Gairmeacha

Tá Oifig an Phríomh-Aturnae Stáit bródúil as deis iontach a thairiscint duit chun dul le ceann de na hoifigí dlí is mó sa tír. Cé acu an aturnae nuacháilithe thú a bhfuil fonn ort do ghairm bheatha dlí a thosú, an aturnae seanbhunaithe thú ar mian leat athrú a dhéanamh ó dhinimic an chleachtais phríobháidigh, nó an gairmí thú ó réimse gaolmhar, soláthróimid ardán eisceachtúil le haghaidh fáis, forbairt ghairmiúil agus obair fhiúntach a théann i bhfeidhm ar an náisiún iomlán.

Earcaímid thar chúig phríomhréimse:

• Aturnaetha cáilithe
• Aturnaetha faoi oiliúint
• Feidhmeannaigh dlí
• Speisialtóirí ó ghairmeacha ar nós TFC, bainistíocht taifead, bainistíocht faisnéise agus eolais, acmhainní daonna, agus airgeadas
• Foireann riaracháin ag gach grád ginearálta státseirbhíse

Fógraítear folúntais ar an leathanach Earcaíocht ar ár suíomh gréasáin agus tríd an tSeirbhís um Cheapacháin Phoiblí, agus bíonn earcaíocht ar siúl le linn na bliana. Fiú má chailleann tú folúntas ar leith, molaimid duit ár suíomh gréasáin agus an tSeirbhís um Cheapacháin Phoiblí a sheiceáil go rialta le haghaidh deiseanna amach anseo.

B’fhéidir nach n-oireann OPAS duit inniu, ach b’fhéidir go mbeadh sé foirfe duit amach anseo. Lena chinntiú go n-éireoidh le d’iarratas, tá ullmhúchán maith riachtanach, go háirithe mar go n-earcaímid trí phróiseas iarratais agus agallaimh atá bunaithe ar inniúlacht – formáid a d’fhéadfadh a bheith nua do roinnt daoine.

Cuirtear rogha uathúil ar an gcleachtas príobháideach ar fáil trí oibriú le OPAS. Tugann sé deis dhifriúil d’aturnaetha chun díriú ar sheirbhísí dlí ar ardchaighdeán a sholáthar do chliant suntasach amháin: Rialtas na hÉireann. Tá ár gcliant roinnte ar fud ranna agus eagraíochtaí iomadúla, rud a chuirfidh ar do chumas oibriú i réimse leathan d’obair dlí a théann i bhfeidhm go díreach ar rialachas agus ar bheartas poiblí an náisiúin. Mar gheall ar chastacht agus íogaireacht na gcúrsaí dlí a ndéileálaimid leo beidh do chuid oibre ina hobair ardphróifíle go minic agus beidh tionchar díreach aici ar an tsochaí.

I gcás dlíthithe, is éard atá i gceist leis sin ná go mbeidh tú i láthair san Ard-Chúirt, sa Chúirt Achomhairc, agus sa Chúirt Uachtarach go minic áit mbeidh tú ag obair ar na cásanna is suntasaí sa lá, ag múnlú thírdhreach dlíthiúil na hÉireann. Tá ár n-oifig lonnaithe in aice le hionad na gCeithre Cúirteanna, áit fhoirfe chun dul i mbun na n-imeachtaí suntasacha dlí sin. Déanaimid ionadaíocht freisin d’Éirinn go hidirnáisiúnta os comhair an CBAE i Lucsamburg.

Dóibh siúd a bhfuil baint acu le hobair chomhairleach, braitheann ranna rialtais ar shainchomhairle OPAS chun a mbealach a dhéanamh trí dhúshláin chasta dlí. Beidh ról ríthábhachtach agat maidir le beartas poiblí a threorú trí do chomhairle dlí, ag cinntiú go mbeidh an Stát ábalta déileáil le saincheisteanna dlí atá ag teacht chun cinn. I gcás tíolacóirí, cuireann OPAS an deis ar fáil chun oibriú ar idirbhearta maoine ar mhórscála, lena n-áirítear punann ollmhór an Stáit a bhainistiú trí Oifig na nOibreacha Poiblí.

Nuair a théitear le OPAS, tugtar deis freisin chun dul i mbun cúrsaí dlí ar an leibhéal náisiúnta, leibhéal an Aontais Eorpaigh agus an leibhéal idirnáisiúnta, ag déanamh ionadaíochta d’Éirinn i gcúrsaí dlíthiúla nach bhfuil ar fáil i gcleachtas príobháideach. Beidh tú páirteach i múnlú an dlí agus cuirfidh tú le forbairtí dlí sa bhaile agus go hidirnáisiúnta.

