Don bhliain 2021, agus i gcomhréir le freagra an Aontais Eorpaigh ar an bpaindéim COVID-19, déanfar Clár Athchóirithe Náisiúnta na hÉireann a chomhtháthú lenár bPlean Náisiúnta Teacht Aniar agus Téarnaimh agus glacfar go sealadach le próiseas Seimeastair na hEorpa d'fhonn é a chomhordú leis an bplean seo.
Tá Saoráid um Théarnamh agus Athléimeacht an AE i gcroílár fhreagra an Aontais ar an bpaindéim COVID-19. Is é aidhm na Saoráide tionchar eacnamaíochta agus sóisialta na paindéime a mhaolú agus geilleagair agus sochaithe na hEorpa a dhéanamh níos inbhuanaithe, níos láidre agus a bheith ullmhaithe níos fearr do na dúshláin agus do na deiseanna a bhaineann le haistrithe ghlasa agus dhigiteacha.
Táthar ag súil go bhfaighidh Éire €853 milliúin i ndeontais faoin tSaoráid in 2021 agus 2022. Tá beart eile de dheontais le leithroinnt in 2023, faoina nglactar forbairtí eacnamaíochta idir seo agus sin san áireamh.
D'fhonn teacht a bheith againn ar an maoiniú seo, ní mór d'Éirinn Plean Náisiúnta Téarnaimh agus Teacht Aniar a fhorbairt lena cheadú ag an Aontas Eorpach. Ní mór d'athchóirithe agus infheistíochtaí a mbeidh an tSaoráid ag tacú leo a bheith leagtha amach sa Phlean agus ní mór iad a bheith curtha ar aghaidh chuig an gCoimisiún Eorpach tráth nach déanaí ná an 30 Aibreán 2021.
Ní mór do na tograí athchóirithe agus infheistíochta a áirítear sa Phlean a bheith ar mhaithe le dul i ngleic le gach fothacar de na dúshláin a aithníodh sna moltaí tír-shainiúla cuí a fuair Éire in 2019 agus in 2020 nó ar mhaithe le dul i ngleic le fothacar mór, a thagann chun cinn mar chuid de phróiseas Seimeastair na hEorpa. Ní mór dóibh a bheith ag teacht chomh maith le líon de phríomhréimsí AE, lena n-áirítear aistrithe gníomhaithe ar son na haeráide agus dhigiteacha.
Tá an Roinn Caiteachais Phoiblí agus Athchóirithe, ag obair i gcomhar le Roinn an Taoisigh, an Roinn Airgeadais agus an Roinn Fiontar, Trádála agus Fostaíochta, freagrach as an bPlean a ullmhú le hionchur ó Ranna eile de réir mar is gá, agus as comhordú ar fud an Rialtais a chinntiú.
Tá rannpháirtíocht na bpáirtithe leasmhara ina chuid thábhachtach den phróiseas. Reáchtáladh comhairliúchán poiblí ar Phlean Náisiúnta Téarnaimh agus Teacht Aniar na hÉireann agus tháinig deireadh leis an 22 Feabhra 2021.