe a fheabhsú san earnáil chaorach. Cuireann an Scéim tacaíocht airgeadais suas le €12 in aghaidh na caorach ar fáil d’fheirmeoirí chun céimeanna breise a ghlacadh chun leas a dtréada a fheabhsú.
Comh-mhaoiníonn an Roinn Talmhaíochta, Bia agus Mara agus an tAontas Eorpach an Scéim Feabhsúcháin Caorach. Chun tuilleadh eolais a fháil, tabhair cuairt ar http://www.gov.ie/cap