Tá fad curtha le rialacháin chun táillí troscáin sráide a tharscaoileadh maidir le hithe taobh amuigh suas le mí Mheán Fómhair 2026 ag an Aire Browne
- Foilsithe: 11 Feabhra 2026
- An t-eolas is déanaí: 11 Feabhra 2026
Shínigh an tAire Tithíochta, Rialtais Áitiúil agus Oidhreachta, James Browne na Rialacháin maidir le Pleanáil agus Forbairt (Táillí Troscáin Sráide), 2025, lena dtarscaoiltear táillí troscáin sráide suas go dtí an 30 Meán Fómhair 2026 agus an dáta sin san áireamh.
Baineann na Rialacháin seo le baint táillí ceadúnais troscáin sráide maidir le ‘boird agus cathaoireacha taobh amuigh d’óstán, bialann, teach tábhairne nó gnólacht eile ina ndíoltar bia lena ithe ar an áitreabh’.
Bhí an méid seo a leanas le rá ag an Aire James Browne:
“Rinne mé cinneadh táillí troscáin sráide a tharscaoileadh suas go dtí an 30 Meán Fómhair 2026 chun tacú leis na hearnálacha fáilteachais, bialainne agus turasóireachta.
“Trí fhad a chur leis an tarscaoileadh go dtí an bhliain seo chugainn, clúdófar séasúr an tsamhraidh in 2026 freisin.
“Tuigim na brúnna airgeadais ar ghnólachtaí fáilteachais amhail caiféanna, tithe tábhairne agus bialanna mar gur oibrigh mé san fháilteachais ar feadh roinnt mhaith blianta.
“Tá ár mbailte agus ár sráidbhailte bríomhar agus lán le fuinneamh le linn mhíonna an tsamhraidh mar go bhfuil deis ag daoine a bheith ina suí taobh amuigh agus bualadh le chéile.
“Leis an mbeart seo beidh an earnáil fáilteachais in ann suíocháin taobh amuigh a chur ar fáil gan an táille cheadúnais ghaolmhar, ar mhaithe le gach duine, agus spreagfar an earnáil é sin a dhéanamh.”
Tá na rialacháin mar an gcéanna leis na tionscnaimh ó bhí 2021 ann agus tá siad dírithe ar thacú le téarnamh eacnamaíoch agus le gníomhaíocht ghnó i lárionaid uirbeacha, go háirithe sna hearnálacha fáilteachais, bialainne agus turasóireachta, suas go dtí an 30 Meán Fómhair 2026.
Leanfaidh an tarscaoileadh seo de bheith ag cabhrú leis an earnáil fáilteachais tríd an gcostas a bhaineann le hithe taobh amuigh ar bhóithre poiblí a laghdú.
Thug an tAire Browne le fios i mí na Bealtaine i mbliana go lorgódh sé táillí ceadúnais troscáin sráide a tharscaoileadh maidir le boird agus cathaoireacha a bhaineann le hithe taobh amuigh don chuid eile den bhliain 2025.
Ach, tar éis breithniú breise, cuireadh fad leis an tarscaoileadh go dtí mí Mheán Fómhair 2026 chun tuilleadh cinnteachta a thabhairt go háirithe do ghnólachtaí beaga.
Leis na rialacháin atá sínithe ag an Aire Browne anois, tarscaoiltear táillí ceadúnais atá socraithe faoi láthair ag €125 in aghaidh an bhoird, in aghaidh na bliana.