Plean Teanga Limistéar Pleanála Teanga Árainn Mhór seolta ag an Aire Stáit Jack Chambers

Sheol an tAire Stáit don Ghaeilge Jack Chambers T.D. plean teanga limistéar pleanála teanga Árainn Mhór inniu, ag ócáid ar líne a d’eagraigh Comharchumann Oileán Árainn Mhór, ceanneagraíocht an limistéir. Eagraíodh an ócáid seo chun aird an phobail a tharraingt ar chur i bhfeidhm an Phlean Teanga agus chun aitheantas a thabhairt don obair atá bainte amach ag an bplean, atá á gcur i bhfeidhm le breis is bliain anuas, go dáta.

Is é Árainn Mhór an chéad oileán Ghaeltachta a bhfuil plean teanga ina leith seolta agus shocraigh an ceanneagraíocht físeán a thaifead faoina gcuid oibre sa limistéar agus bheidh le feiceáil ar mheáin shóisialta na heagraíochta.

Agus é ag labhairt i dteachtaireacht a thaifead sé don ócáid, dúirt an tAire Stáit:

“Ba mhaith liom tréaslú le Comharchumann Oileán Árainn Mhór Teo, an ceanneagraíocht a d’ullmhaigh an phlean faoi stiúir Nóirín Ní Mhaoldomhnaigh agus le Fiona Ní Ghloinn, an t-oifigeach pleanála teanga atá fostaithe chun é a chur i bhfeidhm ar an oileán. Tuigim go bhfuil ag éirí go maith leis an obair atá déanta faoin bplean cheana féin agus táim cinnte go rachaidh sé ó neart go neart. Is léir go bhfuil pobal gníomhach atá tiomanta don teanga in Árainn Mhór agus ba mhaith liom mo chomhghairdeas a ghabháil le gach aon duine a raibh baint acu leis an bpróiseas.”

Dúirt an tAire Turasóireachta, Cultúir, Ealaíon, Gaeltacht, Spóirt agus Meán Catherine Martin:

“Is céim thábhachtach chun cinn í seo don oileán agus don phróiseas pleanála teanga trí chéile. Is ábhar misnigh dom é go bhfuil an oiread dul chun cinn déanta leis an bpróiseas pleanála teanga le déanaí. Aithním, ar ndóigh, na dúshláin a bhaineann lena bheith ag maireachtáil ar oileán agus sa chomhthéacs sin ba mhaith liom an éacht atá bainte amach ag pobal an oileáin i dtaobh an phlean seo, a thréaslú leo. Táim cinnte go mbeidh dea-thionchar ag cur i bhfeidhm an phlean seo ar labhairt agus nósmhaireacht na Gaeilge ar Árainn Mhór agus go mbeidh a thoradh le feiceáil i gcaitheamh ama, agus guím gach rath ar an obair.”

Nóta don Eagarthóir

• Den 26 Limistéar Pleanála Teanga Gaeltachta (LPT), tá 21 limistéar ceadaithe go dáta faoin bpróiseas agus pleananna teanga do na ceantair sin á gcur i bhfeidhm go háitiúil dá réir, Tá 4 phlean á mheas ag an Roinn agus ceann amháin eile le cur faoi bhráid na Roinne i gcónaí (An Ghaeltacht Láir)

• Tá 22 Oifigeach Pleanála Teanga fostaithe sna LPT (18 nOifigeach Pleanála Teanga agus 4 Oifigeach Pleanála Teanga Cúnta)

• Tá 3 Líonra Gaeilge ceadaithe go nuige seo faoin bpróiseas – Inis, Baile Loch Riach agus Cluain Dolcáin.

• Tá 2 Baile Seirbhíse Gaeltacht ceadaithe go dáta faoin bpróiseas – Daingean Uí Chúis agus Leitir Ceanainn. Ina theannta sin, tá dhá phlean á mheas ag an Roinn faoi láthair – Cathair na Gaillimhe agus An Clochán Liath.

Tá tuilleadh sonraí ar fáil faoin bpróiseas pleanála teanga a ar fáil ag:

https://www.gov.ie/ga/foilsiuchan/an-proiseas-pleanala-teanga/