Tugann an tAire Dara Calleary nuashonrú maidir le Mo Chiste don Todhchaí

• Ardleibhéil Chlárúcháin Fostóirí do Mo Chiste don Todhchaí taifeadta ó seoladh é
• Cuireann Mo Chiste don Todhchaí costais an-iomaíocha ar fáil do rannpháirtithe
• Osclófar Tairseach na bhFostaithe ar Lá Caille
• Tugadh caighdeáin nua ranníocaíochta pinsin isteach le haghaidh díolúine ó Mo Chiste don Todhchaí

Inniu, d’fhógair an tAire Coimirce Sóisialaí, Dara Calleary, go bhfuil breis is 77,000 fostóir, agus thart ar 645,000 fostaí, cláraithe ar thairseach fostóra Mo Chiste don Todhchaí ón 1 Nollaig.

Ón 1 Eanáir, bainfidh fostaithe atá cláraithe i Mo Chiste don Todhchaí leas as bheith mar chuid de chóras coigiltis scoir d’ardchaighdeáin. Faoi Mo Chiste don Todhchaí, déanfar €7 de gach €3 a shábhálann an fostaí nuair a chuirtear a ranníocaíochtaí fostóra agus Stáit leis. Ansin, infheisteofar na cistí seo thar ceann an fhostaí i gcistí infheistíochta dea-rialaithe, rud a ghinfidh tuairisceáin bhreise agus a chruthóidh pota coigiltis scoir a bheidh inrochtana ar scor.

Costais Ísle Mo Chiste don Todhchaí

I bhfianaise scála Mo Chiste don Todhchaí, bainfidh fostaithe leas as táillí riaracháin agus bainistíochta infheistíochta an-íseal.

Socraítear an táille riaracháin ag 55 cent in aghaidh na seachtaine seachas céatadán de na ranníocaíochtaí a mhéadaíonn de réir mar a mhéadaíonn an coigilteas, agus ní bhainfidh an táille ach le ranníocaíochtaí gníomhacha.

Cinntítear leis sin nach laghdófar coigiltis scoir fostaithe a dhíliostáladh nó a chuir a rannpháirtíocht ar fionraí ar feadh tréimhse ama trí tháillí riaracháin a chur i bhfeidhm.

Ar leithligh, beidh na táillí bainistíochta infheistíochta díreach faoi bhun 0.04% de na sócmhainní faoi bhainistíocht ar an meán. Thar ghnáthshaolré plean coigiltis scoir d’fhostaí meánioncaim, bíonn na comhtháillí riaracháin agus bainistíochta infheistíochta faoi bhun sprioc 0.5% an Rialtais agus i bhfad níos ísle ná na rátaí atá coitianta i go leor scéimeanna coigiltis scoir phearsanta, a ghearrann 1% de shócmhainní agus 3–5% de ranníocaíochtaí go minic.

Solúbthacht Mo Chiste don Todhchaí

Tugann Mo Chiste don Todhchaí solúbthacht don fhostaí freisin chun díliostáil, agus a gcoigiltis a chur ar fionraí ar feadh tréimhse ama. Ciallaíonn an cur chuige ‘leanann pota comhalta’ go dtugann siad a gcoigiltis scoir ó phost go post gan aon íostréimhsí feithimh ná dílseacháin. Cinntíonn sé sin go mbeidh pota coigiltis scoir comhdhlúite aonair ag fostaithe nuair a shroicheann siad aois scoir in ionad pleananna scoir éagsúla carntha ó fhostaíochtaí éagsúla, gan aon bhearnaí de bharr athrú post.

Agus an dul chun cinn atá déanta ó osclaíodh an tairseach á thabhairt faoi deara aige, dúirt an tAire Dara Calleary –

“Tá freagra den scoth faighte ag seoladh thairseach fostóra Mo Chiste don Todhchaí. Tá 77,000 fostóir le 645,000 ball foirne cláraithe cheana féin agus tosóidh ranníocaíochtaí do na fostaithe seo ó dhátaí pá ag tosú an 1 Eanáir. Tabharfaidh sé seo rochtain do na fostaithe seo, chomh maith leis na go leor eile a bhfuiltear ag súil leo clárú idir seo agus Eanáir, ar scéim scoir cheirde ardchaighdeáin ar chostas íseal, leis an tsolúbthacht chun díliostáil, a ranníocaíochtaí a chur ar fionraí ar feadh tréimhse ama, agus a gcoigiltis scoir a thabhairt leo ó phost go post.”

