Ó An Roinn Leanaí, Comhionannais, Míchumais, Lánpháirtíochta agus Óige
Foilsithe
An t-eolas is déanaí
D’fhógair an tAire Leanaí, Comhionannais, Míchumais, Lánpháirtíochta agus Óige, Roderic O’Gorman, inniu go bhfuil ciste nua á chruthú faoin tionscnamh um chosc agus luath-idirghabháil Cad a Oibríonn, atá maoinithe trí Chiste na gCuntas Díomhaoin. Bunaíodh an Ciste um Fhianaise Tógála Cad a Oibríonn chun tacú le bailiú agus anailísiú sonraí agus fianaise laistigh den earnáil phobail agus dheonach.
Tá an Ciste oscailte do chleachtóirí agus do sholáthraithe seirbhíse a oibríonn in eagraíochtaí neamhbhrabúis a oibríonn le leanaí, daoine óga agus a dteaghlaigh agus a bhfuil béim láidir acu ar chosc agus ar luath-idirghabháil.
Tugtar cuireadh d’eagraíochtaí neamhbhrabúis iarratais a chur isteach ar mhaoiniú suas le €50,000 do thionscadail um chosc agus luath-idirghabháil a shainaithneoidh bearnaí i soláthar seirbhíse agus a fhorbróidh scileanna le haghaidh monatóireachta, meastóireachta agus anailíse éifeachtach ar sheirbhísí coiscthe agus luath-idirghabhála.
Tá sé mar aidhm ag an gCiste freisin cabhrú leo siúd a oibríonn le leanaí, daoine óga agus teaghlaigh rochtain a fháil ar oiliúint maidir le bailiú, taighde agus anailís a fheabhsaíonn torthaí do leanaí agus do dhaoine óga.
Is é an spriocdháta le haghaidh iarratais ná 5pm, Dé hAoine, 22 Meán Fómhair 2023.
Ag fógairt an lainseála ar an gCiste um Fhianaise Tógála Cad a Oibríonn, dúirt an tAire O’Gorman:
“Bunaigh mo Roinn an tionscnamh Cad a Oibríonn chun úsáid sonraí agus fianaise sa chleachtas is fearr a chur chun cinn i measc lucht déanta beartas um chosc agus luath-idirghabháil, cleachtóirí agus soláthraithe seirbhíse. Soláthróidh an Ciste um Fhianaise Tógála nua seo maoiniú aonuaire d’eagraíochtaí chun am agus machnamh a thiomnú chun a mbailiú agus a n-úsáid sonraí a fhorbairt agus a fheabhsú chun tionchar fíorsaoil a gcuid seirbhísí ar úsáideoirí seirbhísí a mheasúnú. Sa deireadh, tacóidh an ciste seo le soláthraithe seirbhíse ina sprioc chun torthaí a fheabhsú do leanaí agus do dhaoine óga.”
Tá tuilleadh eolais faoin scéim ar fáil ar shuíomh gréasáin What Works (Ár leithscéal nach bhfuil leagan Gaeilge ar fáil).