Fógraíonn an tAire Foley go bhfuil rún ann col ceathracha a chur san áireamh i gClár Aitheanta faoin Acht um Adhlacthaí Institiúideacha 2022
- Foilsithe: 28 Aibreán 2026
- An t-eolas is déanaí: 5 Bealtaine 2026
D’fhógair an tAire Leanaí, Míchumais agus Comhionannais, Norma Foley, go bhfuil rún aici ann col ceathracha a chur san áireamh mar bhaill teaghlaigh incháilithe ar féidir leo páirt a ghlacadh i gClár Aitheanta faoin Acht um Adhlacthaí Institiúideacha 2022.
Rinne sí an fhógairt tar éis cruinniú Comh-aireachta ar maidin mar ar tugadh faomhadh an Rialtais di chun na leasuithe riachtanacha ar Acht 2022 a dhréachtú.
Chuir an tAire na moltaí faoi bhráid an Rialtais de bhun comhairle eolaíochta chun dáta a thug Eolaíocht Fhóiréinseach Éireann di, agus a thacaíonn le col ceathracha a chur san áireamh i gClár Aitheanta faoi Acht.
Má ritheann Tithe an Oireachtais an reachtaíocht riachtanach, beidh col ceathracha leanaí a gcreidtear gur cuireadh i gcré an iar-Árais Máithreacha agus Naíonán i dTuaim iad in ann páirt a ghlacadh sa Chlár Aitheanta atá ar siúl faoi láthair maidir leis an suíomh.
Ag labhairt di inniu, dúirt an tAire Foley:
“Tá a fhios agam go bhfuil an Clár Aitheanta an-tábhachtach do dhaoine a chreideann go bhfuil baill teaghlaigh dá gcuid curtha sa chré ar shuíomh an iar-Árais Máithreacha agus Naíonán i dTuaim.
Chuir Eolaíocht Fhóiréinseach Éireann ar an eolas mé le déanaí faoi fhorbairtí eolaíochta ó achtú na reachtaíochta a thugann caoi dúinn meaitseáil ADN a dhéanamh atá ar chaighdeán atá sách sásúil go dtacóidh sí le col ceathracha a chur san áireamh i gClár Aitheanta.
Tuigim go bhfuil col ceathracha ann a bhfuil spéis acu páirt a ghlacadh i gClár Aitheanta Thuama. Mar sin, bhí díograis orm féin agus ar an Rialtas gníomhú go tapa ina leith sin nuair a tugadh an chomhairle eolaíochta chun dáta.
Tá an Rialtas tar éis faomhadh a thabhairt do mo mholadh leasú a dhéanamh ar an Acht um Adhlacthaí Institiúideacha 2022 chun col ceathracha a chur san áireamh i gClár Aitheanta.”
Anois, beidh oifigigh sa Roinn Leanaí, Míchumais agus Comhionannais ag obair i gcomhar le hOifig an Ard-Aighne chun leasuithe a dhréachtú ionas gur féidir iad a chur faoi bhráid Thithe an Oireachtais chomh luath agus is féidir.