Rochtain Fostaithe ar Mo Chiste don Todhchaí

Is é an chéad chéim eile i rolladh amach Mo Chiste don Todhchaí ná oscailt thairseach na bhfostaithe ar an 1 Eanáir. Ó lár mhí Eanáir, beidh fostaithe in ann a gcuid ranníocaíochtaí féin agus ranníocaíochtaí a bhfostóra agus an Stáit a fheiceáil ina gcuntas Mo Chiste don Todhchaí, nuair a bheidh siad bailithe agus próiseáilte ag an tÚdarás Náisiúnta um Uathrollú Coigiltis Scoir (NAERSA). Comh maith leis sin, beidh fostaithe in ann a bplean infheistíochta is fearr leo a roghnú, tuairisceáin infheistíochta a mhonatóiriú agus roghanna a fheidhmiú chun díliostáil nó chun coigiltis a chur ar fionraí.

Caighdeáin maidir le Díolúine ó chlárú i Mo Chiste don Todhchaí

Chun teacht le hoscailt thairseach na bhfostaithe, shínigh an tAire Calleary ionstraim reachtúil inniu chun éifeacht a thabhairt do na caighdeáin díolúine arna gcinneadh ag NAERSA.

Leagtar amach sna caighdeáin seo, a forbraíodh tar éis dul i gcomhairle leis an Údarás Pinsean, na híoscheanglais ranníocaíochta a chaithfidh scéimeanna pinsean ceirde a chomhlíonadh má tá rannpháirtíocht sna scéimeanna seo le húsáid mar bhonn le díolúine a éileamh ó chlárú i Mo Chiste don Todhchaí.

Cinntíonn na caighdeáin go bhfuil socruithe pinsin lasmuigh de Mo Chiste don Todhchaí chomh fabhrach don fhostaí rannpháirteach agus a bheadh siad faoi na rátaí ranníocaíochta tosaigh i Mo Chiste don Todhchaí.

I gcás scéim pinsin cheirde le ranníocaíochtaí sainithe, ceanglaítear leis na caighdeáin ranníocaíochtaí iomlána a bheith ar a laghad 3.5% de phá comhlán an fhostaí (faoi réir uasmhéid iomlán €1,200). As an méid sin, caithfidh ar a laghad 1.5% díobh a bheith íoctha ag an bhfostóir, chun go mbeidh an fhostaíocht díolmhaithe ó chlárú i Mo Chiste don Todhchaí.

I gcás scéimeanna sochair shainithe, sonraítear leis na caighdeáin go gceadóidh iad siúd a thugann sochar fadtéarmach bunaithe ar fhostaíocht leanúnach, go ndíolmhófar fostaíochtaí den sórt sin.

Agus an rialachán á shíniú aige, dúirt an tAire

Tá sé mar aidhm ag scéim Mo Chiste don Todhchaí clúdach a thabhairt d’fhostaithe nach bhfuil ina gcomhaltaí cheana féin de scéim cheirde urraithe ag fostóir – mar atá i gcás go leor fostaithe.

Nílimid ag iarraidh cur isteach ar aon scéimeanna seanbhunaithe, dea-dheartha agus ag feidhmiú go héifeachtúil. Mar sin féin, tá sé tábhachtach go gceadaíonn scéimeanna ceirde den sórt sin, chun cáiliú le haghaidh díolúine, go héifeachtach do rannpháirtithe coigiltis scoir leordhóthanacha a charnadh chun pinsean réasúnta a sholáthar le linn scoir. Sin é an fáth go bhfuil sé riachtanach caighdeáin díolúine a shocrú.

Ar dtús, socraítear na caighdeáin seo ar leibhéal measartha chun léiriú a dhéanamh ar thabhairt isteach céimnithe Mo Chiste don Todhchaí thar thréimhse 10 mbliana, agus táthar ag súil go gcomhlíonfaidh formhór mór na scéimeanna pinsin atá ann cheana na caighdeáin seo go héasca.”

Beidh sé mar thosaíocht ag NAERSA a chinntiú go gcomhlíonann aon scéim atá ag lorg díolúine ó Mo Chiste don Todhchaí na caighdeáin seo, seachas pionóis a ghearradh. Beidh measúnú ar leibhéil ranníocaíochta thar thréimhse trí mhí i gceist leis seo, rud atá mar bhunús freisin chun incháilitheacht do Mo Chiste don Todhchaí a chinneadh. Tá an tréimhse mheasúnaithe seo riachtanach ionas gur féidir an meánleibhéal ranníocaíochta a ríomh go cruinn agus tionchair shéasúracha, ragobair agus íocaíochtaí coimisiúin á gcur san áireamh.

