Fógraítear faighteoirí an Scéim Tacaíochta um Gheilleagar Oíche

• iarratais tuaithe i leathchuid de na hiarratais a fuair maoiniú
• cruthaíodh na mílte lá fostaíochta taibhithe

Inniu d’fhógair an tAire Turasóireachta, Cultúir, Ealaíon, Gaeltachta, Spóirt agus Meán, Catherine Martin, faighteoirí maoiniú €4 mhilliún chun siamsaíocht seachbhuaice a chur chun cinn inár mbailte agus inár gcathracha. Tairgeadh maoiniú do 433 eagraíocht san iomlán ón Scéim Tacaíochta um Gheilleagar Oíche. Fuarthas iarratais ó raon leathan ionad lena n-áirítear tithe tábhairne, clubanna oíche, caiféanna, amharclanna, ionaid ealaíon, gailearaithe, músaeim agus asraonta miondíola.

Léiríodh spéis mhór sa Scéim Phíolótach seo, agus cuireadh breis is 470 iarratas cruthaitheach agus éagsúil isteach lena mbreithniú, rud a léirigh toilteanas earnáil an gheilleagair oíche a bheith nuálaíoch agus cruthaitheach ina gcuid tairiscintí. Ceadaíodh breis is 2,000 imeacht i ngach contae ar fud na tíre le haghaidh maoinithe, agus tá ceol beo, ó cheol traidisiúnta go ceol leictreonach, oícheanta DJ, drámaíocht, greann, damhsa, litríocht, taispeántais ealaíne agus grianghrafadóireachta i measc na n-imeachtaí sin.

Áiríodh sa Scéim sraith maoinithe faoi leith d’áitribh neamhcheadúnaithe ar nós caiféanna, beáir nach ndíoltar alcól iontu agus ionaid oiriúnacha eile chun tacú le héagsúlú agus cuimsitheacht inár nGeilleagar Oíche. Bronnadh maoiniú níos mó ná €434,000 ar chaiféanna agus áitribh neamhcheadúnaithe.

Tacaíodh freisin le hionaid i mbailte agus i sráidbhailte tuaithe agus bronnadh maoiniú ar 252 ionad lasmuigh dár gcathracha.

Is foinse thábhachtach fostaíochta é an ciste d’ealaíontóirí agus do thaibhithe ar fud na tíre agus chruthaigh an Scéim na mílte lá fostaíochta.

Dúirt an tAire Martin:

Foilsíodh Tuarascáil an Tascfhórsa um Gheilleagar Oíche ar an 15 Meán Fómhair 2021.

Mhol an Tascfhórsa gur cheart scéim nua a fhorbairt chun tacú le hionaid, mar thithe tábhairne, caiféanna agus ionaid saor ó alcól, imeachtaí, gníomhaíochtaí agus tionscnaimh nua a thriail san oíche, le béim ar leith ar amanna seachbhuaice, chun éagsúlacht mhéadaithe tairiscintí siamsaíochta oíche a spreagadh, líon na ndaoine a théann isteach inár mbailte agus ár gcathracha um thráthnóna a mhéadú agus fostaíocht a chruthú d'ealaíontóirí/taibheoirí, le béim ar leith ar ghníomhartha nua agus atá ag teacht chun cinn. Aithníodh i dTuarascáil an Tascfhórsa freisin go raibh gá le héagsúlú méadaithe agus cuimsitheacht a bheith inár nGeilleagar Oíche agus go gcinntíonn cothromaíocht idir gníomhaíochtaí saor ó alcól agus le halcól gur féidir le déimeagrafach níos leithne taitneamh a bhaint as an nGeilleagar Oíche. D’fhorbair an Roinn an scéim i gcomhairle le raon leathan páirtithe leasmhara lena n-áirítear Cumann na bhFíoncheannaithe Ceadúnaithe, Cónaidhm Fíoncheannaithe na hÉireann, Cónaidhm Gnólachtaí agus Fostóirí na hÉireann, Cumann Bialainne na hÉireann agus Give Us The Night.

