Ciste na Séadchomharthaí Pobail 2021 - Gairm ar Thionscadail

Bunaíodh Ciste na Séadchomharthaí Pobail sa bhliain 2020 ar dtús chun infheistíocht a dhéanamh in oidhreacht sheandálaíochta na hÉireann.

Tá cuid den mhaoiniú seo curtha i leataobh d’údaráis áitiúla, d’úinéirí príobháideacha agus do ghrúpaí pobail ar mhaithe le cúram, caomhnú, cothabháil, cosaint agus cur chun cinn séadchomharthaí seandálaíochta.

Beidh maoiniú luach €2,000,000 ar fáil ar bhonn náisiúnta do thionscadail faoi Chiste na Séadchomharthaí Pobail 2021.

Infheisteoidh Ciste na Séadchomharthaí Pobail caipiteal riachtanach inár n-oidhreacht sheandálaíochta luachmhar agus cabhróidh sé le húinéirí agus le caomhnóirí séadchomharthaí seandálaíochta iad a chosaint amach anseo chun tairbhe pobal agus an phobail.

Tá tionchair an athraithe aeráide ar ár séadchomharthaí ag teacht chun soiléire de réir a chéile. Ó tharla méadú a bheith tagtha ar líon na dteagmhas síonchaithimh agus na dteagmhas trom aeráide, is dócha go mbeidh timthriall deisithe ár n-oidhreachta tógtha níos giorra ná mar a bhí. Bainfidh fíorthábhacht le breis obair chothabhála agus deisithe chun seasmhacht ár séadchomharthaí a láidriú ionas go mbeidh siad in ann déileáil le héifeachtaí timpeallacht atá ag athrú.

Is iad príomhaidhmeanna an Chiste seo séadchomharthaí seandálaíochta a chaomhnú, a chothabháil, a chosaint agus a chur i láthair. Cabhróidh an Ciste leis na nithe seo:

• cumasóidh sé oibreacha caomhantais a chur i gcrích ar shéadchomharthaí a mheastar atá suntasach agus a dteastaíonn tacaíocht uathu ar bhonn práinne;
• spreagfaidh sé rochtain ar shéadchomharthaí agus feabhsóidh sé an chuma atá orthu;
• cothóidh sé seasmhacht ár séadchomharthaí chun cur ar a gcumas déileáil le héifeachtaí an athraithe aeráide.

Spreagann an Roinn tacadóirí tionscadail chun gné oiliúna i scileanna traidisiúnta a áireamh i dtionscadail.

Tá 3 Shnáithe luaite le Ciste na Séadchomharthaí Pobail:

• Tairgfidh Snáithe 1 deontais suas le €85,000 a bhfuil sé mar aidhm leo oibreacha deisithe agus caipitil a dhéanamh atá riachtanach le haghaidh caomhnú agus deisiú séadchomharthaí seandálaíochta (Tá €1,000,000 ar fáil)
• Tairgfidh Snáithe 2 deontais suas le €30,000 chun Pleananna/Tuarascálacha Bainistíochta Caomhantais a fhorbairt a bhfuil sé mar aidhm leo bearta a shainaithint do chaomhnú séadchomharthaí seandálaíochta agus rochtain phoiblí a fheabhsú. (Tá €550,000 ar fáil)
• Tairgfidh Snáithe 3 deontais suas le €30,000 chun bonneagar rochtana agus áiseanna léirléimh (lena n-áirítear fíorúil/ar líne) ag séadchomharthaí seandálaíochta a fheabhsú (lena n-áirítear beartas sláinte poiblí COVID 19). (Tá €450,000 ar fáil)

Soláthraíonn Ciste na Séadchomharthaí Pobail maoiniú do thionscadail a bhaineann le:

• Séadchomharthaí Seandálaíochta atá san áireamh sa Taifead Séadchomharthaí agus Áiteanna (TSA) faoi Acht na Séadchomharthaí Náisiúnta 1930 (arna leasú);
• Séadchomharthaí Seandálaíochta atá sainaitheanta sa Taifead Láithreán agus Séadchomharthaí atá curtha i dtoll a chéile ag Seirbhís na Séadchomharthaí Náisiúnta.

Bainfidh tionscadail incháilithe leis na catagóirí seo a leanas:

• tionscadail atá á moladh ag Údarás Áitiúil i ndáil le séadchomharthaí seandálaíochta faoi úinéireacht phoiblí, le béim shoiléir ar oidhreacht agus fianaise maidir le leas pobail nó poiblí curtha ar fáil;
• tionscadail atá beartaithe ag Údarás Áitiúil de bhun iarratas faighte ó iarratasóirí príobháideacha ar úinéirí nó caomhnóirí séadchomharthaí seandálaíochta iomchuí iad lena mbaineann leas poiblí follasach.
• tionscadail ina bhfuil béim shoiléir ar oidhreacht agus leas pobail nó poiblí atá molta go díreach chuig an Roinn ag eagraíocht Státmhaoinithe atá ag obair sa réimse oidhreachta.

Má theastaíonn tuilleadh eolais uait agus más mian leat iarratas a dhéanamh, íoslódáil an doiciméad seo a leanas:

Ciorclán CMF2021 - Ciste na Séadchomharthaí Pobal 2021