Cuireann an tAire Heydon síneadh le dáta deiridh na Scéime Tacaíochta um Ioncam Breosla
- Foilsithe: 27 Bealtaine 2026
- An t-eolas is déanaí: 29 Bealtaine 2026
D’fhógair an tAire Talmhaíochta, Bia agus Mara, Martin Heydon TD, inniu go bhfuil síneadh curtha le dáta deiridh na Scéime Tacaíochta um Ioncam Breosla go dtí meán oíche Dé Máirt, an 2 Meitheamh.
Dúirt an tAire Heydon:
"Tá freagra láidir feicthe againn ar an Scéim Tacaíochta um Ioncam Breosla i measc feirmeoirí agus conraitheoirí go dtí seo lena n-áirítear líon mór iarratas a fuarthas ag an deireadh seachtaine agus le dhá lá anuas. Toisc go bhfuil a fhios agam go bhfuil feirmeoirí thar a bheith gnóthach san aimsir dheas atá againn anois, tá síneadh á chur agam le spriocdháta na scéime tacaíochta breosla. Ba mhaith liom a chinntiú nach bhfuil aon duine fágtha ar lár agus go bhfuil an deis ag an líon is mó d'fheirmeoirí agus de chonraitheoirí chun iarratas a dhéanamh."
Dúirt an tAire freisin:
"Tá an próiseas iarratais an-éasca le déanamh agus mar sin, molaim d'fheirmeoirí agus conraitheoirí nach bhfuil iarratas déanta acu go fóill chun é a dhéanamh sna laethanta atá romhainn. Tá thart ar 70,000 lítear de dhíosal in aghaidh na bliana in úsáid ag an meán-chonraitheoir agus cabhróidh an íocaíocht seo lena ngnóthaí i dtréimhse ina bhfuil úsáid ard breosla agus costas a bhaineann leis sin."
"Dearadh an tacaíocht seo i gcomhairliúchán le hionadaithe ar na geallsealbhóirí éagsúla agus d'iarr siad ar an íocaíocht a dhíriú orthu siúd a bhfuil an tionchar is mó ag na praghsanna MGO (Ola Gáis Mharcáilte) orthu, agus eisiúint thapa den tacaíocht. Tá na nithe sin á soláthar ag mo Roinn faoi láthair."
Dúirt an tAire Heydon mar fhocal scoir:
"Rinne mé cinnte go bhfuil an tacaíocht dírithe orthu siúd a raibh an tionchar ba mhó ag an ardú praghais orthu agus a bhfuil rannpháirtíocht ghníomhach á déanamh acu maidir lenár mbia a tháirgeadh agus ár bhforaoise a bhainistiú, agus molaim d'aon duine atá ag iarraidh an tacaíocht seo a fháil chun é sin a dhéanamh roimh mheán oíche De Máirt seo chugainn, an 2 Meitheamh."
Is féidir le feirmeoirí iarratas a dhéanamh ar líne trí My AgFood, agus is féidir le conraitheoirí na foirmeacha riachtanacha a íoslódáil ó shuíomh gréasáin na Roinne agus foirmeacha comhlánaithe agus admhálacha a sheoladh isteach chuig fuelsub@agriculture.gov.ie nó chuig an seoladh poist atá ar na foirmeacha.
Is féidir le hiarratasóirí ar mian leo teagmháil a dhéanamh leis an Roinn maidir leis an Scéim Tacaíochta um Ioncam Breosla glaoch ar an Líne Chabhrach Íocaíochtaí Díreacha ag 057-8674422 nó ríomhphost a sheoladh chuig fuelsub@agriculture.gov.ie.
Nótaí
Déanfar cinneadh ar incháilitheacht feirmeoirí agus conraitheoirí talmhaíochta agus foraoiseachta de réir:
- A bheith ag feirmeoireacht go gníomhach in 2025, nó gur cuireadh tús le bheith ag feirmeoireacht go gníomhach in 2026
- Leanfar le bheith ag feirmeoireacht go gníomhach in 2026
- I gcás conraitheoirí, a bheith cláraithe CBL agus comhlíontach ó thaobh cánach de agus obair conraitheora talmhaíochta i dtáirgeadh príomhúil (lena n-áirítear foraoiseacht) ar fheirmeacha ar bheith ar bun acu.
Is féidir le feirmeoirí iarratas a dhéanamh ar líne trí My AgFood agus iarratais á ndéanamh ag conraitheoirí talmhaíochta/foraoiseachta tríd an bhfoirm iarratais páipéir atá ar fáil ar shuíomh gréasáin na Roinne. Tá físeán cabhrach ar an suíomh gréasáin freisin chun a thaispeáint d'fheirmeoirí conas iarratas a dhéanamh leo féin.
Déanfar an íocaíocht iomlán a gheobhaidh gach iarratasóir a ríomh nuair a bheidh na héilimh ar fad curtha isteach. Ach, meastar go mbeidh thart ar 20 cent in aghaidh an lítir den úsáid inmheasta thar thréimhse cúig mhí mar bhunús na híocaíochta.
Déanfar an cóimheas úsáide measta agus an méid cent in aghaidh an lítir a shocrú chun a chinntiú go gcloífear le buiséad iomlán na scéime. Déanfar iad sin a ríomh nuair a bheidh na hiarratais ar fad faighte.
Faoin scéim, beidh íocaíocht amháin in aghaidh an iarratasóra ann chun tréimhse iomlán cúig mhí a chlúdach seachas íocaíochtaí míosúla. Iarrfar ar iarratasóirí sonraí a sholáthar faoina n-úsáid don 12 mhí de 2025 bunaithe ar chaiteachas admhálaithe. Déanfaidh iarratasóirí feirmeoirí féin-dearbhúcháin d'úsáid bunaithe ar ráitis nó admhálacha atá acu agus a d'fhéadfadh a bheith faoi réir seiceálacha bunaithe ar riosca, agus beidh ar chonraitheoirí admhálacha nó ráitis a sholáthar leis an bhfoirm iarratais.
Maidir le conraitheoirí feirme agus foraoiseachta, ceanglófar faoin scéim go mbeidh siad cláraithe le haghaidh CBL, comhlíontach ó thaobh cánach de, agus go soláthróidh siad seirbhísí le haghaidh táirgeadh príomhúil de tháirgí talmhaíochta (lena n-áirítear foraoiseacht) ar an bhfeirm.