Laghdú 36% ar Liosta Feithimh le haghaidh Tithíocht Shóisialta le sé bliana anuas
- Foilsithe: 24 Márta 2023
- An t-eolas is déanaí: 29 Márta 2023
Ar an 24 Márta, d'fhoilsigh an tAire Tithíochta, Rialtais Áitúil agus Oidhreachta, Darragh O’Brien, figiúirí ón Achoimre ar Mheasúnuithe le haghaidh Tithíocht Shóisialta 2022 (AMTS), figiúirí a léiríonn gur tháinig laghdú nach beag de 36.8% ar an liosta feithimh le haghaidh tithíocht shóisialta ó rinneadh an chéad mheasúnú bliantúil in 2016.
Léirigh AMTS na bliana 2022 gur measadh, tar éis measúnú a dhéanamh orthu, 57,842 líon tí a bheith incháilithe do thacaíocht tithíochta sóisialta, agus an tacaíocht sin ag teastáil uathu, ón 1 Samhain 2022. Is ionann an figiúr sin agus laghdú 1,405 (2.4%) ar an 59,247 líon tí a bhí i gceist ar an 17 Samhain 2021. Is ionann an figiúr sin freisin agus laghdú de 33,758 (36.8%) ó 2016 i leith.
Líon na dTeaghlach ar Liostaí Feithimh na nÚdarás Áitiúil
D’fháiltigh an tAire roimh fhoilsiú na sonraí, ag tabhairt faoi deara gur lean líon iomlán na dteaghlach ar liostaí feithimh na n-údarás áitiúil de bheith ag laghdú don séú bliain as a chéile.
Ag labhairt dó ar fhigiúirí an lae inniu, dúirt an tAire O’Brien:
“Is ábhar misnigh é an treocht ach ní féidir linn, agus ní dhéanfaimid, dearmad go bhfuil os cionn 57,000 teaghlach fós ag brath orainn tacaíocht tithíochta a sholáthar.
“É sin ráite, táimid ag dul sa treo ceart. Tá infheistíocht shuntasach á déanamh i dtithíocht shóisialta inacmhainne agus tá maoiniú i bhfeidhm chun an líon is airde riamh de 11,830 teach sóisialta (9,100 teach nuathógtha san áireamh) a sholáthar in 2023.”
Nótaí
Achoimre ar Mheasúnachtaí Tithíochta Sóisialta 2022 - Príomhthorthaí
Tagraítear don phríomhfhigiúr a thuairiscítear san AMTS mar ‘Ghlanriachtanas’ - is é sin líon iomlán na dteaghlach atá cáilithe do thacaíocht tithíochta sóisialta ach nach bhfuil a riachtanas á shásamh faoi láthair. Ní áirítear leis an iomlán seo teaghlaigh a thiteann faoi na catagóirí seo a leanas:
- iarratais dhúblacha – i gcás ina bhfuil iarratas déanta ag teaghlach ar thithíocht shóisialta chuig níos mó ná limistéar amháin, ní chuirtear san áireamh ach an t-iarratas is sine acu sa chomhaireamh sin
- teaghlaigh a bhfuil tacaíocht tithíochta sóisialta á fáil acu cheana féin, mar shampla: teaghlaigh a bhfuil cónaí orthu faoi láthair i gcóiríocht údaráis áitiúil atá ar cíos, i gcóiríocht dheonach/chomhoibríoch, i gcóiríocht a chuirtear ar fáil faoin scéim ÍCT, i gcóiríocht a chuirtear ar fáil faoin Scéim Chóiríochta ar Cíos, nó i gcóiríocht a chuirtear ar fáil faoi na scéimeanna Cláir Caiteachais Reatha um Thithíocht Shóisialta
- teaghlaigh atá ar liosta aistrithe - aon teaghlach a chuir isteach ar aistriú ó chineál tacaíochta tithíochta sóisialta atá ann cheana féin
Tá torthaí mionsonraithe na hAchoimre ar Mheasúnachtaí Tithíochta Sóisialta roimhe seo ar fáil ar shuíomh gréasáin na roinne trí na naisc seo a leanas a úsáid:
• Achoimre ar Mheasúnachtaí Tithíochta Sóisialta 2016 - 91,600 ar liosta
• Achoimre ar Mheasúnachtaí Tithíochta Sóisialta 2017 - 85,799 ar liosta
• Achoimre ar Mheasúnachtaí Tithíochta Sóisialta 2018 – Príomhthorthaí - 71,858 ar liosta
• Achoimre ar Mheasúnachtaí Tithíochta Sóisialta 2019 - Príomhthorthaí - 68,693 ar liosta
• Achoimre ar Mheasúnachtaí Tithíochta Sóisialta 2020 – Príomhthorthaí - 61,880 ar liosta
• Achoimre ar Mheasúnachtaí Tithíochta Sóisialta 2021 – Príomhthorthaí - 59,247 ar liosta