Gairdín orgánach ar taispeáint ag Bloom
- Foilsithe: 29 Bealtaine 2025
- An t-eolas is déanaí: 3 Meitheamh 2025
Tá an Roinn Talmhaíochta, Bia agus Mara agus Bord Bia tar éis teacht le chéile chun tiomantas na hÉireann maidir le talmhaíocht orgánach a leathnú a léiriú le gairdín taispeántais orgánach nua ag Bloom 2025.
Tá an gairdín taispeántais, Simfónia an Dúlra: Ag Ceiliúradh Fáis Orgánaigh, deartha chun cuairteoirí a mhealladh agus oideachas a chur orthu maidir le prionsabail an táirgthe orgánaigh agus buntáistí modhanna fáis inbhuanaithe.
Tá an earnáil feirmeoireachta orgánaí ag fás go mear in Éirinn, de réir mar a léiríonn sonraí nua go bhfuil an méid talún atá á shaothrú go horgánach níos mó ná trí oiread méadaithe ó 2021. I mí Eanáir na bliana seo, bhí 5.5% de thalamh talmhaíochta á shaothrú go horgánach, i gcomparáid le 1.6% de thalamh na hÉireann a bhí á úsáid le haghaidh feirmeoireachta orgánaí in 2021.
Tá rannpháirtíocht feirmeoirí san earnáil ag méadú freisin agus tá sí beagnach trí oiread méadaithe le trí bliana anuas. Faoi láthair, tá thart ar 5,700 feirmeoir ag baint úsáide as cleachtais orgánacha ina gcuid feirmeoireachta, i gcomparáid le 2,000 feirmeoir in 2023.
Leagfaidh an gairdín taispeántais orgánach ag Bloom 2025, a bheidh ar siúl ó Déardaoin, 29 Bealtaine go Luan, 2 Meitheamh i bPáirc an Fhionnuisce i mBaile Átha Cliath, béim ar thiomantas na hÉireann chun táirgeadh talmhaíochta orgánach a fhás tuilleadh, ar sprioc lárnach í atá leagtha amach sa Straitéis Náisiúnta Orgánach 2024 – 2030.
Faoin Straitéis, tá gealltanas tugtha ag Éirinn luach €750 milliún de tháirgí orgánacha a sheachadadh i dtéarmaí praghsanna mórdhíola faoi 2030, méadú ó luach €200 milliún de tháirgí orgánacha in 2023. Tá gealltanas tugtha ag an Roinn freisin go mbeidh 10% de thalamh talmhaíochta na hÉireann á shaothrú go horgánach faoi 2030.
I gcaitheamh chúig lá Bloom, beidh cuairteoirí in ann criosanna plandála ar leith a fheiceáil laistigh den ghairdín a thaispeánfaidh barra orgánacha, prátaí agus glasraí eile i leapacha traidisiúnta, taobh le plandaí fiáine coitianta na hÉireann agus crainn eiseamláireacha.
Dúirt an tAire Talmhaíochta, Bia agus Mara, Martin Heydon T.D.:
“Tá talmhaíocht orgánach na hÉireann thar a bheith tábhachtach dár ngeilleagar, agus tá áthas orm go bhfuil Bord Bia agus mo Roinn ag obair le chéile chun aird a tharraingt ar an earnáil i mbliana lenár ngairdín taispeántais orgánach comhoibríoch ag Bloom. Níos luaithe an mhí seo, d’fhógair mé deich dtionscadal a gheobhaidh maoiniú de bheagnach €1 milliún chun earnáil orgánach na hÉireann a chur chun cinn i gcomhréir lenár Straitéis Náisiúnta Orgánach 2024 – 2030. Tá an Straitéis seo mar bhonn agus taca faoi thiomantas an Rialtais chun feirmeoireacht orgánach na hÉireann a chur chun cinn agus táim ag tnúth leis seo a fheiceáil á thabhairt chun críche ag Bloom.”
Dúirt Stiúrthóir Feola, Bia agus Deochanna ag Bord Bia, John Murray:
“Léiríonn an fás suntasach le déanaí in earnáil talmhaíochta orgánach na hÉireann spéis mhéadaitheach i dtáirgeadh orgánach ar leibhéal na feirme agus léiríonn sé an dul chun cinn atá déanta ar an turas chun spriocanna a leagtar amach sa Straitéis Orgánach Náisiúnta 2024 – 2030 a bhaint amach.” Tá sé mar aidhm ag an ngairdín taispeántais orgánach ag Bloom an earnáil atá ag fás seo a chur chun cinn agus molaim do lucht freastail Bloom 2025 cuairt a thabhairt ar an ngairdín chun níos mó a fhoghlaim faoi fheirmeoireacht orgánach agus na buntáistí a bhaineann léi don chomhshaol, don gheilleagar agus don bhord dinnéir.”
Cuirfidh gairdín taispeántais Symphony’s Nature: Celebrating Organic Growth béim freisin ar thábhacht na bithéagsúlachta agus ar an gcaoi a n-oibríonn cleachtais orgánacha i gcomhar leis an gcomhshaol.
Tá roinnt spásanna léirithe pearsanta sa ghairdín freisin le suíocháin i stíl amfaitéatair déanta as ábhair a fhaightear go hinbhuanaithe. Beidh sraith léirithe ad hoc a bhaineann le hobair orgánach ar siúl anseo i rith an deireadh seachtaine.
Tá roinnt criosanna fiáine sa ghairdín fágtha gan smacht d'aon ghnó, agus beidh bláthanna fiáine agus gnáthóga iontu a mheallann pailneoirí. Leagann an rogha dearaidh seo béim ar áilleacht an nádúir gan smacht agus ar an tábhacht a bhaineann le tearmann a chruthú don fhiadhúlra.
Tabharfaidh gnéithe den ghairdín taispeántais ómós freisin d’Uachtarán na hÉireann, Michael D. Higgins, atá ina Phátrún ar Bloom, a thacaíocht do tháirgeadh bia orgánach, agus a dhíograis don inbhuanaitheacht, don chruthaitheacht agus do na healaíona.
In aice leis an ngairdín taispeántais orgánach, beidh ceardlanna oideachasúla ar leideanna garraíodóireachta orgánaí ar siúl i spás ainmnithe, ag tabhairt cuireadh do chuairteoirí de gach aois foghlaim agus páirt a ghlacadh i ngnéithe orgánacha an ghairdín.
Tá Bord Bia agus an Roinn Talmhaíochta, Bia agus Mara tar éis comhaontú a dhéanamh gairdín taispeántais orgánach a sheachadadh ag Bloom don chéad trí bliana eile.
Is iad Liat agus Oliver Schurmann, ar leo Naíolann Mount Venus, a bhfuil an-cháil uirthi, i gcos Shléibhte Bhaile Átha Cliath, a dhear gairdín orgánach na bliana seo. Tá Liat agus Oliver paiseanta faoi ghairdíní taispeántais a dhearadh do Bord Bia Bloom agus do Chumann Ríoga Gairneoireachta na hÉireann. Tá bonn agus duaiseanna iomadúla buaite acu as a ndearaí ceannródaíocha atá faoi thionchar an chur chuige ilchríochach i leith dearadh gairdíní feidhmiúil.
Chun tuilleadh eolais a fháil faoi Bhord Bia Bloom 2025, tabhair cuairt ar: www.bordbiabloom.com