Preasráitis
Fógraíonn an tAire Sláinte agus Clann Brennan Clár Athdheise Vacsaín HPV Laura Brennan
Foilsithe
An t-eolas is déanaí
Foilsithe
An t-eolas is déanaí
D'fhógair an tAire Sláinte, Stephen Donnelly TD, in éineacht le clann Laura Brennan nach maireann, Clár Athdheise Vacsaín HPV Laura Brennan.
Cuirfidh an clár, a bhfuiltear ag súil go seolfar é i lár mhí na Samhna 2022, vacsaíní HPV saor in aisce ar fáil do gach buachaill agus cailín in oideachas dara leibhéal a bhí i dteideal vacsaíne HPV a fháil ach nach bhfuair í go fóill, ar cibé cúis. Beidh mná óga, suas go dtí 25 bliana d'aois, a bhfuil meánscoil fágtha acu anois, agus nach bhfuair an vacsaín, i dteideal an vacsaín a fháil mar chuid den chlár athdheise. Déanfar an vacsaín a riar i gclinicí. Tugtar an vacsaín mar dháileog amháin agus tá sí saor in aisce.
Is féidir leis an papalómaivíreas daonna, nó HPV, a bheith ina chúis le hailse agus faithní na mball giniúna i mná agus fir araon. Cosnaíonn an vacsaín, atá sábháilte agus éifeachtach, i gcoinne na gcineálacha HPV is cúis le 9 as 10 ailse cheirbheacs.
Léirigh staidéir ón tSualainn agus ó Shasana go bhfuil baint ag vacsaíniú le vacsaín HPV le laghdú mór ar an mbaol maidir le hailse cheirbheacs, go háirithe i measc daoine a fuair an vacsaín HPV ag 12 go 13 bliana d'aois.
Dúirt an tAire Donnelly:
“Tugann Laura Brennan spreagadh dúinn go léir. Fiú nuair a thug sí aghaidh ar dhiagnóis dholeigheasta, bhí Laura tiomanta don vacsaín HPV a chur chun cinn lena chinntiú nach mbeadh ar theaghlaigh eile dul trí dhéine na cóireála ailse agus an chúraim deireadh saoil mar a rinne sise.
“Is ómós cuí é clár Vacsaín HPV Laura Brennan do na hiarrachtaí gan staonadh a rinne Laura chun spreagadh a thabhairt do dhaoine óga an vacsaín seo a ghlacadh. Sábhálann vacsaíní beatha daoine agus, trí scagthástáíl agus vacsaíniú, táimid ag obair chun deireadh a chur le hailse cheirbheacs in Éirinn – ní féidir liom smaoineamh ar bhealach níos fearr chun cuimhneamh ar Laura ná an sprioc seo a bhaint amach tríd an gclár atá ainmnithe ina diaidh."
Dúirt Bernie Brennan:
“Bheadh 30ú breithlá Laura ann i Meán Fómhair seo a d'imigh tharainn. Don té atá ag maireachtáil le hailse, agus ansin an saol tar éis ailse nuair a bhásann duine, caillimid amach ar cheiliúradh ar ócáidí tábhachtacha lenár muintir. Is mór an sólás é Clár Athdheise HPV a fheiceáil i gcuimhne Laura agus is léiriú é ar thiomantas Laura glacadh leis an vacsaín HPV a mhéadú. Molaim do gach tuismitheoir vacsaíniú HPV a phlé lena leanaí agus spreagadh a thabhairt dóibh é a ghlacadh – coscann vacsaíní ailse. Is fearr cosc ná leigheas agus is fearr go cinnte cosc ná gan aon leigheas.”
Dúirt Larry Brennan:
“Tá sé go hálainn an clár HPV Athdheise a fheiceáil ainmnithe i ndiaidh Laura. Tá sé chomh tábhachtach go mbeidh an vacsaín seo ar fáil saor in aisce agus go mbeidh rochtain éasca air dóibh siúd a chaill amach air ar scoil, tá súil agam go méadóidh an méid seo an glacadh ar fud na tíre. Mholfainn d'aon duine a bhfuil aon cheist acu faoi vacsaíní HPV do chuid faisnéise a fháil ó fhoinsí iontaofa amhail FSS agus WHO. Cosnóidh glacadh níos mó leis an vacsaín HPV mná agus ní bhfaighidh siad ailse cheirbheacs."
CRÍOCH