Ceapann an tAire Heydon Cathaoirleach eatramhach nua ar Bhord Eachspóirt Éireann
- Foilsithe: 27 Samhain 2025
- An t-eolas is déanaí: 2 Nollaig 2025
Cheap an tAire Talmhaíochta, Bia agus Mara, Martin Heydon TD, an Dr Pamela Byrne inniu mar Chathaoirleach eatramhach ar Bhord Eachspóirt Éireann (HSI).
Dúirt an tAire Heydon:
“Ba mhaith liom buíochas a ghabháil leis an gCathaoirleach atá ag imeacht as oifig, Michael Dowling, as a chuid ama, saineolais agus tiomantais i maoirseacht agus i dtreorú HSI le roinnt blianta anuas ina chuid oibre tábhachtaí laistigh den tionscal capall spóirt.”
Tá an tAire tar éis comhaontú, i gcomhairle leis an Aire Cultúir, Cumarsáide agus Spóirt, Pádraig Ó Donnabháin TD, agus leis an Aire Stáit atá freagrach as Spórt agus Polasaí Poist, Charlie McConalogue TD, maidir le ceapachán an Dr Pamela Byrne mar chathaoirleach eatramhach ar HSI.
Dúirt an tAire Heydon:
“Táim ó chroí buíoch don Dr Byrne, atá ina ball boird reatha de HSI, as glacadh leis an bpost seo agus táim muiníneach go dtreoróidh a taithí HSI chun leasa earnáil an Eachspóirt in Éirinn.”
Nótaí
- Forálann Bunreacht HSI go mbeidh téarma oifige trí bliana ag an gCathaoirleach agus ag Stiúrthóirí eile ó dháta an cheapacháin agus go bhfuil Stiúrthóirí incháilithe chun fónamh ar feadh dhá théarma ar a mhéad.
- Forálann Bunreacht HSI go bhfuil naonúr Stiúrthóirí ar an mBord mar seo a leanas:
- Ceathrar comhaltaí, an Cathaoirleach san áireamh, arna gceapadh ag an Aire Talmhaíochta, Bia agus Mara i gcomhairle leis an Aire Cultúir, Cumarsáide agus Spóirt
- Ionadaí amháin ó Thuaisceart Éireann (folúntas faoi láthair)
- Ceathrar ionadaithe tionscail (folúntas amháin faoi láthair)
Eolas faoin Dr Pamela Byrne
Ba í an Dr Pamela A Byrne Príomhoifigeach Feidhmiúcháin Údarás Sábháilteachta Bia na hÉireann (FSAI) ó Mhárta 2015 go Márta 2025. Bhí sí ina Leas-Chathaoirleach ar bhord bainistíochta Údarás Sábháilteachta Bia na hEorpa (EFSA) agus ina comhbhunaitheoir ar eagraíochtaí domhanda Ceannairí Idirnáisiúnta Sábháilteachta Bia (IHFAF).
Tá PhD in Éiceatocsaineolaíocht Chomhshaoil ag an Dr Byrne ó Choláiste na hOllscoile, Corcaigh, MSc i mBainistíocht Acmhainní Uisceacha ó Choláiste an Rí, Londain, agus BSc i Zó-eolaíocht ó Choláiste na hOllscoile, Corcaigh.
Chomh maith lena róil ghairmiúla, tá taithí shuntasach rialachais ag an Dr Byrne, ag fónamh ar roinnt boird agus coistí, lena n-áirítear mar chomhalta boird reatha d'Eachspórt Éireann, Cathaoirleach ar Bhord Institiúid Bainistíochta na hÉireann, Cathaoirleach ar Choiste Rialachais Ionad Barr Feabhais Eolaíochta don Mhicribhitheóm in UCC. Is Ollamh Lánaimseartha Cúnta í Pamela i gColáiste na hOllscoile, Baile Átha Cliath.