Preasráitis
Déanann an tAire Sláinte an Lá Domhanda um Shábháilteacht Othar a chomóradh
Foilsithe
An t-eolas is déanaí
Foilsithe
An t-eolas is déanaí
Rinne an tAire Sláinte, Stephen Donnelly TD, Lá Domhanda um Shábháilteacht Othar 2022 a chomóradh inniu (Dé Sathairn, an 17 Meán Fómhair 2022). Leanann Éire uirthi ag tacú leis an tionscnamh idirnáisiúnta seo, faoi stiúir na hEagraíochta Domhanda Sláinte, a dhíríonn ar fheasacht a ardú agus a chinntiú go mbunaítear sábháilteacht othar mar thosaíocht dhomhanda sláinte. ‘Cógas gan Dochar' an téama i mbliana. Spreagann agus cumhachtaíonn an feachtas seo d'othair, a gcúramóirí agus gairmithe cúram sláinte ról gníomhach a ghlacadh chun cleachtais chógas agus próisis úsáide cógas níos sábháilte a chinntiú, lena n-áirítear oideasú, ullmhú, dáileadh, riar agus monatóireacht.
Dúirt an tAire Donnelly:
“Tá ríméad orm Lá Domhanda um Shábháilteacht Othar na bliana seo a chomóradh agus a chur chun cinn leis an téama Cógas Gan Dochar. Cuireann úsáid shábháilte agus chuí cógas ar chumas othair saol níos faide agus níos sláintiúla a chaitheamh, rud a théann chun sochair dóibh féin, dá dteaghlaigh agus don tsochaí. Tá úsáid an chógais chirt ag an am ceart ar an mbealach ceart ag an othar ceart ar cheann de na hidirghabhálacha cúraim sláinte is éifeachtaí atá ar fáil."
Dúirt an Príomhoifigeach Altranais, Rachel Kenna:
“Tugann an feachtas seo spreagadh do gach cliniceoir agus othar tús áite a thabhairt agus beart a dhéanamh go luath i bpríomhréimsí a bhaineann le saincheisteanna cógas a fheabhsú. Ina measc seo tá cásanna ardriosca, aistrithe cúraim, polachógaisíocht agus cógais chosúla ó thaobh amhairc agus fuaime de. Tá ról ag gach gairmí cúraim sláinte, othar agus a dteaghlach maidir le sábháilteacht cógais a fheabhsú agus ba cheart go mbeadh sé seo ina thosaíocht do gach duine a fhaigheann agus a sholáthraíonn cúram laistigh den tseirbhís cúraim sláinte. Cuireann cultúr eagraíochta a chuireann dea-chleachtais agus feabhsuithe cáilíochta i bhfeidhm go rialta maidir le sábháilteacht cógais timpeallacht thacúil ar fáil do chúram sábháilte ar ardchaighdeán”.
Dúirt an Dr Orla Healy, Stiúrthóir Cliniciúil Náisiúnta, Stiúrthóireacht Cáilíochta agus Sábháilteachta Othar, Feidhmeannacht na Seirbhíse Sláinte:
“Tá a fhios againn go bhféadfaí leath den dochar a bhaineann le cógais a sheachaint. Oibríonn ár gClár Náisiúnta um Shábháilteacht Cógais FSS le hothair agus gairmithe cúram sláinte chun díobháil a bhaineann le cógais nó a n-easnamh a laghdú. Tugann an feachtas sábháilteachta cógas ‘Know Check Ask ', mar shampla, spreagadh do dhaoine a úsáideann cógais rialta níos mó eolais a fháil faoina gcógais agus ceist a chur ar a gcógaiseoir, a ndochtúir nó a n-altra má bhíonn ceisteanna acu. Céim phraiticiúil amháin atá an-úsáideach do dhaoine is ea liosta cothrom le dáta dá gcuid cógas a choinneáil agus é a thabhairt chuig gach coinne cúram sláinte. Le haghaidh tuilleadh eolais ar imeachtaí agus tionscnaimh Lá Domhanda um Shábháilteacht Othar na Stiúrthóireachta Náisiúnta QPS, téigh chuig ár láithreán gréasáin ag https://www.hse.ie/eng/about/who/nqpsd/”
Is grúpa sonrach cógais iad antaibheathaigh nach mór a úsáid go cúramach chun iad a choinneáil éifeachtach maidir le cóireáil a dhéanamh ar ionfhabhtuithe.
Ag tabhairt dá haire di, dúirt Marie Philbin, Príomhchógaiseoir Frithmhiocróbach, Rannán AmrIC de chuid Fheidhmeannacht na Seirbhíse Sláinte:
“Tá antaibheathaigh ar cheann den ghrúpa cógas is coitianta a ordaítear. Is príomhfhócas d'obair mhaoirseachta frithmhiocróbach Fhoireann Fhrithsheasmhacht in aghaidh ábhar Frithmhiocróbach agus Rialú Ionfhabhtaithe FSS é tacú le gach oibrí cúram sláinte na buntáistí a bhaineann le hantaibheathaigh a uasmhéadú dá n-othar agus an méid is lú díobhála a dhéanamh. Le blianta beaga anuas, ghlac Dochtúirí Teaghlaigh leis an gcoincheap seo trí níos mó úsáid a bhaint as antaibheathaigh atá níos sábháilte agus níos éifeachtaí (dá ngairtear antaibheathaigh ghlasa) in áit antaibheathaigh ar mó an dóchúlacht go mbeidh éifeachtaí díobhálacha acu ar othair (dá ngairtear antaibheathaigh dhearga)."
