Tá ordú d’údaráis áitiúla chun suíomhanna oiriúnacha a shainaithint le haghaidh Criosanna Forbartha Uirbí (CFUnna) sínithe ag an Aire Browne
- Foilsithe: 30 Aibreán 2026
- An t-eolas is déanaí: 30 Aibreán 2026
Tá ordú sínithe ag an Aire Tithíochta, Rialtais Áitiúil agus Oidhreachta, James Browne, a chuirfidh ar chumas údaráis áitiúla suíomhanna oiriúnacha a shainaithint le haghaidh Criosanna Forbartha Uirbí (CFUnna), agus ar chumas na Gníomhaireachta Forbartha Talún (GFT) agus na dTionól Réigiúnach aird na n-údarás áitiúil agus an Aire a tharraingt ar shuíomhanna oiriúnacha.
Is limistéir ainmnithe laistigh de lonnaíochtaí atá ann cheana féin iad Criosanna Forbartha Uirbí (CFUnna) san Acht um Pleanáil agus Forbairt, 2024 le haghaidh forbairt chónaithe agus uirbeach ar scála mór, atá faoi stiúir plean. Soláthróidh na criosanna seo creat dá bhforbairt amach anseo chun cur chuige comhordaithe i leith fás uirbeach a chinntiú.
Beidh infheistíocht shuntasach ón Stát i mbonneagar mar bhonn taca le hainmniú rialtais CFUnna chun a chinntiú go gcumasófar forbairt nua.
Tiocfaidh an tOrdú um Thosach Feidhme seo (le haghaidh Chaibidlí 1 agus 2 de Chuid 22 den Acht um Pleanáil agus Forbairt, 2024) i bhfeidhm ón Luan seo chugainn (9 Meitheamh 2025).
Chuir an tAire Browne i dtábhacht gur mian leis dul chun cinn tapa a dhéanamh maidir le cur i bhfeidhm an Achta um Pleanáil agus Forbairt, 2024, agus dúirt sé:
“Inniu, táim ag fógairt athchóiriú breise ar ár gcóras pleanála – an tríú ceann laistigh de choicís – chun borradh a chur faoi thithíocht agus chun tógáil níos mó tithíochta a éascú. Is é aidhm fhoriomlán an phróisis Creasa Forbartha Uirbí cur chuige nuashonraithe agus níos solúbtha a sholáthar maidir le forbairtí mórscála agus bonneagar riachtanach a sheachadadh ná mar atá leagtha amach faoi láthair ag an bpróiseas Creasa Forbartha Straitéisí atá ann cheana féin. Tiocfaidh Criosanna Forbartha Uirbí in ionad Criosanna Forbartha Straitéisí mar bhealach chun forbairt chomhtháite mhórscála nua a sheachadadh.
“Ligfidh an t-athrú atá á thabhairt isteach agam inniu dúinn anois sainaithint suíomhanna a spreagadh agus forbhreathnú straitéiseach criticiúil a chruthú ar shuíomhanna oiriúnacha chun tacú le forbairt agus bonneagar ar an scála atá riachtanach chun seachadadh tithe nua dár bpobail a mhéadú go suntasach.
“Trí chomhoibriú a shainordú idir údaráis áitiúla, an Ghníomhaireacht Forbartha Talún agus mo roinn, is féidir linn suíomhanna forbartha a chur ar fáil ar dócha go mbeidh sochar suntasach eacnamaíoch, sóisialta nó comhshaoil ag baint leo don Stát agus don leas coiteann.”
Dúirt an tAire Stáit le freagracht as Pleanáil agus Rialtas Áitiúil, John Cummins:
“Is gné nua eile de reachtaíocht phleanála iad Criosanna Forbartha Uirbí a thug an rialtas seo isteach. Is beart an-fhorásach iad lena gceadófar próiseas atá faoi stiúir plean lena n-áirítear ról cinnteoireachta lárnach d’údaráis phleanála. Soláthraíonn siad cinnteacht roimh ré do phobail agus don earnáil forbartha freisin, rud a chuirfidh leis na gnéithe is fearr de na sean-Chriosanna Forbartha Straitéisí.
“Ní féidir ainmniú tailte mar Chriosanna Forbartha Uirbí ag an rialtas a mheas ach amháin nuair a bheidh an próiseas chun suíomhanna oiriúnacha a shainaithint mar Chriosanna Forbartha Uirbí féideartha críochnaithe ag an údarás pleanála ina bplean forbartha, dá bhrí sin tá sé ríthábhachtach go dtosófar an obair seo a luaithe is féidir. I bhfianaise na n-athruithe ar phleananna forbartha contae a thosóidh go luath chun figiúirí a nuashonrú maidir le fás tithíochta, anois an t-am tráthúil le leas a bhaint as na deiseanna a bhaineann le Criosanna Forbartha Uirbí .”