Déanfar teagmháil le fostóirí scéimeanna a bhfuil ranníocaíochtaí acu faoi bhun an 3.5% sonraithe thar an tréimhse seo d’fhonn cabhrú leo a bheith comhlíontach. Mar sin féin, má leanann scéim fostóra de bheith faoi bhun an chaighdeáin agus mura bhfuil aon fhianaise ann go bhfuil an fostóir ag déanamh iarrachtaí iomchuí chun an caighdeán díolúine a chomhlíonadh nó chun ligean d’fhoireann clárú i Mo Chiste don Todhchaí, cuirfear cumhachtaí comhlíonta NAERSA faoi Chuid 9 den Acht um Chóras Uathrollaithe Coigiltis Scoir, 2024 i bhfeidhm.

Mhínigh an tAire,

"Nílim ag súil go dtiocfaidh an cás seo chun cinn go mór. Mar a léiríonn na leibhéil chlárúcháin go dtí seo, tá formhór mór na bhfostóirí i bhfabhar agus ag fáiltiú roimh thabhairt isteach Mo Chiste don Todhchaí.

Tá siad ar an eolas faoi thaithí thíortha ar nós na hAstráile agus na Ríochta Aontaithe, áiteanna inar measadh go han-dearfach rogha chláraithe uathoibríoch faoi úinéireacht an stáit. Mar shampla, sna tíortha sin, ní neamhghnách d’fhostóirí infhaighteacht an rogha chláraithe uathoibríoch a chur chun cinn mar phointe díola i bhfeachtais earcaíochta.

Mar sin féin, d fhoghlaimíomar gur iarr líon an-bheag fostóirí roinnt fostaithe, nach raibh ina gcomhaltaí de scéimeanna ceirde roimhe seo, a chlárú sna scéimeanna sin le ranníocaíocht ainmniúil amháin. Cé gur líon an-bheag é seo, ní cleachtas é nach féidir neamhaird a dhéanamh de mar go ndéanann sé, i ndáiríre, cosc a chur ar na fostaithe lena mbaineann rochtain a fháil ar phlean coigiltis scoir éifeachtach. Le hachtú na rialachán seo, cuirfear ar a gcumas d’oibrithe a bheith páirteach i scéim choigiltis scoir fhiúntach, trí scéim cheirde a gcuideachta féin nó trí Mo Chiste don Todhchaí.”

Forléargas

Is tionscnamh cinniúnach é Mo Chiste don Todhchaí, an córas coigiltis scoir uathrollaithe, a bhfuil sé mar aidhm leis cabhrú le thart ar 750,000 oibrí in Éirinn nach bhfuil rochtain acu ar phinsean oibre nó pearsanta faoi láthair, atá á n-íoc trí phárolla, chun tús a chur le hairgead a choigilt dá dtodhchaí. Tá bonn reachtach ag tacú le Mo Chiste don Todhchaí, Acht um Chóras Uathrollaithe Coigiltis Scoir, 2024.

Ón 1 Eanáir 2026, beidh rochtain ag fostaithe in Éirinn a chomhlíonann na critéir incháilitheachta ar scéim coigiltis scoir a bhfuil a n-incháilíocht dearbhaithe.

Riarachán

Tá Mo Chiste don Todhchaí deartha chun a chinntiú go mbeidh an córas simplí. Beidh formhór na hoibre riaracháin á dhéanamh go lárnach ag comhlacht nua atá bunaithe ar a dtugtar An tÚdarás Náisiúnta Coigiltis Scoir um Uathchlárú (NAERSA). Beidh NAERSA ag feidhmiú mar riarthóir Mo Chiste don Todhchaí agus beidh sé freagrach as:

• fostaithe incháilithe a aithint agus a chlárú
• iarratais roghnacha, rogha an diúltaithe agus fionraí a láimhseáil
• ranníocaíochtaí a bhailiú agus a infheistiú
• comhlíonadh na reachtaíochta a fhorfheidhmiú.

Éascóidh NAERSA tairseacha ar líne fostóra agus rannpháirtí agus soláthróidh sé ionad teagmhála do chustaiméirí chun cabhrú le fiosrúcháin.

Buntáistí fostóra

Tá roinnt buntáistí d’fhostóirí ag baint le Mo Chiste don Todhchaí. Ar an gcéad dul síos, tá Mo Chiste don Todhchaí deartha chun an obair riaracháin a bhaineann le pinsin atá le déanamh ag fostóirí a choinneáil chomh híseal agus is féidir de bhrí go ndéileálfaidh NAERSA le formhór na hoibre seo. Ciallaíonn sé sin gur rogha níos simplí é Mo Chiste don Todhchaí d’fhostóirí i gcomparáid le scéim pinsin gairme a sholáthar agus a riar.