Tá Lá Domhanda um Shábháilteacht Othar mar chuid d'fheachtas domhanda na hEagraíochta Domhanda Sláinte (WHO) chun feasacht a ardú agus a chinntiú go mbunaítear sábháilteacht othar mar thosaíocht dhomhanda sláinte. Bunaíodh é in 2019 chun tuiscint dhomhanda ar shábháilteacht othar a fheabhsú, rannpháirtíocht an phobail i sábháilteacht cúram sláinte a mhéadú agus gníomhaíochtaí domhanda a chur chun cinn chun sábháilteacht othar a fheabhsú agus díobháil othar a laghdú.
Is é téama Lá Domhanda um Shábháilteacht Othar 2022 ná Cógas gan Dochar agus iarrann sé ar pháirtithe leasmhara tosaíocht a thabhairt agus gníomhú go luath i bpríomhréimsí a bhaineann le dochar suntasach mar gheall ar chleachtais cógais neamhshábháilte.
Deir an WHO go ndéanann cleachtais cógais neamhshábháilte agus earráidí cógais dochar inseachanta ar fud an domhain. Tarlaíonn earráidí cógais nuair a bhíonn tionchar ag córais cógais lag agus fachtóirí daonna mar tuirse, droch-choinníollacha comhshaoil agus ganntanas foirne ar shábháilteacht an phróisis úsáide cógais. D’fhéadfadh dochar tromchúiseach othar, míchumas agus fiú bás a bheith mar thoradh air seo.
Chuir paindéim leanúnach COVID-19 go mór le riosca na n-earráidí cógais agus an dochar a bhaineann le cógas.
Tá an Clár Náisiúnta um Shábháilteacht Cógas ar cheann de na cláir shábháilteachta tosaíochta laistigh de Stiúrthóireacht Náisiúnta Cáilíochta agus Sábháilteachta Othar FSS. Oibríonn an clár le hothair agus le soláthraithe cúram sláinte chun dochar a bhaineann le cógais a laghdú. Ceann de na príomhchúraim don chlár is ea an feachtas Know Check Ask. Maidir leis seo, oibríonn FSS i gcomhar le hothair, teaghlaigh agus cúramóirí chun do chógas a fhiosrú, na sonraí a sheiceáil agus Ceist a chur; cumarsáid a dhéanamh le do ghairmithe cúraim sláinte faoi chógais agus do cheisteanna a phlé. Is í an príomhghníomhaíocht ná liosta cógais a choinneáil agus é a úsáid chun cabhrú le cumarsáid ag coinní agus iontrálacha. Tá acmhainní agus moltaí maidir le conas tionchar an fheachtais seo a uasmhéadú ar fáil ar láithreán gréasáin FSS . Tá tacaíocht ar fáil freisin trí ríomhphost: safermeds@hse.ie
D’fhoilsigh an Roinn Sláinte agus an Roinn Talmhaíochta, Bia agus Mara an dara Plean Gníomhaíochta Náisiúnta um Fhrithsheasmhacht in aghaidh Frithmhiocróbach 2021-2025 (iNAP2) de chuid na hÉireann i mí na Samhna 2021. Glacann iNAP2 le cur chuige Aon Sláinte Amháin chun dul i ngleic le frithsheasmhacht in aghaidh ábhar frithmhiocróbach (AMR) agus ailíníonn sé do na cúig Chuspóir Straitéiseacha a leagtar amach i bPlean Gníomhaíochta Domhanda na hEagraíochta Domhanda Sláinte (2015) agus do cheanglais an Phlean Gníomhaíochta Eorpaigh um Fhrithsheasmhacht in aghaidh Ábhar Frithmhiocróbach (2017).
Áirítear le iNAP2 90 gníomh a bhaineann go sonrach le sláinte an duine ar fud 5 Chuspóir Straitéiseacha na hEagraíochta Domhanda Sláinte:
1. Feasacht agus eolas ar AMR a fheabhsú
2. Faireachas ar AMR agus Úsáid Ábhar Frithmhiocróbach (AMR) a fheabhsú
3. Leathadh an ionfhabhtaithe agus an ghalair a laghdú
4. An úsáid is fearr a bhaint as antaibheathaigh i sláinte an duine agus i sláinte ainmhithe
5. Taighde agus forbairt inbhuanaithe i gcógais nua, uirlisí diagnóiseacha, vacsaíní agus idirghabhálacha eile a chur chun cinn.
Pléitear go sainráite i gcuspóir straitéiseach 4 úsáid shábháilte agus chuí antaibheathaigh agus cógais ghaolmhara. Tá tuilleadh faisnéise ar fáil ag www.gov.ie/amr.