Preasráitis
Athbhreithniú Aireachta ar an 67ú Grúpa Coisithe 20/03/2023
Foilsithe
An t-eolas is déanaí
Foilsithe
An t-eolas is déanaí
Athbhreithniú Aireachta ar an 67ú Grúpa Coisithe
Rinne an Tánaiste agus Aire Cosanta, Micheál Martin TD, athbhreithniú, inniu (an 20 Márta) ar an 67ú Grúpa Coisithe, a imlonnófar sna hArda Golan go luath mar chuid d’Fhórsa Breathnóireachta Neamhspleách na Náisiún Aontaithe (UNDOF).
In éineacht leis an Tánaiste, bhí Ceann Foirne Óglaigh na hÉireann, an Leifteanantghinearál Sean Clancy, agus Ard-Rúnaí Cúnta na Roinne Cosanta, Bernie Maguire.
Agus é ag labhairt leis an meitheal 130 duine i gCampa Finner, Béal Átha Seanaidh, Co. Dhún na nGall, dúirt an Tánaiste “Tá an traidisiún atá á leanúint agaibh mar choimeádaithe síochána na Náisiún Aontaithe faoi thiomáint ag na luachanna agus prionsabail cheannann chéanna a bhí mar bhonn agus treoir le gníomhaíochtaí ár stáit ar an ardán idirnáisiúnta i gcónaí, ó theacht an neamhspleáchais – tiomantas don iltaobhachas agus do luachanna na síochána, na slándála idirnáisiúnta agus an cheartais dhomhanda.”
Agus é ag tabhairt chun cuimhne dó bás an tSaighdiúra Shingil Seán Rooney as an mBaile Nua, Co Dhún na nGall, a maraíodh sa Liobáin i mí na Nollag anuraidh, dúirt an Tánaiste “Níl Oibríochtaí Síochánaíochta na NA gan chontúirt. Le bás Sheáin, cuireadh abhaile orainn, ar bhealach creathnach, an baol a ghlacann gach duine díobh agus sibh ag comhlíonadh bhur ndualgais agus ag coimeád an taifead bródúil agus clúiteach atá ag ár dtír i seirbhís na síochána.”
Chuir an Tánaiste fáilte mhór roimh theaghlaigh na mball den 67ú Grúpa Coisithe, ag aithint “go bhfuil costas pearsanta ag baint le rannpháirtíocht i misin tacaíochta síochána do dhaoine aonair nach mór dóibh a bheith i bhfad i gcéin óna muintir agus a gcairde ar feadh tréimhsí fada ama i dtimpeallachtaí neamhaithnidiúla agus acrannacha”.
Críoch.