• Tá rátaí ranníocaíochta á gcéimniú de réir a chéile sa chéad deich mbliana den scéim chun deis a thabhairt d’fhostóirí díriú ar chúrsaí buiséid.
• Ní ghearrfaidh NAERSA táille ar fhostóirí chun an obair riaracháin seo a chur i gcrích. Seachas sin, beidh NAERSA á mhaoiniú trí tháille rannpháirtí.
• Ciallóidh Mo Chiste don Todhchaí go mbeidh sé níos éasca d’fhostóirí a chinntiú go mbeidh soláthar airgeadais níos fearr ag a bhfostaithe dá scor, agus go bhféadfadh siad a mealltacht féin mar rogha fostóra a fheabhsú agus rátaí coinneála oibrithe luachmhara i margadh saothair iomaíoch a fheabhsú.

Buntáistí d’fhostaithe

Soláthróidh Mo Chiste don Todhchaí rochtain ar scéim coigiltis scoir a bhfuil a cáilíocht dearbhaithe do thart ar 750,000 fostaí nach mbeadh clúdach pinsin, seachas an Pinsean Stáit acu, murach é. Déileálfar le rollú ball foirne incháilithe go huathoibríoch, rud a chiallaíonn nach gá d’fhostaithe aon rud a dhéanamh chun tús a chur le hairgead a choigilt dá scor.

• Ráthaíonn Mo Chiste don Todhchaí ranníocaíochtaí meaitseála fostóra mar aon le breisiú a íoctar ag ráta €1 do gach €3 a íocann an fostaí.
• Tá na táillí agus na muirir don scéim an-íseal agus tá siad soiléir agus trédhearcach
• De bhrí go mbíonn na rannpháirtithe uile páirteach i straitéis infheistíochta réamhshocraithe atá á feidhmiú ar bhonn saolré e.g., riosca infheistíochta laghdaitheach de réir mar a bhíonn rannpháirtí ag dul níos gaire don aois scoir, ní gá cinntí airgeadais casta a dhéanamh chun ciste coigiltis scoir maith a fháil.
• Glacfar leis na coigiltis ar fad mar mhaoin phearsanta an rannpháirtí. Níl aon tréimhse dhílsithe ann, rud a chiallaíonn gur leis an rannpháirtí iad na ranníocaíochtaí a luaithe a fhaigheann NAERSA iad.

D’fhéadfadh tréimhse ama a bheith ann idir an uair a fheiceann fostaithe ranníocaíochtaí á n-asbhaint trína nduillín pá agus an uair a fheictear iad ar a bpainéal i dtairseach rannpháirtithe Mo Chiste don Todhchaí. Tá sé seo chun go mbaileofar, go bpróiseálfar, go gcomhthiomsófar agus go leithdháilfear na híocaíochtaí ranníocaíochta i gceart ar na bainisteoirí infheistíochta. Mura bhfeiceann fostaí na ranníocaíochtaí le feiceáil fós ar a dtairseach rannpháirtí Mo Chiste don Todhchaí tar éis 10 lá gnó óna lá pá, moltar dóibh teagmháil a dhéanamh le NAERSA.

Ranníocaíochtaí

Tosófar ag bailiú ranníocaíochtaí ón 1 Eanáir. Baileoidh NAERSA na ranníocaíochtaí fostóra agus fostaí ón bhfostóir agus an breisiú Stáit ina n-aonar. Ríomhtar ranníocaíochtaí bunaithe ar phá comhlán a thuairiscítear do na Coimisinéirí Ioncaim agus baintear iad ón nglanphá i ndiaidh asbhaintí.

Tá na rátaí ranníocaíochta sonraithe sa tábla thíos.

Fostaí Fostóir Luaigh

2026-28 1.5% 1.5% 0.5%

2029-31 3% 3% 1%

2032-34 4.5% 4.5% 1.5%

2035+ 6% 6% 2%

Teagmhálaithe agus Tuilleadh Eolais

Tá tuilleadh eolais maidir le Mo Chiste don Todhchaí ar fáil ag myfuturefund.ie nó www.gov.ie/ae

Is féidir teagmháil a dhéanamh le hionad teagmhála d’fhostóirí agus d’fhostaithe Mo Chiste don Todhchaí ag an uimhir 01 568 9555.

Nó, is féidir leat scríobh chuig NAERSA ag Mo Chiste don Todhchaí, Céide TCS, Páirc Theicneolaíochta Leitir Ceanainn, Leitir Ceanainn, Co. Dhún na nGall, F92 W8CY.