Glacadh le hiarratais faoi dhá snáithe ar leith:

Snáithe A: Áitribh cheadúnaithe – tithe tábhairne, bialanna agus beáir fíona, clubanna oíche agus áitribh cheadúnaithe oiriúnacha eile a fheidhmíonn sa Gheilleagar Tráthnóna agus Oíche, ar mhaith leo triail a bhaint as sraith imeachtaí/gníomhaíochtaí cultúrtha (ceithre imeacht ar a laghad) le linn uaireanta seachbhuaice ón Luan go Déardaoin (gan an deireadh seachtaine san áireamh) ó 6 i.n. ar aghaidh.

Snáithe B: Áitribh neamhcheadúnaithe – caiféanna, lena n-áirítear caiféanna a bhféadfadh a n-áitreabh a bheith acu in asraon miondíola, beáir gan alcól, gailearaithe áitiúla agus áitribh neamhcheadúnaithe oiriúnacha eile, ar mhaith leo triail a bhaint as sraith imeachtaí/gníomhaíochtaí cultúrtha (ceithre imeacht ar a laghad) níos déanaí sa tráthnóna nó oíche ó 6 i.n., agus gealltanas á thabhairt a bheith ar oscailt go 9 i.n. sa tráthnóna ar a laghad, ón Luan go Domhnach.

Feidhmíodh an scéim seo le ciste teoranta €4 mhilliún. Chuir an scéim 75% den mhaoiniú riachtanach ar fáil, agus bhí ar iarratasóirí an 25% eile a mhaoiniú. Bhí uasdeontas incheadaithe €10,000 in aghaidh an ghnólachta nó an ionaid ar fáil. Bhí sé mar choinníoll maoinithe go n-íocfaí gach ealaíontóir agus taibheoir.

Glacadh le hiarratais ar an Scéim go dtí 4 Lúnasa. Fuarthas 472 iarratas ar mhaoiniú san iomlán. Bronnadh maoiniú ar níos mó ná 2,000 imeacht.

Blaiseadh de na himeachtaí:

• leithdháileadh maoiniú ar chlub oíche The Factory i bPort Láirge le haghaidh roinnt imeachtaí ceoil leictreonaigh seachbhuaice i rith mhí Dheireadh Fómhair
• in Tramline i mBaile Átha Cliath óstáladh oícheanta rince le ceathrar DJ iomráiteach gach Céadaoin i mí Mheán Fómhair
• bhí sraith imeachtaí ar siúl in THE OL' 55 i gCathair na Gaillimhe, i mí Dheireadh Fómhair, a dhírigh ar bhan-thaibheoirí ón bpobal atá lonnaithe i gCathair na Gaillimhe
• Baggotonia – i roinnt tithe tábhairne ar Shráid Bhagóid rinneadh ceiliúradh ar an stair liteartha agus ar na pearsana liteartha cáiliúla a bhain leis na hionaid ar an tsráid seo trí thaibhithe amharclainne le linn na míosa
• Reáchtáil Amharclann agus Ionad Ealaíon Bhiorra “Mná sa Choiméide” - sraith oícheanta grinn ar an Déardaoin i mí Mheán Fómhair

I measc na n-imeachtaí gan cheadúnas, bhí:

• Windmill Lane Recording Studios, i measc na gceoltóirí bhí ‘The 4 of Us’, ealaíontóir LADTA ‘Tadhg’, amhránaí Bell X1, Paul Noonan agus iarracht nua Daithí Uí Dhrónaí, ‘House Plants’. Ar siúl go seachtainiúil i mí na Samhna 2022. Déanfar na himeachtaí seo a scannánú agus a phostáil ar na meáin shóisialta agus ar chainéal YouTube Windmill Lane Recording
• d’athraigh The Circus Factory i gCorcaigh a spás traenála rialta go hionad oíche dhéanach i mí Dheireadh Fómhair
• Reáchtáil Músaem Scríbhneoirí Chiarraí clár deich seachtaine de thaibhithe le roinnt de na healaíontóirí is fearr i gCiarraí, dar teideal “The Rambling Sessions”

The list of successful applicants is available in the document below.