Seolann na hAirí Heydon agus Healy-Rae Glao Oscailte do Thionscadail Sábháilteachta, Sláinte agus Folláine Feirmeoirí
- Foilsithe: 4 Márta 2026
- An t-eolas is déanaí: 6 Márta 2026
Sheol an tAire Talmhaíochta, Bia agus Mara, Martin Heydon TD, agus an tAire Stáit don Fhoraoiseacht, don tSábháilteacht Feirme agus don Ghairneoireacht, Michael Healy-Rae TD, Glao Oscailte inniu do Thionscadail Sábháilteachta, Sláinte agus Folláine Feirmeoirí.
Ag fógairt an ghlao, dúirt an tAire Healy-Rae:
“Ag tógáil ar rath na nGlaonna Oscailte in 2024 agus 2025, tacóidh an tionscnamh seo le tionscadail in 2026 chun sábháilteacht, sláinte agus folláine ár bpobal feirmeoireachta a fheabhsú. Cuireadh roinnt téamaí nua leis an nGlao Oscailte i mbliana, lena n-áirítear tograí chun tacaíocht ar leith a thabhairt d’fheirmeoirí níos sine, ar grúpa níos leochailí iad. Bhí feirmeoirí os cionn 60 bliain d’aois freagrach as trí cheathrú de na básanna feirme in 2025. Tá tograí á lorg freisin maidir le hoiliúint maidir le hobair ar airde agus seiceálacha éisteachta agus radhairc, agus beidh obair leantach ar athrú iompraíochta sláinte san áireamh i seiceálacha sláinte feabhsaithe chun feirmeoirí a spreagadh na hathruithe riachtanacha a dhéanamh chun a sláinte a fheabhsú agus a chosaint.”
Tá na tionscadail faoin nGlao Oscailte á maoiniú ó bhuiséad tiomnaithe sábháilteachta feirme na Roinne. Tá tograí á lorg do thionscadail a thabharfaidh aghaidh ar na téamaí agus na fothéamaí seo a leanas:
- Sábháilteacht Feirme
- Oiliúint feasachta ar thiomáint tarracóra do pháistí 14 bliana d’aois agus níos sine
- Oiliúint sábh slabhrach d’fheirmeoirí
- Oiliúint maidir le hobair ar airde d’fheirmeoirí
- Sláinte fhisiciúil feirmeoirí
- Seiceálacha sláinte fisiciúla d’fheirmeoirí
- Seiceálacha éisteachta agus radhairc
- Sláinte mheabhrach agus folláine feirmeoirí
Seiceálacha sláinte meabhrach
- Tacaíocht d’fheirmeoirí níos sine
Ní mór gach tionscadal a mhaoinítear faoin nGlao Oscailte a bheith críochnaithe faoin 30 Deireadh Fómhair 2026. Féadfar tionscadail rathúla a chuirfear i gcrích in 2026 a mhaoiniú arís sna blianta ina dhiaidh sin ar feadh tréimhse nó tréimhsí suas le dhá mhí dhéag, suas go deireadh 2029, faoi réir maoiniú a bheith ar fáil agus ceadú na Roinne.
Ag fáiltiú roimh an nGlao Oscailte, dúirt an tAire Heydon:
“Tar éis €3 mhilliún a fháil i maoiniú tiomnaithe don réimse tábhachtach seo i mBuiséad 2026, leanfaidh mo Roinn de thosaíocht a thabhairt do shábháilteacht, sláinte agus folláine gach duine atá bainteach leis an bhfeirmeoireacht. Léiríonn an tionscnamh seo tiomantas an Rialtais aghaidh a thabhairt ar na rioscaí díréireacha atá roimh an bpobal feirmeoireachta agus dul i ngleic le drochthaifead sábháilteachta na feirmeoireachta. Táim tiomanta a chinntiú go ndéanfaidh gach feirmeoir, sna ceithre bliana amach romhainn, na bearta riachtanacha chun aghaidh a thabhairt ar na rioscaí sábháilteachta ar a bhfeirmeacha agus chun a sláinte fhisiciúil agus mheabhrach agus a bhfolláine a chosaint agus a fheabhsú.”
Is féidir iarratais faoin nGlao Oscailte a sheoladh ar ríomhphost chuig farmsafetycall@agriculture.gov.ie nó iad a chur leis an bpost cláraithe chuig: An Rannóg um Bheartas Barr, Meastóireacht agus Deimhniúchán, an Roinn Talmhaíochta, Bia agus Mara, Foirgneamh Riaracháin Backweston, Cill Droichid, Co. Chill Dara. Is é an spriocdháta chun iarratais a chur isteach ná 5.00 i.n. Dé Céadaoin, an 1 Aibreán 2026. Tá an Doiciméad Sonraíochtaí agus an Fhoirm Iarratais ar fáil ag www.gov.ie/farmsafety.
Seimineár Gréasáin Faisnéise
Reáchtálfar seimineár gréasáin faisnéise maidir le hullmhú iarratas don Ghlao Oscailte Dé Céadaoin, an 11 Márta 2026 ag 10.00 am. Moltar d’iarratasóirí atá ag smaoineamh ar thogra a chur isteach freastal ar an seimineár gréasáin tábhachtach seo. Chun clárú don seimineár gréasáin, cliceáil anseo le do thoil.