Ó An Roinn Leanaí, Comhionannais, Míchumais, Lánpháirtíochta agus Óige
Foilsithe
An t-eolas is déanaí
D’fhógair an tAire Stáit le freagracht as Míchumas, Anne Rabbitte, T.D., maoiniú breise de €750,000 do 9 dtionscadal faoi thionscnamh Rannpháirtíocht Cheart Chomhoibritheach um Fheabhsú Teicneolaíochta Cúnta (CREATE) de chuid Fheidhmeannacht na Seirbhíse Sláinte.
Is é CREATE II an dara hatriall den tionscnamh CREATE, a seoladh ar dtús i mí Eanáir 2022, agus a bhfuil sé mar aidhm aige feabhas a chur ar rochtain ar Theicneolaíochtaí Digiteacha agus Cúnta (TDC) ar féidir leo fíorathrú a dhéanamh ar eispéiris laethúla daoine faoi mhíchumas. Cumasóidh an maoiniú a d’fhógair an tAire Rabbitte cur i bhfeidhm agus inbhuanaitheacht leanúnach na dtionscadal roghnaithe.
Agus é ag fógairt leithdháileadh an mhaoinithe, dúirt an tAire Rabbitte:
“Tar éis torthaí dearfacha thionscnamh CREATE a fheiceáil, bhí fonn orm tuilleadh cúnaimh a thabhairt d’fhorbairt leanúnach na dtionscadal teicneolaíochta cúnta a bhfuil difríocht fhiúntach á ndéanamh acu do dhaoine faoi mhíchumas, mar is eol dom. Cuireann Teicneolaíochtaí Digiteacha agus Cúnta ar chumas daoine faoi mhíchumas saol níos neamhspleáiche a bheith acu agus táim bródúil as an deis a bheith agam cabhrú leis an tionscnamh seo a chur chun cinn. Tá a leithéid de scóip ann le hinfheistíocht a dhéanamh i gclár agus i dtionscnaimh teicneolaíochta cúnta agus le cúnamh a thabhairt dóibh, agus is cinnte gur réimse í a bhfuil sé i gceist agam tuilleadh maoinithe a chur leis in 2024.”
Dúirt an Dr Rosie Gowran, Ceannaire Cliniciúil FSS Clár Cliniciúil Náisiúnta do Dhaoine faoi Mhíchumas:
“Is bealach é Teicneolaíocht Chúnta chun sláinte, ionchuimsiú, folláine agus rannpháirtíocht a fheabhsú. Tá lúcháir ar an gClár Cliniciúil Náisiúnta do Dhaoine faoi Mhíchumas, atá ag obair chun cúnamh a thabhairt do chur chun feidhme UNCRPD (Coinbhinsiún na Náisiún Aontaithe ar Chearta Daoine faoi Mhíchumas), go bhfuil maoiniú curtha ar fáil chun cúnamh a thabhairt do chéim feidhmiúcháin de thionscadail léirithe Teicneolaíochta Digití agus Cúnta arna maoiniú in CREATE I in 2021.
Is é an rún atá ag CREATE II ná cúnamh a thabhairt do chur chun feidhme na dtionscadal léirithe Teicneolaíochta Digití agus Cúnta CREATE I chun gnéithe comhchoiteanna a nascadh ar an leibhéal áitiúil, réigiúnach agus náisiúnta i dtreo cur i bhfeidhm agus inbhuanaitheacht fhadtéarmach nuálaíocht seirbhíse teicneolaíochta cúnta. Ceann de phríomhaidhmeanna an tionscnaimh CREATE is ea cur ar chumas eagraíochtaí oibriú i gcomhar le chéile, chun feabhsú suntasach ar an gcóras teicneolaíochta cúnta a spreagadh sna hearnálacha ar fad agus, dá bharr sin, cur go mór leis an Teicneolaíocht Dhigiteach agus Chúnta.”
Le blianta beaga anuas, tá dul chun cinn mór déanta ag Éirinn maidir le cáil náisiúnta agus idirnáisiúnta a fhorbairt i réimse na Teicneolaíochta Digití agus Cúnta, go háirithe ína comhoibriú leis an Eagraíocht Dhomhanda Sláinte, agus dúirt an tAire Rabbitte:
“Ní féidir an méid a chuireann Éire leis an réimse seo de theicneolaíocht dhigiteach agus chúnta, lena n-áirítear ár gcuid oibre leis an Eagraíocht Dhomhanda Sláinte, a thomhas faoina luach. Bhí baint againn le forbairt Liosta Tháirgí Cúnta Tosaíochta EDS a chuimsíonn 50 táirge cúnta tosaíochta, a roghnaíodh ar bhonn riachtanas forleathan agus tionchar ar shaol duine. Bhí baint ag Éirinn freisin le seoladh Thuarascáil Dhomhanda EDS ar Theicneolaíocht Chúnta in 2022, agus thug Taoiseach an ama, Micheál
Martin, an spreagaitheasc.