Aithníonn OPAS an tábhacht a bhaineann le sásamh as post d’Oifigigh agus an tionchar dearfach a d’fhéadfadh a bheith aige sin ar fholláine Oifigigh. Cuirimid timpeallacht oibre chomhoibríoch, oscailte agus chairdiúil chun cinn lena n-éascaítear cleachtais oibre éifeachtacha. Cuireann OPAS tacaíochtaí éagsúla ar fáil chun é sin a bhaint amach, lena n-áirítear:

• Deiseanna Oibre Cumaisc: D’fhéadfaí iarratais ar obair chumaisc a éascú, beidh gá freastal ar an oifig corruair i ngach ról de réir na riachtanas gnó.
• Socruithe Roinnte Oibre: faoi réir tréimhse promhaidh shásúil agus riachtanais ghnó
• Réimse leathan roghanna saoire speisialta

Fás agus forbairt ghairmiúil mar aon le hiontráil dhíreach chuig gráid bhainistíochta aturnae

Táimid tiomanta do thacaíocht a thabhairt d’fhás agus d’fhorbairt ár n-aturnaetha, cé acu an bhfuil tú nuacháilithe nó i do chleachtóir seanbhunaithe. Tá cláir oiliúna oiriúnaithe, deiseanna forbartha gairmiúla leanúnaí, agus conairí ceannaireachta ar fad ina gcuid dár dtairiscint. I gcás aturnaetha sinsearacha, cuirimid deiseanna iontrála dírí ar fáil chun foirne a bhainistiú agus treo obair dhlíthiúil na hoifige a mhúnlú. Lenár dtimpeallacht éagsúil thacúil, is féidir le haturnaetha ó gach cúlra déanamh go maith, agus gairm bheatha shásúil agus thairbheach sa dlí a chinntiú.

Ag OPAS, beidh an deis agat oibriú le hábhair dhlí atá casta agus dúshlánach ón taobh intleachtúil, oibriú ar chásanna ardphróifíle, agus a bheith ar thús cadhnaíochta sa dlí poiblí, sa dlí tráchtála agus sa dlí rialála. Má tá ghairm sa dlí á lorg agat ina mbeidh tionchar inbhraite ag do chuid oibre, a chuireann le forbairt an dlí, agus a fhreastalaíonn ar leas an phobail, b’fhéidir gurb é OPAS an áit cheart duit.

Iarraimid ort iniúchadh a dhéanamh ar na deiseanna atá ar fáil le OPAS agus a bheith páirteach i bhfoireann atá tiomanta do thodhchaí an tírdhreacha dhlíthiúil a mhúnlú.

Mar aturnae faoi oiliúint le OPAS, tabharfar deis uathúil duit chun do chuid saineolais dlí a fhorbairt i dtimpeallacht inar féidir níos mó ná cleachtas príobháideach a thairiscint. Ón tús, beidh tú tumtha i raon éagsúil oibre dlí a bhfuil fíorthionchar aici ar fheidhmiú an Stáit, ag déileáil le cásanna a bhaineann go minic le dlí poiblí, dlí bunreachtúil, idirbhearta tráchtála, agus dlíthíocht. Ag OPAS, fiú mar dhuine faoi oiliúint, beidh tú i do chuid lárnach d’fhoirne a bheidh ag obair ar shaincheisteanna casta dlí a mbíonn tionchar acu ar bheartas náisiúnta agus ar rialachas poiblí. Beidh tú nochta go díreach do chásanna ardphróifíle lena múnlaítear an dlí ar na leibhéil is airde.

Chomh maith le taithí ar sheomra na cúirte, oibreoidh tú go dlúth le ranna rialtais freisin, ag tairiscint comhairle dlí straitéiseach ar shaincheisteanna ríthábhachtacha idir chreataí rialála agus léirmhíniú reachtaíochta. Leis an nochtadh sin, ní hamháin go méadóidh tú do thuiscint ar an dlí ach cuirfidh sé le do chumas freisin prionsabail an dlí a chur i bhfeidhm i gcomhthéacsanna dinimiciúla sa saol mar atá.

I do thréimhse mar dhuine faoi oiliúint, beidh tú treisithe ag clár meantóireachta struchtúrtha OPAS, mar a oibreoidh tú faoi threoir aturnaetha sinsearacha atá ina bpríomh-shaineolaithe ina réimsí. Leis an meantóireacht sin, mar aon le cláir oiliúna fhoirmiúla, cinnteofar go dtabharfar tacaíocht duit i ngach gné de d’fhorbairt ghairmiúil, idir bharrfheabhas a chur ar do scileanna dréachtaithe dlí agus mháistreacht a fháil ar abhcóideacht i seomra na cúirte.

Is é éiteas na seirbhíse poiblí an rud a idirdhealaíonn OPAS ón gcuid eile. Ní ag leasanna tráchtála a bheidh an obair a dhéanfaidh tú á spreagadh, ach ag an gcuspóir seirbhísí dlí ar ardchaighdeán a sholáthar a fhreastalaíonn ar leas an phobail. Beidh tú ag cur le cinntí dlíthiúla a théann i bhfeidhm ar shaol na saoránach, rud a thabharfaidh braistint chuspóra agus sásamh gairmiúil duit, rud nach dtairgtear ach i mbeagán ról. Ina theannta sin, cuireann OPAS nochtadh do chúrsaí dlí, ní hamháin ar an leibhéal náisiúnta ach laistigh den Aontas Eorpach agus ar an stáitse idirnáisiúnta freisin, rud a chuireann réimse leathan taithí ar fáil nach mbíonn ar fáil in áiteanna eile rómhinic. Faoi dheireadh do thréimhsí oiliúna, beidh bunús fíorluachmhar sa dlí bainte amach agat a chuirfidh ar do chumas gairm bheatha rathúil thairbheach a chruthú, agus beidh scileanna agus taithí atá fíor-uathúil agat.