Cistiú €1.5 milliún fógartha ag na hairí Heydon agus Healy-Rae do Chur Chun Cinn na Foraoiseachta in 2025/2026
- Foilsithe: 25 Meitheamh 2025
- An t-eolas is déanaí: 25 Meitheamh 2025
D'fhógair an tAire Martin Heydon agus an tAire Stáit sa Roinn Talmhaíochta, Bia agus Mara, Michael Healy-Rae, TD, inniu torthaí Ghlao Oscailte 2025/2026 ar Thograí le haghaidh Tionscadail Cur Chun Cinn Foraoiseachta.
Dúirt an tAire Heydon:
“Freagairt den scoth a bhí ann ar an nglao, agus roghnaíodh 48 dtionscadal le haghaidh maoiniú dar luach €1.53 milliún thar dhá bhliain.”
Dúirt an tAire Healy-Rae:
“Fáiltím roimh an gcomhoibriú sin idir an Roinn agus an iliomad páirtithe leasmhara atá againn chun tairbhí Chlár Foraoiseachta 2023-2027 a chur chun cinn. Tá áthas orm a thabhairt faoi deara freisin go bhfuil comhoibriú idir eagraíochtaí agus grúpaí i gceist le go leor de na tionscadail, agus go gcumhdaíonn siad raon leathan ábhar, lena n-áirítear foraoisiú, bainistiú inbhuanaithe foraoisí, adhmad san fhoirgníocht, agrafhoraoiseacht, foraoiseacht cumhdaigh leanúnaigh agus cur chun cinn gairmeacha san fhoraoiseacht. Tá áthas orm a rá go bhfuil tionscadail á scaipeadh go maith ar fud na tíre.”
Cuirfidh na tionscadail a roghnófar go leor gnéithe den fhoraoiseacht chun cinn ar bhealaí éagsúla. Áirítear orthu sin tacaíocht do shráidbhaile foraoiseachta ag na craobhchomórtais náisiúnta treabhaidh, cur chun cinn na hagrafhoraoiseachta agus an chumhdaigh leanúnaigh, an fhoraoiseacht mar rogha ghairme, feachtas bolscaireachta bliana ‘tá tionscadal foraoiseachta ann duitse’, samhail forbartha gairmiúla leanúnaí maidir le húsáid adhmaid san fhoirgníocht, iniúchadh a dhéanamh ar bhacainní ar rannpháirtíocht na mban san fhoraoiseacht, agus deimhniú foraoise agus adhmaid.
Dúirt an tAire Healy-Rae:
“Táim lánchinnte de na tairbhí a bhaineann lenár gclár tarraingteach foraoiseachta d’fheirmeoirí agus d’úinéirí talún eile, agus go gcuideoidh na tionscadail sin le haghaidh a thabhairt ar bhearnaí i gcur in iúl ár gcláir. Beidh tionscadail faoi stiúir piaraí lena gcuirtear chun cinn tairbhí frithpháirteacha na foraoiseachta d’úinéirí talún agus d’fheirmeoirí, chomh maith le comhroinnt faisnéise agus dea-chleachtais, ina mbuntáiste ollmhór chun ár spriocanna foraoiseachta inbhuanaithe a bhaint amach. Beidh tairbhí móra ag baint leo freisin do phobail tuaithe agus dár gcomhshaol agus cuideoidh siad le maolú ar an athrú aeráide a bhaint amach”.
Nóta do na hEagarthóirí
Leis an nGlao ar Thograí le haghaidh Tionscadail Cur Chun Cinn Foraoiseachta 2025/2026, cumhdaíodh trí théama mar a leanas:
- Scéimeanna chun foraoisiú a chur chun cinn lena ndírítear go háirithe ar dhul i dteagmháil le feirmeoirí, le húinéirí foraoise atá ann cheana agus le húinéirí talún eile.
- Na tairbhí a bhaineann le húsáid mhéadaithe táirgí adhmaid i dtógáil agus i ndearadh a chur chun cinn, i gcomhthéacs an ghníomhaithe ar son na haeráide agus an bhithgheilleagair.
- Scéimeanna inbhuanaithe bainistithe foraoisí agus forbairt athléimneachta aeráide lena gcuirtear chun cinn tairbhí ilfheidhmeacha crann agus foraoisí, lena n-áirítear le haghaidh seirbhísí éiceachórais, bithfhuinnimh, deiseanna gairme foraoiseachta, foraoise do dhaoine agus folláine ghinearálta.
Tá sonraí na dtionscadal ar éirigh leo agus a ceadaíodh faoin nGlao leagtha amach sa tábla thíos.