Tabhairt Isteach Chláir Máistrí Iascaireachta na hÉireann

Scríobh an Roinn Talmhaíochta, Bia agus Mara chuig gach sealbhóir ceadúnais báid iascaireachta Mara na hÉireann chun iad a chur ar an eolas faoin gceanglas dlíthiúil atá ag teacht isteach ar mháistrí na mbád dá leithéid chun clárú go foirmiúil. Tagann sé seo i ndiaidh ritheadh an Achta Iascaigh Mhara (Forálacha Ilghnéitheacha) 2022 a thiocfaidh i bhfeidhm an 3ú Bealtaine 2022. Go dtí seo, tá níos mó ná 500 iarratas faighte agus á bpróiseáil ag an Roinn.

Bainfidh clár na Máistrí, eadhon Clár Máistrí Iascaireachta na hÉireann (IFMR), le haon saoránach Éireannach atá ina mháistir, ina scipéir nó duine eile atá i bhfeighil báid iascaireachta Mara na hÉireann go ceann scaithimh. Tabharfar Teastas Máistreachta do mháistrí atá cláraithe, agus ba chóir é a iompar ar bord i gcónaí agus iad ag gníomhú mar mháistir ar bhád iascaireachta mara. Áireofar mar chion dul i bhfeighil go dleathach ar bhád iascaireachta mara mura bhfuil an duine sin cláraithe ar an IFMR agus mura bhfuil Deimhniú Máistir ina sheilbh acu. Áireofar mar chion freisin duine a fhostú go feasach mar mháistir nach bhfuil cláraithe amhlaidh ar an IFMR.

Moltar d’aon duine nach bhfuil iarratas déanta fós le bheith cláraithe chun é sin a dhéanamh roimh an 3ú Bealtaine 2022.

D’fhéadfaí foirmeacha iarratais a fháil in Oifig Mháistir Cuain, ag na sé Ionad Cuan Iascaigh atá faoi úinéireacht an Stáit. Tá siad lonnaithe i mBaile Chaisleáin Bhéarra, sa Daingean, i nDún Mór Thoir, i mBinn Éadair, i Ros an Mhíl agus sna Cealla Beaga. D’fhéadfaí foirmeacha iarratais a íoslódáil freisin ó: Irish Fishing Master Register

Bhunaigh Rialachán (AE) Uimh. 1224/2009 córas rialaithe pobail chun comhlíonadh rialacha an Chomhbheartais Iascaigh (CBI) a chinntiú agus ionas go mbeadh sé cothrom ar fud an AE maidir le rialú iascaigh.

Is é príomhchuspóir an CBI ná soláthar a dhéanamh do bhainistiú inbhuanaithe agus atógáil stoic éisc in uiscí na hEorpa. Tacóidh sé sin le hinmharthanacht thionscal iascaireachta na hEorpa trí bhainistíocht inbhuanaithe fhadtéarmach ar stoic, trí aischur a laghdú agus a dhíchur agus stoic a atógáil chun Uastáirgeacht Inbhuanaithe (UTI) a bhaint amach.

Is é príomhchuspóir an Achta Iascaigh Mhara (Forálacha Ilghnéitheacha) 2022 ná:

• do leasú an Achta Iascaigh Mhara agus Dlínse Muirí, 2006 chun éifeacht a thabhairt d'Airteagal 92 de Rialachán (CE) Uimh. 1224/2009 ón gComhairle agus Teideal VII de Rialachán Cur Chun Feidhme (AE) Uimh. 404/2011 ón gCoimisiún chun soláthar a dhéanamh maidir le córas clárúcháin agus pointí a shannadh do Mháistrí Báid Iascaireachta Mara atá Saoránaigh Éireannacha.
• do leasú an Achta Iascaigh (Leasú), 2003
• do leasú Rialacháin an Aontais Eorpaigh (Comhbheartas Iascaigh) (Córas pointí), 2020 (I.R. Uimh. 318 de 2020)
• agus do dhéanamh socrú le haghaidh nithe eile.

Tá téacs iomlán an Achta Iascaigh Mhara (Forálacha Ilghnéitheacha), 2022 ar fáil ar líne: Sea-Fisheries (Miscellaneous Provisions) Act 2022