Seolann na hAirí Heydon agus Healy-Rae Gairm Oscailte ar Thionscadail Sábháilteachta, Sláinte agus Folláine Feirmeoirí
- Foilsithe: 17 Aibreán 2025
- An t-eolas is déanaí: 22 Aibreán 2025
Sheol an tAire Talmhaíochta, Bia agus Mara, Martin Heydon, TD, agus an tAire Stáit um Fhoraoiseacht, Sábháilteacht Feirme agus Gairneoireacht, Michael Healy-Rae, TD, gairm oscailte inniu ar thionscadail sábháilteachta, sláinte agus folláine feirmeoirí.
Dúirt an tAire Stáit Healy-Rae an méid seo a leanas agus an ghairm á fógairt aige:
“Is í an fheirmeoireacht an tslí bheatha is contúirtí maidir le básanna san ionad oibre. Is féidir léi a bheith ina slí bheatha strusmhar freisin. Agus na dúshláin uathúla atá le sárú ag feirmeoirí á n-aithint, tacóidh an ghairm oscailte seo le tionscadail a thacaíonn le dea-chleachtas a íoslaghdaíonn an riosca do shábháilteacht ár bhfeirmeoirí agus a chuireann sláinte fhisiciúil agus mheabhrach agus folláine dhearfach chun cinn ar fud na hearnála feirmeoireachta. Táim muiníneach, trí oibriú le chéile, go ndéanfaidh na hiarratasóirí rathúla tionscadail a sheachadadh a mbeidh tionchar praiticiúil agus dearfach acu ar shaol na bhfeirmeoirí, a dteaghlach agus gach duine a bhfuil baint aige leis an bhfeirmeoireacht.”
Ag fáiltiú roimh an ngairm oscailte, dúirt an tAire Heydon:
“Trí mhaoiniú tiomnaithe €2.5 milliún don bhliain seo, leanann mo Roinn de thionscnaimh a chur i bhfeidhm a chuidíonn le sábháilteacht, sláinte agus folláine ár bhfeirmeoirí agus ár bpobail feirmeoireachta a fheabhsú. Tógann an ghairm oscailte seo ar rath na chéad ghairme oscailte a mhaoinigh mé anuraidh. Spreagfaidh an ghairm oscailte páirtithe leasmhara chun tionscadail a sheachadadh a chuireann ní amháin sábháilteacht feirme chun cinn, ach a chuireann an tábhacht a bhaineann le sláinte fhisiciúil agus mheabhrach i measc feirmeoirí chun cinn freisin.”
Maoineofar na tionscadail ó bhuiséad tiomnaithe sábháilteachta feirme na Roinne Talmhaíochta, Bia agus Mara. Clúdóidh tionscadail rathúla faoin ngairm ceann amháin nó níos mó de na téamaí seo a leanas:
- Sábháilteacht feirme
- Sláinte fhisiciúil feirmeoirí
- Sláinte mheabhrach agus folláine feirmeoirí
- Seiceálacha sláinte fisiciúla agus meabhraí feirmeoirí
- Oiliúint feasachta tiomána tarracóra do leanaí 14 bliana d’aois agus níos sine
- Oiliúint sáibh shlabhraigh d’fheirmeoirí
- Imeachtaí/rannpháirtíocht sábháilteachta feirme, sláinte agus folláine
Is féidir iarratais faoin ngairm oscailte a sheoladh le ríomhphost chuig farmsafetycall@agriculture.gov.ie nó a sheoladh tríd an bpost cláraithe chuig:
Rannán um Beartas, Meastóireacht agus Deimhniú Barr
An Roinn Talmhaíochta, Bia agus Mara
Foirgneamh Riaracháin Bhacastúin,
Cill Droichid,
Co. Chill Dara
Is é Dé Luain, an 19 Márta 2025 an spriocdháta.
Tá an Doiciméad Sonraíochta agus an Fhoirm Iarratais ar fáil ag https://www.gov.ie/ga/an-roinn-talmha%C3%ADochta-bia-agus-mara/foilseachain/farm-safety/.