Tacaíochtaí Fuinnimh

Má bhíonn deacracht agat do bhillí fuinnimh a íoc:

• Déan teagmháil le do sholáthraí fuinnimh ionas nach ndícheanglófar thú. Molfaidh an soláthraí plean aisíocaíochta duit. Is iomaí soláthraí atá cláraithe leis an gCód Energy Engage ina mbeidh réimse cosaintí ar fáil tar éis duit dul i mbun plé le do sholáthraí. Bíonn ciste cruatain á chur ar fáil ag soláthraithe áirithe freisin.

• Más custaiméir leochaileach thú, ba cheart duit dul i mbun plé le do sholáthraí toisc go mbeidh cosaintí breise agat ar dhícheangal.

• Má tá tú chun deiridh nó ag streachailt le fiacha fuinnimh, déan teagmháil leis an SBCA (an tSeirbhís Buiséadaithe agus Comhairle Airgid) www.mabs.ie nó cuir glao uirthi 0818 07 2000 Luan-Aoine 9am-8pm.

• Má tá tú os cionn 60 bliain d'aois agus tú imníoch faoi do bhillí fuinnimh, déan teagmháil le ALONE www.alone.ie.

Le haghaidh comhairle agus eolais maidir le do chearta mar thomhaltóir fuinnimh, déan teagmháil leis an gCoimisiún um Rialáil Fóntais (CRF) www.cru.ie.

Tuigeann an Rialtas go rímhaith na tionchair a bhíonn ag ardchostais fuinnimh ar theaghlaigh, daoine aonair agus gnólachtaí. Dá bhrí sin, tá réimse tacaíochtaí spriocdhírithe curtha ar fáil aige.

• Bíonn íocaíocht an Liúntais Breosla ina cabhair chun costais teasa baile a sheasamh sa gheimhreadh. Is féidir leat an liúntas a éileamh má tá tú os cionn 70 bliain d'aois nó má fhaigheann tú íocaíochtaí leasa shóisialaí nó liúntas cúramóra ar bhonn fadtéarmach. Má fhaigheann teaghlach an Íocaíocht do Theaghlaigh i bhFostaíocht cheana, gheobhaidh siad an liúntas breosla freisin ón 9 Márta 2026 ar aghaidh, a siardhátófar na híocaíochtaí ina leith go dtí an 1 Eanáir 2026. Má tá tú os cionn 66 bliain d'aois, d'fhéadfá a bheith incháilithe don liúntas breosla freisin. Tá an liúntas breosla méadaithe go dtí €38 in aghaidh na seachtaine ó bhí mí Eanáir 2026 ann. Faigh tuilleadh eolais ag gov.ie/FuelAllowance.

• Bíonn an Pacáiste Sochair Teaghlaigh ina chabhair chun billí leictreachais nó gáis a sheasamh agus cuirtear ceadúnas teilifíse saor in aisce san áireamh leis. Ní dhéantar tástáil acmhainne ina leith do dhaoine atá os cionn 70 bliain d'aois. Tá sé ar fáil do dhaoine atá faoi bhun 70 bliain d'aois freisin ar choinníoll go gcomhlíonann siad critéir áirithe amhail an Liúntas Míchumais, an Pinsean Easláine, Pinsean na nDall nó an Liúntas Cúramóra a (má tá an cúramóir in aontíos leis an gcleithiúnaí).

• Íocaíocht Riachtanas Breise – D'fhéadfá a bheith incháilithe don íocaíocht sin murab acmhainn duit costais ríthábhachtacha amhail billí leictreachais nó gáis. Déantar tástáil acmhainne i leith na híocaíochta sin atá faoi riar Sheirbhís Leasa Pobail na Roinne Coimirce Sóisialaí. Faigh tuilleadh eolais ag gov.ie/ANP.

• Íoctar forlíontaí an Liúntais Fhorlíontaigh Leasa (LFL) in aghaidh na seachtaine nó na míosa chun cabhrú le costais riachtanacha a sheasamh murab acmhainn duit iad le d'ioncam seachtainiúil. Má tá teas breise de dhíth ort de bharr drochshláinte nó éiglíochta, d'fhéadfá a bheith incháilithe don íocaíocht de réir tástáil acmhainne sin. Tabhair cuairt ar Forlíontaí an Liúntais Fhorlíontaigh Leasa.

• Bíonn an Deontas um Chúnamh Tithíochta do Dhaoine Scothaosta ina chabhair ag daoine scothaosta a bhfuil drochbhail ar a dteach chun íoc as aon deisiúchán nó feabhsúchán riachtanach. Is iad na húdaráis áitiúla a riarann an scéim.

• Bíonn uasghrádú fuinnimh baile a bhfuil maoiniú iomlán curtha ar fáil dóibh, ar fáil d'úinéirí tí a fhaigheann íocaíochtaí áirithe leasa. Faigh tuilleadh eolais anseo: Uasghrádú fuinnimh baile a bhfuil maoiniú iomlán curtha ar fáil dóibh agus deontais fuinnimh baile de chuid Údarás Fuinnimh Inmharthana na hÉireann (SEAI).

• Is féidir le húinéirí tí iasacht suas le €75,000 a fháil ag rátaí ísle úis faoi Scéim Iasachta Uasghrádaithe Fuinnimh Baile an Rialtais. Tacaíonn an scéim sin le daoine éifeachtúlacht fuinnimh a dtí a uasghrádú le conraitheoir faofa de chuid an SEAI.

• Tionscnamh spriocdhírithe is ea an Scéim um Painéil Fhótavoltacha Gréine do Chustaiméirí ina bhFuil Leochaileacht Leighis, d'fhonn tacú le suiteáil painéal fótavoltach (FV) gréine ar thithe inar cláraíodh an teaghlach i gcatagóir na tacaíochta beatha ar Chlár na Seirbhísí Tosaíochta. Faigh tuilleadh eolais: an Scéim um Painéil Fhótavoltacha Gréine do Chustaiméirí ina bhFuil Leochaileacht Leighis.

Tá tuilleadh eolais maidir le scéimeanna agus seirbhísí leasa shóisialaigh Rialtas na hÉireann ar fáil anseo.