Deontas Folúntais Os Cionn an tSiopa

Is íocaíocht é an Deontas do Réadmhaoin Fholamh Os Cionn an tSiopa gur féidir leat a fháil má tá spás folamh á thiontú (nó á athchóiriú) agat atá os cionn áitreabh tráchtála chun úsáid chónaithe a bhaint as. Ní mór go mbeadh gné thráchtála an fhoirgnimh fós i bhfeidhm.

Chun cáiliú don deontas, ní mór duit:

• Cruthúnas maidir le húinéireacht an fhoirgnimh a bheith agat nó fianaise maidir le hidirbheartaíocht ghníomhach chun an réadmhaoin a cheannach.
• Cruthúnas gur tógadh an foirgneamh roimh 2008.
• Cruthúnas go bhfuil an spás os cionn an tsiopa folamh i gcomhair dhá bhliain ar a laghad nuair a dhéantar an t-iarratas.
• Féadfaidh an spás tráchtála ar urlár na talún a bheith in úsáid nó folamh tráth déanta an iarratais, ach ní mór go mbeadh úsáid thráchtála á baint as an bhfoirgneamh fós.
• D’fhéadfadh na haonaid chónaithe a fhorbraítear a bheith in úsáid mar phríomháit chónaithe phríobháideach an iarratasóra agus / nó d’fhéadfadh siad a bheith á ligean ar cíos (le tionóntacht / tionóntachtaí) a bheidh cláraithe leis an mBord um Thionóntachtaí Cónaithe.
• Ní féidir ach le húinéirí ainmnithe iarratais a dhéanamh (trádálaithe aonair san áireamh). Níl an deontas ar fáil do chuideachtaí cláraithe.

Tá an Deontas ar fáil do réadmhaoin cháilitheach i gcathracha, bailte agus sráidbhailte.

Doiciméid atá riachtanach chun tacú leis an bhfoirm iarratais:

1. meastachán maidir leis na hoibreacha atá beartaithe
2. fianaise go bhfuil rátaí tráchtála íoctha nó in ord cuí
3. réamhdhearadh/réamhlíníocht ina dtugtar léargas ar an aonad/ar na haonaid c(h)ónaithe atá le cruthú san fhoirgneamh.
4. aon doiciméad tacaíochta eile a fhéadfaidh d’údarás áitiúil a lorg chun tacú le d’iarratas.

Tá deontas de suas le €95,000 ar fáil d’athchóiriú/d’athoiriúnú an chéad aonaid os cionn aonad an tsiopa, agus tá suas le €20,000 iníoctha don dara aonad a chruthaítear agus €20,000 breise sa chás go gcruthaítear trí aonad cónaithe nó níos mó, suas go dtí uasmhéid de €135,000.

Níl aon uasmhéid luaite le líon na ndeontas ar féidir le duine aonair iarratas a dhéanamh orthu faoin Deontas, ach níl ach deontas amháin, iníoctha in aghaidh fhoirgnimh, méideanna breisithe san áireamh.

Tá an Deontas do Réadmhaoin Fholamh Os Cionn an tSiopa á riar ag údaráis áitiúla. Is féidir leat iarratas a sheoladh chuig an údarás áitiúil ina bhfuil an foirgneamh lonnaithe.