“Cuirim fáilte mhór roimh fhógra an lae inniu ó Chomhairle Cathrach Bhaile Átha Cliath agus an Ghníomhaireacht Forbartha Talún ina ndeimhnítear a gcomhaontú dul i gcomhpháirtíocht chun an tionscadal athghiniúna ríthábhachtach seo i gcroílár ár bpríomhchathrach a chur chun cinn. Aistear fada a bhí ann, ach trí rannpháirtíocht fhairsing le cónaitheoirí agus páirtithe leasmhara áitiúla, is féidir linn breathnú le chéile anois i dtreo todhchaí níos fearr don phobal bródúil seo.

“Tá áthas ar mo roinn a dheimhniú go bhfuil an tionscadal faofa i bprionsabal agus go bhféadfaidh sé dul ar aghaidh anois go dtí céim an deartha agus na pleanála mionsonraithe. Tá a fhios agam gur oibrigh CCBÁC agus an GFT go maith le chéile ar roinnt tionscadal san am atá caite agus gan amhras cuirfidh siad a dtaithí agus a saineolas i bhfeidhm ar an tionscadal seo freisin.

“Tógadh Eastát Theach an Charnáin sna 1950idí tráth a bhí tionscadail tithíochta poiblí á dtriail ar fud na hEorpa agus níos faide i gcéin, ach tá go leor athraithe ó shin. Cé gur tugadh moladh mór do scála agus uaillmhian na dtionscadal sin le linn na ré áirithe sin, tá sé tábhachtach go bhfoghlaimímid ó bhotúin an ama atá caite agus go ndéanaimid ár ndícheall a bheith ar thús cadhnaíochta i dtéarmaí na dtithe agus na bpobal a thógaimid inniu. Le Tionscadal Athghiniúna Eastát Theach an Charnáin, cuirfear árasáin agus tithe nua fuinneamhéifeachtúla, mar aon leis na háiseanna uile is gá in aice láimhe, in ionad tithe atá ann cheana féin, chun pobal bríomhar a sholáthar do chónaitheoirí atá ann anois agus a bheidh ann amach anseo.”