Ó An Roinn Turasóireachta, Cultúir, Ealaíon, Gaeltachta, Spóirt agus Meán
Foilsithe
An t-eolas is déanaí
Inniu d’fhógair an tAire Turasóireachta, Cultúir, Ealaíon, Gaeltachta, Spóirt & Meán, Catherine Martin T.D., gur roghnaíodh Cotter & Naessens Architects mar choimeádaithe chun ionadaíocht a dhéanamh ar son na hÉireann ag 19ú Biennale Ailtireachta na Veinéise in 2025. Roghnaíodh an tionscadal tar éis glao oscailte ó Chultúr Éireann, i gcomhpháirtíocht leis an gComhairle Ealaíon.
Dúirt an tAire Martin:
“Déanaim comhghairdeas le Cotter & Naessens Architects as a bheith roghnaithe chun ionadaíocht a dhéanamh ar son na hÉireann ag Biennale Ailtireachta na Veinéise 2025. Is bealach tábhachtach é rannpháirtíocht ag Biennale na Veinéise chun feasacht a mhéadú ar earnáil bheoga ailtireachta na hÉireann. “Cuireann Biennale na hÉireann deis iontach ar fáil chun smaointe agus cleachtais na hAiltireachta comhaimseartha in Éirinn a nascadh le smaointeoirí agus pobail go hidirnáisiúnta. Déanann mo Roinnse, trí Chultúr Éireann, Éire sa Veinéis a choimisiúnú i gcomhpháirtíocht leis an gComhairle Ealaíon”.
In Assembly, cuirfear torthaí phróiseas comhoibríoch idirdhisciplíneach i láthair idir Cotter & Naessens Architects, an t-ealaíontóir fuaime David Stalling, an file Michelle Delea, agus an coimeádaí Luke Naessens. Suiteáil ilchéadfach a bheidh sa dearadh ina ndéanfar iniúchadh ar choincheap criticiúil Assembly, focal cumasach lena léirítear comhthionól agus tógáil araon, arna spreagadh ag samhail pholaitiúil nuálach Thionól na Saoránach, a thug rialtas na hÉireann isteach in 2016.
Dúirt na coimeádaithe, Cotter & Naessans Architects:
“Is mór an onóir dúinn ionadaíocht a dhéanamh ar son na hÉireann sa Veinéis ag Biennale di Architettura 2025 agus tá súil againn leanúint le traidisiún na dtionscadail áille agus tuisceanacha a chuir ár bpiaraí agus ár gcomhghleacaithe sa ghairm i láthair thar na blianta. Mar chomhthionól agus tógáil, tá an tionól i gcroílár an phróisis ailtireachta agus táimid ar bís oibriú i gcomhar le David Stalling agus Michelle Delea chun fuaimdhreach a chur ar fáil do dhaoine agus spás le cloisteáil.”
Tá Biennale Ailtireachta na Veinéise, a bheidh ar siúl ó Bhealtaine go Samhain 2025, fós ar an ardán domhanda is tábhachtaí chun ailtireacht a thaispeáint. Tugtar deis uathúil ann d’ailtirí Éireannacha lucht féachana idirnáisiúnta a mhealladh. Tógfaidh Éire sa Veinéis 2025 ar láithreacht láidir na hÉireann ag Biennale Ailtireachta na Veinéise le blianta beaga anuas. Choiméadaigh Shelley McNamara agus Yvonne Farrell ó Grafton Architects an 16ú Biennale Ailtireachta sa Veinéis in 2018.
Is tionscnamh de chuid Chultúr Éireann i gcomhpháirtíocht leis an gComhairle Ealaíon é ionadaíocht na hÉireann sa Veinéis. Roghnaíodh an fhoireann chun ionadaíocht a dhéanamh ar Éirinn tar éis próisis oscailte iomaíoch, le baill den ghiúiré idirnáisiúnta.
Nótaí don eagarthóir:
Assembly
Suiteáil ilchéadfach a bheidh in Assembly, pailliún na hÉireann ag Biennale di Architettura 2025, ina ndéanfar iniúchadh ar choincheap criticiúil Assembly, focal cumhachtach lena léirítear comhthionól agus tógáil araon. In Assembly, cuirfear torthaí phróiseas comhoibríoch idirdhisciplíneach i láthair idir Cotter & Naessens Architects, an t-ealaíontóir fuaime David Stalling, an file Michelle Delea, agus an coimeádaí Luke Naessens.