“Tugann tionscadail CREATE cúnamh do dhaoine le míchumais chéadfacha, chognaíocha, fhisiciúla agus intleachta i ngach raon aoise, rud a chuireann ar a gcumas cur lena bpobail in obair, i bhfóillíocht, agus níos tábhachtaí fós, í rannpháirtíocht shóisialta,” a dúirt an tAire Rabbitte.
Rinne beirt athbhreithneoirí FSS agus beirt athbhreithneoirí seachtracha a bhfuil saineolas acu sa réimse athbhreithniú ar na tionscadail tosaigh CREATE. Scóráladh na tionscadail bunaithe ar: Torthaí tionscadail; Luach d’oibríochtaí atá ann cheana agus d’aidhmeanna CREATE; Gníomhaíochtaí a Thagann chun Cinn lena n-áirítear an t-aschur; Buntáistí; Éifeacht ar dhaoine a bhaineann tairbhe as an tseirbhís agus inbhuanaitheacht an Tionscadail.
Léirigh na tionscadail rathúla feabhas ar sheirbhísí míchumais agus ar thacaíocht do leanaí agus do dhaoine fásta a bhaineann tairbhe as na seirbhísí agus do bhaill foirne ildisciplíneacha a fhorbraíonn agus a sholáthraíonn seirbhísí. Cuireadh torthaí rathúla i láthair a léiríonn úsáid agus cur i bhfeidhm fiúntach TDC, dul chun cinn in inniúlachtaí Teicneolaíochta Cúnta (AT), tógáil acmhainní, agus cur chun cinn abhcóideachta agus feasachta le haghaidh na teicneolaíochta digití agus cúnta. Forbraíodh go leor seirbhísí TDC agus áirítear leo, mar shampla, leabharlanna TC, ardáin oideachais agus oiliúna, próisis soláthair atá dírithe ar an duine, úsáid na Cumarsáide Malartaí agus Méadaithí, fréamhshamhlacha le haghaidh pasanna Teicneolaíochta Cúnta agus Sláinte, agus clinicí ildisciplíneacha TC.
Is iad seo a leanas liosta na dtionscadal a fhaigheann maoiniú le haghaidh CREATE II:
1. Vision Ireland (Comhairle Náisiúnta na nDall (NCBI)
Tionscadal: Veain Vision
Leithdháiltear maoiniú chun cúnamh a thabhairt d’fhorbairt agus do choinneáil Veain Vision chun na suíomhanna trí shraith a bhaint amach go náisiúnta. Is féidir le Vision Ireland an oifig a thabhairt go díreach go dtí an pobal, freastal ar níos mó imeachtaí, a theagmháil a láidriú le heagraíochtaí agus le fostóirí eile. Taisteal d’úsáideoirí seirbhíse a laghdú de thoradh measúnuithe teicneolaíochta cúnta soghluaiste, clinicí, taispeáint gléasanna, oiliúint, agus tacaíocht agus de thoradh faisnéis ghinearálta a thairiscint.
2. Stewarts Care
Tionscadal: Maireachtáil Laethúil a bhfuil Fiúntas inti
Bainfidh cúram Stewart úsáid as teicneolaíocht dhigiteach agus chúnta (TDC) chun cur i bhfeidhm chur chuige An Lá Fhiúntaigh i leith soláthar seirbhíse a chur chun cinn a thuilleadh, trí TDC pearsantaithe saincheaptha chun Pleanáil an Lae Fhiúntaigh a chur chun cinn do dhaoine a bhfuil riachtanais chasta acu. Cruthóidh cúram Stewart Teicneolaíochtaí Digiteacha agus Cúnta saincheaptha chun rannpháirtíocht úsáideoirí agus caighdeán na beatha a fheabhsú. Tá cur chuige atá bunaithe ar chomhdhearadh ríthábhachtach chuige seo a dhéanann teagmháil le daoine aonair ar bhonn a gcúinsí uathúla féin. Ina theannta sin, tá cúram Stewart dírithe ar Bhunachar cuimsitheach Sonraí Cuardaigh Teicneolaíochta Cúnta Digití a chruthú a fheidhmeoidh mar fhoinse láraithe faisnéise d’úsáideoirí agus do chúramóirí.
3. An Grúpa Rehab
Tionscadal: Lárionad na Teicneolaíochta Digití agus Cúnta (TDC) - Cur Chuige Náisiúnta
Díreoidh an Grúpa Rehab ar Chur Chuige Náisiúnta maidir le forbairt, oideachas agus oiliúint sna hearnálacha trí chéile de thoradh teagmháil Lárionad TDC a leathnú go hinmheánach sa Ghrúpa Rehab ach leanúint de na seirbhísí a chur chun cinn agus de ghlacadh le hothair nua atreoraithe ó RehabCare agus ó Sheirbhísí an Líonra Náisiúnta Foghlama agus de chomhoibriú le comhpháirtithe CREATE.
