Chomhairliúcháin: Sparán Digiteach Rialtais

Is é cuspóir an chomhairliúcháin seo aiseolas a lorg ó pháirtithe leasmhara, ó shaineolaithe tionscail agus ón bpobal i gcoitinne maidir leis an Sparán Digiteach Rialtais.

Tá an Roinn Caiteachais Phoiblí, Bonneagair, Athchóiriúcháin agus Digitiúcháin na Seirbhíse Poiblí freagrach as forbairt theicniúil an Sparáin Dhigitigh.

Tá an Sparán Digiteach Rialtais ina phríomhchuid de bhonneagar poiblí digiteach na hÉireann atá ag teacht chun cinn mar chuid den Phlean um Sheirbhísí Poiblí Digiteacha 2030. Mar bhloc tógála, éascófar leis digitiú seirbhísí poiblí trí bhealach slán, áisiúil a sholáthar do dhaoine chun dintiúir dhigiteacha fhíoraithe a stóráil agus a úsáid trí fheidhmchlár móibíleach atá nasctha lena gcuntas MyGovID.

Le Sparán Digiteach an Rialtais soláthraítear modh sábháilte, iontaofa agus príobháideach chun doiciméid dhigiteacha thábhachtacha a stóráil agus a roinnt agus rochtain á fáil ar thacaíochtaí agus ar sheirbhísí.

Ní dhéanfaidh an rialtas aon chuid de do shonraí pearsanta a rianú ná a thaifeadadh. Is tusa an t-aon duine amháin a fheicfidh do shonraí pearsanta, atá stóráilte go slán ar d’fhón póca.

Le reachtaíocht nua an Aontais ceanglaítear ar gach ballstát den Aontas Eorpach sparán slán aitheantais dhigitigh a thabhairt isteach. Tá sparáin dhigiteacha in úsáid cheana féin i roinnt dlínsí eile agus is féidir foirmeacha éagsúla doiciméad a bheith iontu, amhail ceadúnas tiomána.

Ní mór do Sparán Digiteach an Rialtais ceanglais theicniúla, slándála, idir-inoibritheachta agus deimhniúcháin an Aontais a chomhlíonadh agus cé go bhfuil a eisiúint deonach do shaoránaigh, tá sé éigeantach don Stát a leithéid a sholáthar.

Tá freagracht ar an Roinn Cultúir, Cumarsáide agus Spóirt as Rialachán (AE) 910/2014 a chur chun feidhme arna leasú le (AE) 2024/1183 ar a dtugtar eIDAS 2 i dteannta a chéile lena gceanglaítear sparán Eorpach Céannachta Digití (EUDI). Ba cheart go mbeadh sé ar fáil i ngach Ballstát, ionas gur féidir le saoránaigh é a úsáid chun iad féin a fhíordheimhniú, dintiúir phearsanta a stóráil, faisnéis fhíoraithe a roinnt thar theorainneacha agus a shíniú le bailíocht dhlíthiúil.

Is é an Roinn Coimirce Sóisialaí úinéir scéim aitheantais MyGovID, lena gcuirtear bealach slán cruthaithe ar fáil chun rochtain shlán a fháil ar an sparán ar bhealach a chomhlíonfaidh na ceanglais ábhartha uile faoin Rialachán eIDAS 2.

Tá sé i gceist go dtosóidh glacadh éigeantach ag comhlachtaí poiblí faoi dheireadh 2026 agus ag soláthraithe seirbhíse príobháidí a dhéanann fíordheimhniú láidir custaiméara (mar shampla, bainc agus soláthraithe seirbhísí íocaíochta) faoi dheireadh 2027.

Féadfaidh soláthraithe seirbhíse príobháideacha eile a roghnú tacú le sparáin EUDI chun rochtain a fháil ar a gcuid seirbhísí agus chun dintiúir phearsanta a roinnt.

Tá obair ar bun chun reachtaíocht eIDAS 2 a chur chun feidhme agus chun an rialachas agus an mhaoirseacht rialála is gá a bhunú le haghaidh Eisiúint Sparáin EUDI in Éirinn.

Nuair a sheoltar an sparán go hoifigiúil don phobal, táthar ag súil go dtacóidh an sparán le raon leathan doiciméad digiteach ar fud earnálacha amhail taisteal, oideachas, sláinte agus baincéireacht i measc earnálacha eile. Leis sin déanfar sruthlíniú ar an gcaoi a bhfaigheann daoine aonair rochtain ar sheirbhísí poiblí agus éascófar leis comhtháthú níos fearr ar sheirbhísí ar fud an rialtais.

Braithfidh tabhairt isteach na feidhmiúlachta sin ar chuimsiú na bhforálacha dlí riachtanacha sa reachtaíocht náisiúnta, go háirithe an reachtaíocht eIDAS atá le teacht, faoi stiúir na Roinne Cultúir, Cumarsáide agus Spóirt.