Spreag samhail pholaitiúil nuálach Thionól na Saoránach dearadh agus Cotter & Naessen, samhail a thug rialtas na hÉireann isteach in 2016 chun ligean do shaoránaigh ceisteanna bunreachtúla agus sóisialta is tábhachtaí na linne a bhreithniú. Ag samhlú leathnú an turgnaimh pholaitiúil chuimsithigh seo amach as an seomra coiste agus isteach i spásanna an ghnáthshaoil, beidh Assembly ina fhréamhshamhail ailtireachta choincheapúil le haghaidh cruinnithe neamh-ordlathach, cumarsáid agus díospóireacht i suíomh poiblí.
Beidh saothar coimisiúnaithe nua sa phailliún leis an ealaíontóir fuaime David Stalling agus leis an bhfile Michelle Delea ina scrúdófar téama an tionóil tríd an gceol agus an teanga. Déanfaidh traidisiúin cheoil mar ghlaoch agus freagairt nó cori spezzati (cór scoilte) Veinéiseach eolas don saothar. Beidh curfá ilfhónach ann le fuaimeanna éagsúla agus guthanna daonna: tionól ceoil a bheidh feiliúnach d’ailtireacht fhisiciúil an phailliúin.
Scéal Cotter & Naessens
Is stiúideo ailtireachta agus dearaidh é Cotter & Naessens Architects atá lonnaithe i gCathair Chorcaí ó 2001 i leith agus a bhunaigh Louise Cotter agus David Naessens. Díríonn siad ar thionscadail phoiblí agus ina gcuid oibre agus tá a saothar bunaithe ar thaighde dearaidh, trí chomórtais teagaisc agus dearaidh, go háirithe dlrLexicon i nDún Laoghaire agus Institiúid Taighde FOCAS, Ollscoil Theicniúil Bhaile Átha Cliath, le déanaí.
Bhí Cotter & Naessens ar cheann de 16 chleachtas ar tugadh cuireadh dóibh páirt a ghlacadh in Close Encounters, a coimisiúnaíodh do Freespace, taispeántas Biennale na Veinéise 2018 a choimeád Yvonne Farrell agus Shelley McNamara. Ghlac Louise Cotter agus David Naessens páirt i gceann de na chéad Biennale di Architettura a choimeád Aldo Rossi in 1985.
Scéal David Stalling
Is cumadóir, ealaíontóir fuaime, tobchumadóir agus léiritheoir fuaime é David Stalling a sháraíonn sainmhíniú traidisiúnta na cumadóireachta ina chleachtas. Oibríonn sé le meáin éagsúla: fuaim fhuaimiúil agus leictreonach; taifeadtaí allamuigh, íomhá ghluaiste, soilsiú, agus sonraí eolaíocha.
I measc na dtionscadal reatha agus le déanaí tá Earth Traces (2023–24), i Músaem Eolaíochtaí na Cruinne Sedgwick, Cambridge; all these worlds (2022–23), i Músaem Litríochta Éireann, Baile Átha Cliath; agus Under the Feet of Shadows (2024), suiteáil ilmheán le EL Putnam agus Mike McCormack.
Déanann Ionad Ceoil Comhaimseartha na hÉireann ionadaíocht ar Stalling agus foilsíonn Farpoint Recordings a shaothar.
Scéal Michelle Delea
Ealaíontóir ildisciplíneach is ea í Michelle Delea atá ag gabháil don ailtireacht, don fhilíocht, déantús scannán agus do chur chun cinn imeachtaí. Tá MA san Ailtireacht aici ó CCAE agus oibríonn sí faoi láthair idir cleachtas agus oideachas. Tá a cuid scríbhneoireachta le feiceáil in The Stinging Fly, Type.ie agus Architecture Ireland. In 2022, léirigh sí an scannán faisnéise The Sprawling Octopus of an Elevated Highway, faoi ghníomhaíocht ailtireachta i gCorcaigh sna 1960idí.
Scéal Luke Naessens
Is coimeádaí agus staraí ealaíne é Luke Naessens. Fuair sé PhD i stair na healaíne ó Ollscoil Princeton in 2024 agus is Comhalta Iardhochtúireachta Fhondúireacht Terra 2024–25 é san Ionad Ealaíne Meiriceánach in Institiúid Courtauld. D’oibrigh sé roimhe seo mar bhall den fhoireann choimeádaithe in The Barbican Centre i Londain.