4. Bráithre na Carthanachta Éireann Réigiún an Iarthair
Tionscadal: Creat Cuimsitheach Teicneolaíochta Cúnta
Oibreoidh Bráithre na Carthanachta Éireann Réigiún an Iarthair ar Chreat Cuimsitheach Teicneolaíochta Cúnta a fhorbairt a bheidh ag teacht le plean cáilíochta na heagraíochta trí inrochtaineacht ar Leabharlann Iasachtaí TC a fheabhsú do dhaoine a fhaigheann tacaíocht mar aon le hoiliúint ar theicneolaíocht chúnta a fhorbairt agus a chur ar fáil.
5. Gortú Inchinne Faighte Éireann (ABII) *
Tionscadal: Tacaíocht shonrach TDC do Mharthanóir Gortú Inchinne
Leanfaidh ABII ar aghaidh ag obair agus ag forbairt cláir agus déanfaidh sé uirlisí tomhais torthaí sraithe a leabú ar féidir iad a úsáid go náisiúnta chun tacú le Marthanóirí Gortú Inchinne.
6. Cúram Sláinte Pobail Thiar FLPM (Foireann Líonra do Pháistí faoi Mhíchumas) ECSP2 (Eagraíocht um Chúram Sláinte Pobail 2) FSS
Tionscadal: Foireann Líonra do Pháistí faoi Mhíchumas - Gléasanna Teicneolaíochta Cúnta a chabhraíonn le Cumarsáid
Forbróidh FLPM ECSP2 FSS teimpléad le haghaidh Gléasanna Teicneolaíochta Cúnta a chabhróidh le cumarsáid (CMM (Cumarsáid Mhéadaithe agus Mhalartach)) san ECSP2 ar fad agus é mar chuspóir aige comhairle a thabhairt ar chur i bhfheidhm náisiúnta ar bhonn céimneach. Is é an aidhm creat a leabú trí chomhdhearadh le haghaidh inbhuanaitheachta i ngnó “laethúil” na Seirbhísí Idirghabhála Teiripe do Pháistí foi Míchumas laistigh de OSP a chinnteoidh go mbeidh CMM agus TC le haghaidh cumarsáide lárnach i soláthar seirbhíse.
7. Enable Ireland
Tionscadal: Forbairt agus inbhuanaitheacht Pas TC, raon éifeachta a leathnú agus líonra comhtháite a thugann aird ar chomhtháthú le bonneagar Náisiúnta FSS, castachtaí a shárú/RGCS/ Éiceachóras Náisiúnta TC.
D’fhorbair Enable Ireland, i gcomhar le roinnt eagraíochtaí comhpháirtíochta, fréamhshamhail Pas Digitigh TC a bheachtófar chun inrochtaineacht optamach a chinntiú do gach ábhar úsáideora digitigh AT (iad siúd a bhfuil riachtanais íseal, mheánmhéide agus ardtacaíochta acu). Díreoidh an chéim seo d’fhorbairt an Phas digitigh TC ar réitigh le héifeacht mhór ar chostas íseal, ar féidir iad a nuashonrú de réir mar a aistríonn daoine ar feadh a saoil, go cliniciúil (e.g.: siomptóim ag athrú) nó de réir mar a théann siad trí chéimeanna saoil ó oideachas go fostaíocht agus maireachtáil neamhspleách.
8. Teach San Mícheál
Tionscadal: Forbairt agus inbhuanaitheacht Pasanna Sláinte do dhaoine faoi mhíchumas intleachta, tionchar a leathnú agus líonra comhtháite a bhunú
Leagfaidh Teach Naomh Micheál amachan bealach náisiúnta chun cinn maidir le forbairt, inbhuanaitheacht, teagmháil, agus líonra comhtháite an Phas Sláinte do dhaoine faoi mhíchumas intleachta a dhéanfaidh machnamh tuisceanach ar chomhtháthú i mbonneagar Náisiúnta FSS agus a thabharfaidh aghaidh ar chastachtaí/RGCS/Éiceachóras Náisiúnta TC. Tá an tionscadal seo ag teacht le beartais náisiúnta freisin chun Sláintecare, Creat um Chumas Digiteach Uile-Éireann, Beartas Domhanda TC EDS, Straitéis Litearthachta Digití do Dhaoine Fásta, An Bille um Fhaisnéis Sláinte, ADM / An tAcht um Acmhainn, Múnlú Thodhchaí an Altranais do Dhaoine faoi Mhíchumais a ghlacadh san áireamh.
9. Seirbhísí Míchumais FSS ECSP8 an Longfoirt/na hIarmhí
Tionscadal: Tithíocht agus Teicneolaíocht Chúnta Abhcóideacht agus Feasacht do Chomhairlí Contae
Cur síos: Leis an maoiniú, beifear in ann obair leantach a dhéanamh le daoine faoi mhíchumas atá ina gcónaí i dtithíocht phríobháideach/ÍCT nó i dtithíocht an údaráis áitiúla ón mbuntionscadal píolótach. Beidh príomhpháirtithe leasmhara páirteach i bpróiseas comhdheartha agus i mbun tuarascáil, acmhainní agus ábhair chomharthaíochta a chur le chéile do Chomhairlí Contae go náisiúnta agus iad ag pleanáil do thithíocht inrochtana, atá feistithe le teicneolaíocht chúnta chuí chun riar ar riachtanais an duine aonair.