Na Rialacháin maidir le hAthléimneacht Eintiteas Criticiúil

I mí Dheireadh Fómhair 2024, shínigh an tAire Cosanta Rialacháin an Aontais Eorpaigh (Athléimneacht Eintiteas Criticiúil), 2024 (I.R. Uimh. 559 de 2024). Leis na rialacháin seo, déantar Treoir (AE) 2022/2557 maidir le hathléimneacht eintiteas criticiúil a thrasuí.

Cuid dár n-iarracht chun cur le hathléimneacht seirbhísí riachtanacha a chomhlíonann feidhmeanna ríthábhachtacha sa tsochaí in Éirinn atá sna Rialacháin maidir le hAthléimneacht Eintiteas Criticiúil. Bainfidh na rialacháin leis na hearnálacha seo a leanas den gheilleagar: fuinneamh, iompar, baincéireacht, bonneagar an mhargaidh airgeadais, sláinte, uisce óil, fuíolluisce, bonneagar digiteach, riarachán poiblí, spás, agus táirgeadh, próiseáil agus dáileadh bia ar mhórscála.

Ceanglas bunriachtanach atá ann faoi na Rialacháin ná go bhfoilseoidh an tAire Cosanta Straitéis Náisiúnta maidir le hAthléimneacht Eintiteas Criticiúil. Cuid den obair a bhí ann leis an Straitéis Náisiúnta ná an plé le príomhpháirtithe leasmhara, na húdaráis inniúla do gach earnáil ina measc. Sa straitéis seo, leagtar amach an creat rialachais, na critéir chun eintitis chriticiúla a aithint, na hoibleagáidí sonracha a bhíonn le comhlíonadh acu agus na bearta chun an athléimneacht a threisiú, an méid sin bunaithe go háirithe ar mhalartú faisnéise níos éifeachtaí agus ar chomhar níos fearr idir an earnáil phoiblí agus an earnáil phríobháideach. Ina theannta sin, b’éigean don Roinn Cosanta, faoi na Rialacháin, tabhairt faoi mheasúnú riosca breisithe náisiúnta chun gur fearr a bheifí in ann eintitis chriticiúla a shainaithint.

Tugtar ainmneacha na nÚdarás Inniúil atá freagrach as gach ceann den 11 earnáil sa tábla thíos. Tá níos mó ná an t-aon Údarás Inniúil i gceist in earnálacha áirithe. Déanann eagraíochtaí éagsúla maoirseacht ar fho-earnálacha áirithe uaireanta mar gheall ar chineál agus castacht na seirbhísí lena mbaineann

An Pointe Teagmhála Aonair a bheidh ann maidir le Treoir CER i gcás na hÉireann ná an Oifig Pleanála Éigeandála sa Roinn Cosanta. Is féidir dul i dteagmháil leis an Oifig ach scríobh chuig cer@defence.ie

Tá Straitéis Náisiúnta na hÉireann maidir le hAthléimneacht Eintiteas Criticiúil (2026–2029) foilsithe ag an Aire Cosanta, saothar atá curtha ar fáil tar éis don Roinn Cosanta dul ag obair leis na hÚdaráis Inniúla agus Ranna Rialtais cuí.

Tugtar cuntas sa Straitéis ar na bealaí a ndéanfar a chinntiú, má bhíonn teagmhais ann a chuirfeadh isteach ar sheirbhísí riachtanacha, go mbeidh eintitis chriticiúla in 11 earnáil in Éirinn in ann a leithéid a sheasamh, dul in oiriúint dóibh agus teacht ar ais ina ndiaidh.

• An creat rialachais d'fhonn athléimneacht a bhaint amach
• Na critéir chun eintitis chriticiúla a aithint
• Na hoibleagáidí faoi leith a bhíonn le comhlíonadh ag na heintitis sin
• Na bearta a theastaíonn chun athléimneacht a threisiú

Is iad seo a leanas spriocanna na straitéise:

1. An Measúnú Riosca Náisiúnta a fheabhsú: Cur leis an modheolaíocht atá leagtha síos againn don Mheasúnú Riosca Náisiúnta chun ceanglais na rialachán a shásamh, sainaithint seirbhísí riachtanacha an stáit ina measc.
2. Rialachas agus Comhordú a dhaingniú: Creat rialachais agus comhordaithe d'athléimneacht Eintiteas Criticiúil a chur i bhfeidhm.
3. Athléimneacht a fheabhsú: Feabhsuithe oiriúnacha comhréireacha a spreagadh in athléimneacht na seirbhísí riachtanacha a chuireann Eintitis Chriticiúla shainaitheanta ar fáil.
4. Maoirseacht Straitéiseach a threisiú: Forbairt a dhéanamh ar mhaoirseacht straitéiseach na Roinne Cosanta ar spleáchais ó thaobh bonneagar criticiúil de i ngach earnáil atá faoinár gcúram.
5. Comhsheasmhacht a chinntiú ó thaobh Cibearshlándála de: Cur chuige comhsheasmhach a chinntiú sa Roinn Cosanta i leith athléimneacht Eintiteas Criticiúil agus comhsheasmhacht leis an gcur chuige náisiúnta i leith na cibearshlándála a chinntiú, feidhmiú na Treorach maidir le Slándáil Líonra agus Faisnéise (NIS 2) san áireamh.

Tugtar faoin Measúnú Riosca Náisiúnta gach 3 bliana, ar ceanglas é sin i gCinneadh Uimh. 1313/2013/AE ó Pharlaimint na hEorpa agus ón gComhairle. Tugann an Oifig Pleanála Éigeandála faoin Measúnú Riosca i gcomhairle le gach roinn agus gníomhaireacht rialtais. Is é Tascfhórsa an Rialtais um Pleanáil Éigeandála a dhéanann é a cheadú.

Tá próiseas an Mheasúnaithe Riosca Náisiúnta leasaithe chun dáta lena chinntiú go bhfuil sé ag teacht le ceanglais Rialacháin an Aontais Eorpaigh (Athléimneacht Eintiteas Criticiúil), 2024.