Leis an gcomhairliúchán agus leis an tástáil cuirtear ar chumas an phobail páirt a ghlacadh chun tuiscint a fháil ar a bhfuil ón Sparán Digiteach Rialtais ag teastáil ón bpobal. Is féidir linn aiseolas a bhailiú freisin faoin gcaoi ar mhaith leis an bpobal é a úsáid agus faoi chuid dá fheidhmiúlachtaí a thástáil chun bonn eolais a chur faoin bhforbairt theicniúil agus faoin obair reachtach.

Baineann sé seo le seirbhísí poiblí níos fearr: Tá an Sparán Digiteach Rialtais bunaithe ar thionscnamh uile-AE atá ceaptha chun feabhas a chur ar an gcaoi a n-idirghníomhaíonn daoine le seirbhísí agus a n-úsáideann siad iad ar bhealach inrochtana.

Baineann sé seo le smacht úsáideora: Cuirfidh an Sparán Digiteach Rialtais ar do chumas faisnéis thábhachtach fút a iarraidh, a stóráil agus a chomhroinnt ar bhealach slán atá go hiomlán faoi do smacht.

Baineann sé seo le saol níos simplí: Is seirbhís é an Sparán Digiteach Rialtais a chuireann ar do chumas doiciméid oifigiúla a stóráil go digiteach agus iad a chur isteach go héasca agus tacaíochtaí agus seirbhísí á rochtain agat.

Is féidir le mórimeachtaí saoil amhail breith linbh nó bás duine muinteartha a bheith an-ghnóthach agus dian ó thaobh mothúchán de. Ba cheart nósanna imeachta riaracháin a dhéanamh chomh héasca agus is féidir ionas gur féidir le daoine díriú ar an rud is tábhachtaí dóibh.

Ba mhaith linn Sparán Digiteach Rialtais a thógáil a bhfuil muinín ag daoine as agus atá luachmhar dóibh. Chun é sin a dhéanamh, ní mór dúinn tuiscint a fháil ar a bhfuil daoine ag súil leis, ar na ceisteanna a d’fhéadfadh a bheith acu agus ar an gcaoi ar féidir linn an sparán a mhíniú go soiléir, go háirithe ós rud é go mbeidh úsáid an sparáin deonach. Chun tacú le forbairt chlár Sparán Digiteach an Rialtais, lena n-áirítear reachtaíocht a dhréachtú agus a leathadh amach, ba mhaith linn cloisteáil uait.

Snáitheanna 1 agus 2

Tá comhairliúchán poiblí ar bun faoi láthair chun tuairimí a bhailiú faoin Sparán Digiteach Rialtais. I dteannta comhairliúcháin spriocdhírithe ar líne le heagraíochtaí páirtithe leasmhara, táimid ag tabhairt cuireadh do dhaoine den phobal a dtuairimí a roinnt.

Más mian leat aiseolas a thabhairt faoin Sparán Digiteach Rialtais, cliceáil ar an gcnaipe thíos chun suirbhé gearr a chomhlánú.

Comhroinn do thuairimí (an pobal i gcoitinne) | Gov.ie

Snáithe 3

Reáchtálfar ceardlanna le príomhchomhlachtaí páirtithe leasmhara freisin mar chuid den chomhairliúchán spriocdhírithe seo, agus féadfar na téamaí seo a leanas a chíoradh:

• inrochtaineacht agus míchumas
• daoine scothaosta agus cuimsiú digiteach
• leanaí agus i ndaoine óga
• rialachas sonraí agus príobháideachas
• teicneolaíocht, cearta digiteacha agus an tsochaí shibhialta
• rialtas oscailte agus trédhearcacht

Snáithe 4

Ar deireadh, tá an tástáil ríthábhachtach chun tacú le forbairt chlár an Sparáin Dhigitigh Rialtais. Cuirfidh sé oideachas ar an bpobal agus ar pháirtithe leasmhara eile maidir le luach, sábháilteacht agus oibriú an sparáin. Tabharfaidh sé deis freisin do dhaoine cur leis an dearadh deiridh agus le tosaíocht a thabhairt do dhintiúir amach anseo. Cuideoidh an tástáil le bonneagar agus sásraí tacaíochta an Sparáin Dhigitigh a bhrú chun a dteorainneacha.

Tá tuilleadh faisnéise faoin tástáil ar fáil anseo.

Is é 5pm an 24 Meitheamh 2026 an dáta deiridh a nglacfar le freagraí tríd an bhfoirm ábhartha Comhroinn do thuairimí.

Fáilte chuig an Sparán Digiteach
Rialtais An Sparán Digiteach Rialtais: Do cheisteanna freagartha