Sheol an tAire Cultúir, Cumarsáide agus Spóirt, Patrick O’Donovan TD, an dara comhairliúchán ar an Acht um Bonneagar Gigighiotáin (GIA)
- Foilsithe: 11 Bealtaine 2026
- An t-eolas is déanaí: 11 Bealtaine 2026
Tá sé mar aidhm ag an GIA borradh a chur faoi rolladh amach, mar aon le costas soláthair líonraí teileachumarsáide an-ardtoillte (VHCNanna) a ísliú. Déantar é sin trí thrédhearcacht, trí rochtain agus trí chomhordú a fheabhsú in oibreacha sibhialta, athúsáid bonneagair atá ann cheana a spreagadh, chomh maith le cinntiú go bhfuil foirgnimh nua agus athchóirithe móra "réidh le haghaidh gigighiotáin" de réir réamhshocraithe.
Faoin GIA, ceanglaítear ar Bhallstáit sonraíochtaí nó caighdeáin a bhunú le haghaidh bonneagair teileachumarsáide i bhfoirgnimh nua agus i bhfoirgnimh atá á n-athchóiriú go mór. Dúirt an tAire O’Donovan,
Le haghaidh neart daoine, go háirithe iad siúd atá ag obair ó chian, is rud riachtanach é seirbhís leathanbhanda thapa agus iontaofa. Cinnteoidh na caighdeáin sin go mbeidh gach foirgneamh nua réidh le haghaidh leathanbhanda snáthoptaice agus cabhróidh siad le hinmharthanacht fhadtéarmach ár stoc tithíochta a chinntiú.
Tabharfaidh na sonraíochtaí atá beartaithe sa chomhairliúchán seo treoir shoiléir don earnáil tógála agus don earnáil teileachumarsáide araon maidir leis na ceanglais theicniúla is gá chun Airteagal 10 den GIA (bonneagar fisiciúil laistigh d’fhoirgnimh agus sreangú snáthoptaice) a chur i bhfeidhm. Cé go bhfuil an comhairliúchán seo dírithe den chuid is mó ar na hearnálacha tógála agus teileachumarsáide, fáiltíonn an tAire roimh aighneachtaí ó gach páirtí leasmhar.
Is féidir rochtain a fháil ar an gcomhairliúchán poiblí ANSEO. Beidh an tréimhse chomhairliúcháin ar siúl ón dáta seo, 12 i.n. ar an 11 Bealtaine 2026, go dtí, 5 i.n. ar an 22 Meitheamh 2026.
CRÍOCH