Tacú le Páistí agus Teaghlaigh atá gan dídean

Tá a fhios ag an Rialtas gur féidir le fanacht i gcóiríocht éigeandála dochar a dhéanamh d’fholláine daoine, páistí go háirithe. Tabharfaimid tús áite do riachtanais páistí agus muid ag dul i ngleic le heaspa dídine.

• Cinnteoidh dlíthe nua go n-áireofar leas an pháiste i gcinntí a dhéantar faoi thithíocht do theaghlaigh gan dídean.
• Príomhsprioc de chuid an phlean seo is ea easpa dídine fadtéarmach a laghdú do theaghlaigh agus an t-am a chaitheann páistí i gcóiríocht éigeandála a ghiorrú.
• Is minic teaghlaigh mhóra ag fanacht níos faide i gcóiríocht éigeandála toisc nach bhfuil go leor tithe ina bhfuil ceithre sheomra leapa ar fáil. Méadóidh an plean seo soláthar na dtithe seo trí infheistíocht leanúnach i dtithíocht shóisialta.
• Ullmhóidh údaráis áitiúla Pleananna Gníomhaíochta um Sheachadadh Tithíochta chun an soláthar tithíochta a mheaitseáil le riachtanais áitiúla. Áirítear leis seo níos mó tithe seomra leapa amháin do dhaoine fásta singile agus níos mó tithe ceithre sheomra leapa do theaghlaigh mhóra

• Cuirfear €100 milliún ar fáil in 2026 chun tithe athláimhe a cheannach do na teaghlaigh sin is faide atá i gcóiríocht éigeandála.
• Leanfar de thacaíochtaí breise faoin Íocaíocht Cúnaimh Tithíochta (HAP), lena n-áirítear cúnamh le héarlaisí agus réamhíocaíochtaí cíosa.

• Déanfaidh an Rialtas athbhreithniú ar an soláthar tithíochta sóisialta agus ar na tacaíochtaí tionóntachta atá ar fáil chun cabhrú le níos mó teaghlach agus páistí cóiríocht éigeandála a fhágáil go tapa.
• Oibreoidh an Roinn Tithíochta le húdaráis áitiúla chun a chinntiú go bhfreastalaíonn scéimeanna leithdháilte ar riachtanais na dteaghlach sin atá gan dídean, go háirithe iad siúd a bhfuil páistí acu.

• Bíonn foréigean baile ina chúis go minic le teaghlaigh a bheith gan dídean. Treoraíonn an Roinn Dlí agus Cirt beartas ar an tsaincheist seo tríd an straitéis Neamhfhulaingthe (2022–2026).
• Tá deireadh a chur le bacainní dlí ionas gur féidir le híospartaigh fanacht ina dtithe nuair atá sé sábháilte ar cheann de phríomhghníomhartha na straitéise.
• Tacóidh údaráis áitiúla le híospartaigh fanacht ina mbaile féin nó filleadh abhaile nuair is féidir agus tabharfaidh siad tosaíocht do thithíocht do dhaoine atá tagtha slán ó fhoréigean baile.
• Gheobhaidh íospartaigh a bhogann chuig údarás áitiúil nua tacaíochtaí iomlána tithíochta sóisialta, lena n-áirítear ÍCT, láithreach.
• Tabharfaidh prótacal nua cead d’íospartaigh an t-am atá caite acu ar liosta tithíochta a aistriú chuig údarás áitiúil eile.

• Ba chóir go mbeadh easpa dídine neamhchoitianta, gearrthéarmach, agus níor cheart go dtarlódh sé arís.
• Foilseoidh an Roinn sonraí ráithiúla ar theaghlaigh agus ar pháistí a dtagann deireadh lena n-easpa dídine agus oibreoidh sí chun an t-am a chaitear i gcóiríocht éigeandála a laghdú.
• Forbrófar Plean Gníomhaíochta nua um Pháistí agus Teaghlaigh gan Dídean, faoi threoir Choinbhinsiún na Náisiún Aontaithe um Chearta an Linbh. Díreoidh sé ar chosc, ar bhealaí amach níos tapúla, agus ar thacaíochtaí níos fearr a chur ar fáil do pháistí agus do thuismitheoirí, lena n-áirítear oideachas agus cothú.

Rachfar i gcomhairle le príomhpháirtithe leasmhara chun a chinntiú go bhfuil an plean láidir agus éifeachtach.