Ceoltóirí gairmiúla atá ag teacht chun cinn le leas a bhaint as an Scéim um Chaipiteal Ceoil den chéad uair
-
Ó: An Roinn Turasóireachta, Cultúir, Ealaíon, Gaeltachta, Spóirt agus Meán
- Foilsithe: 4 Iúil 2022
- An t-eolas is déanaí: 12 Aibreán 2025
Fáiltíonn an tAire Martin roimh fhógairt 55 faighteoir sa bhabhta maoinithe is déanaí chun tacú le taibhghrúpaí agus ceoltóirí aonair uirlisí ceoil a cheannach
Inniu (an 4 Iúil 2022), d’fháiltigh an tAire Catherine Martin T.D. roimh fhógairt Music Network faoi mhaoiniú €306,096 a bronnadh ar thaibhghrúpaí agus ar cheoltóirí gairmiúla tríd an Scéim um Chaipiteal Ceoil.
Roinntear an babhta maoinithe seo faoin Scéim um Chaipiteal Ceoil, idir 28 taibhghrúpa neamhghairmiúla (€165,156), 18 gceoltóir chumasacha aonair (€100,940) chomh maith le 9 gceoltóir gairmiúla atá ag teacht chun cinn (€40,000).
Tá an tionscnamh seo, atá ann ó 2008, á bhainistiú ag Music Network agus á mhaoiniú ag an Roinn. Tacaíonn an Scéim um Chaipiteal Ceoil le huirlisí ceoil a cheannach agus dearadh í chun freagairt do raon leathan riachtanais chaipitiúla laistigh d’earnáil an cheoil in Éirinn. Réimse deacrachta ar leith do cheoltóirí agus do ghrúpaí ceoil is ea uirlisí ceoil a cheannach. Is féidir leis an gcostas a bhaineann le ceannach, cothabháil agus deisiú uirlisí a bheith ina bhac costasach ar fhorbairt go leor eagraíochtaí agus daoine aonair. Tá sé mar aidhm ag an Scéim um Chaipiteal Ceoil aghaidh a thabhairt air seo.
Tá trí dhámhachtain ar leith sa Scéim caipitil a chuireann maoiniú ar fáil chun uirlisí ceoil a cheannach do thaibhghhrúpaí agus do cheoltóirí aonair ag caighdeán taibhithe ghairmiúil. I mbliana, tá dámhachtain ar fáil go sonrach do cheoltóirí gairmiúla atá ag teacht chun cinn.
Ag labhairt faoi na dámhachtainí seo, dúirt an tAire Martin:
“Rachaidh babhta 2021 den Scéim um Chaipiteal Ceoil chun tairbhe an oiread sin eagraíochtaí agus daoine aonair ar fiú go mór cuidiú leo, díreach mar a rinneadh ó seoladh ar dtús é breis is deich mbliana ó shin. Féachaim ar an Scéim Caipitil seo mar cheann dár bpríomhthionscnaimh mhaoinithe agus gabhaim buíochas ó chroí le Music Network as an Scéim seo a bhainistiú.
“Dearadh an Scéim um Chaipiteal Ceoil chun freagairt do raon leathan riachtanais chaipitiúla laistigh d’earnáil an cheoil in Éirinn. Mar iarmhúinteoir ceoil, tá a fhios agam cé chomh tábhachtach agus atá uirlisí ceoil ar ardchaighdeán do go leor bannaí agus grúpaí a sheinneann ina bpobail áitiúla ar fud na tíre. Gach bliain déantar maoiniú a imfhálú do roinnt contaetha agus i mbliana tugadh tús áite do chontaetha Dhún na nGall, Chill Chainnigh agus Shligigh do mhaoiniú €34,500.
“Is ábhar misnigh freisin é 26 ceoltóir gairmiúil cumasach a fheiceáil ag baint leasa as an Scéim, go háirithe naonúr ceoltóirí atá ag teacht chun cinn a bheidh ag fáil cúnaimh chun uirlisí agus trealamh a cheannach thar go leor seánraí, a thacóidh iad ina ngairmeacha ar feadh na mblianta fada."