Preasráitis
Osclaíonn an tAire Ryan an tríú Fóram Náisiúnta Geallsealbhóirí um Ghníomhú ar son na hAeráide
Ó An Roinn Comhshaoil, Aeráide agus Cumarsáide
Foilsithe
An t-eolas is déanaí
Ó An Roinn Comhshaoil, Aeráide agus Cumarsáide
Foilsithe
An t-eolas is déanaí
Osclóidh Eamon Ryan, an tAire Comhshaoil, Aeráide agus Cumarsáide, an tríú Fóram Náisiúnta Geallsealbhóirí um an Aeráid i Staid Aviva* inniu. Déanfaidh an tOllamh Alan Barrett, Stiúrthóir na hInstitiúide Taighde Eacnamaíochta agus Sóisialta (ESRI), cathaoirleacht ar an ócáid.
Is é an Comhphlé Náisiúnta ar Ghníomhú ar son na hAeráide clár náisiúnta na hÉireann chun dul i ngleic le geallsealbhóirí agus saoránaigh ar fud na sochaí, agus chun iad a chumasú agus a chumasú le gníomhú ar son na haeráide. Is cuid lárnach é an Fóram Náisiúnta Geallsealbhóirí um an Aeráid den Chomhphlé Náisiúnta ar Ghníomhú ar son na hAeráide agus is ceardlann aon lae é. Tabharfaidh imeacht an lae inniu beagnach 200 geallsealbhóir agus déantóir beartais le chéile chun na dúshláin agus na deiseanna a bhaineann leis an aistriú go neodracht carbóin a phlé.
Beidh an ócáid inniu comhdhéanta de shraith seisiún comhuaineach ar leithligh ina ndíreofar ar na sé Thascfhórsa Soláthair seo a leanas:
Ag labhairt dó faoin ócáid, dúirt an tAire Ryan:
“Is é atá san Fhóram Náisiúnta Geallsealbhóirí um an Aeráid ná dóigh ríthábhachtach chun an lucht ceaptha beartas, gníomhaireachtaí Stáit, comhlachtaí rialála, grúpaí ionadaíocha agus grúpaí pobail agus deonacha ó áiteanna ar fud na hÉireann a thabhairt le chéile chun plé a dhéanamh ar ár gcur chuige náisiúnta i leith gníomhú ar son na haeráide. Tá sé mar aidhm leis a shainaithint cé na dúshláin is práinní a dhéanfaidh difear don sprioc atá againn aeráidneodracht a bhaint amach, mar aon le réitigh chruthaitheacha phraiticiúla a mholadh chun aghaidh a thabhairt ar na dúshláin sin chun a chinntiú nach bhfágfaimid aon phobal ná aon áit inár ndiaidh.
“Is gá dúinn aghaidh a thabhairt ar an dúshlán aeráide le chéile. Níl an réiteach ar eolas ag aon ghrúpa ar leith. Níl aon ghrúpa ar leith níos eolaí ná níos aineolaí ar ghníomhú ar son na haeráide ná mar atá aon ghrúpa eile. Ní faoi mhilleán nó náire a chur ar aon ghrúpa atá sé seo. Ina ionad sin, is faoi obair le chéile atá sé. Tá ár ról féin le himirt ag gach duine dínn agus, más amhlaidh a oibrímid le chéile, is iad deiseanna, agus ní ualaí, do gach earnáil, do gach pobal agus do gach gnólacht a thiocfaidh as gníomhú ar son na haeráide.”
Dúirt an tOllamh Alan Barrett ó ESRI, a dhéanfaidh cathaoirleacht ar ócáid an lae inniu:
“Sa bhliain 2022, bhí sé de phribhléid agam cathaoirleacht a dhéanamh ar an gcéad Fhóram Náisiúnta Geallsealbhóirí um an Aeráid. Is é atá san fhóram ná ardán cuimsitheach le haghaidh díospóireacht mheáite i measc príomh-gheallsealbhóirí.
“Is eol dúinn ón taighde go bhfuil geallsealbhóirí agus an pobal ar an eolas faoin athrú aeráide, go bhfuil siad i bhfabhar gníomhú ar son na haeráide agus go bhfuil an-fhonn orthu dul i mbun gnímh. Is eol dúinn freisin gur aistriú casta dúshlánach é an t-aistriú seo agus go mbeidh orainn an-chuid de na dóigheanna a n-oibrímid, a dtaistealaímid, a dtomhlaímid táirgí agus a n-úsáidimid seirbhísí a athrú chun é sin a chur i gcrích. Tá an tríú Fóram Náisiúnta Geallsealbhóirí um an Aeráid seo á chur ar siúl le linn tréimhse ríthábhachtach d’Éirinn, de réir mar a fhéachaimid le dlús a chur le soláthar ár bhfreagartha don athrú aeráide – tríd an bPlean Gnímh don Aeráid 2023. Is é atá san fhóram seo ná deis iontach chun dúshláin a shainaithint, chun teacht ar réitigh ar phríomhdhúshláin aeráide le chéile agus chun an fhreagracht chuí a ghlacadh ar gach leibhéal den tsochaí.”
Beidh an deis ag na rannpháirtithe san fhóram scrúdú a dhéanamh ar phríomhdhúshláin ar bhealach cóir cothromasach. Beidh sé mar aidhm acu sin a bheidh i láthair, idir an Rialtas, ghníomhaireachtaí Stáit, an lucht tionsclaíochta, an earnáil eagraíochtaí neamhrialtasacha, phobail agus dhaoine aonair, obair le chéile chun athruithe a bheidh réadúil agus uaillmhianach a sholáthar.
Cuirfear aschuir an lae i láthair i dtuarascáil ghearr – áit a leagfar amach na conairí i dtreo sholáthar na ngníomhartha aeráide lena mbreithniú ag an lucht ceaptha beartas. Beidh sé sin mar bhonn eolais faoin gcéad leagan eile den Phlean Gnímh don Aeráid dá réir.
*Freastalóidh an tAire Ryan ar an ócáid sin go cianda (ar líne).
CRÍOCH