Preasráitis
Tacaíochtaí ar fáil do shealbhóirí tí atá buailte ag drochthuilte i Loch Garman
Foilsithe
An t-eolas is déanaí
Foilsithe
An t-eolas is déanaí
Tá sé ráite ag an Aire Coimirce Sóisialaí, Heather Humphreys TD, go dtacóidh a Roinn le sealbhóirí tí atá buailte ag na tuilte tromchúiseacha i Loch Garman.
Tá oifigigh ó Sheirbhís Leasa Pobail na Roinne i dteagmháil le Comhairle Contae Loch Garman agus le gníomhaireachtaí eile mar fhreagra ar na tuilte le déanaí.
Dúirt an tAire Humphreys go gcinntíonn an freagra idirghníomhaireachta go gcuirfear tacaíochtaí ar fáil dóibh siúd atá buailte chomh tapa agus is féidir.
Tá an scéim Cúnaimh Dhaonnúil sa Roinn Coimirce Sóisialaí curtha i ngníomh. Cuireann an scéim cúnamh airgeadais ar fáil do shealbhóirí tí a bhfuil tionchar ag na tuilte orthu i dtreo giuirléidí pearsanta riachtanacha nó earraí agus fearais tí riachtanacha a athsholáthar.
De réir mar a thosaíonn an oibríocht glantacháin, cuirfear tacaíochtaí airgeadais ar fáil do na sealbhóirí tí atá i gceist.
Is féidir le sealbhóirí tí ar gá dóibh fiosrúcháin a dhéanamh faoi na tacaíochtaí atá ar fáil dóibh teagmháil a dhéanamh leis an roinn ag 0818 60 70 80 nó ríomhphost a sheoladh chuig cwswexford@welfare.ie
Dúirt an tAire Humphreys:
"Tá oifigigh i mo roinn ag obair le gníomhaireachtaí áitiúla i Loch Garman chun cabhrú leis na daoine sin a raibh tionchar ag na tuilte tromchúiseacha ar a dtithe.
"Tá an Scéim Cúnaimh Dhaonnúil curtha i ngníomh agus is féidir le haon teaghlaigh agus daoine aonair a bhfuil cúnamh de dhíth orthu teagmháil a dhéanamh lenár bhfoirne Seirbhíse Leasa Pobail chun cabhrú le tacaíocht airgeadais."
Is í an Roinn Tithíochta, Rialtais Áitiúil agus Oidhreachta an phríomhroinn maidir le héigeandálaí drochaimsire agus tá oifig na nOibreacha Poiblí (OPW) freagrach as gníomhaíochtaí faoisimh tuilte caipitil. Tá ról tábhachtach ag an Roinn Coimirce Sóisialaí, áfach, chun cabhrú le teaghlaigh díreach i ndiaidh imeachtaí drochaimsire amhail tuilte faoin scéim cúnaimh dhaonnúil.
Is é cuspóir na scéime cúnaimh dhaonnúil cruatan a chosc trí thacaíocht airgeadais a ndéantar tástáil ioncaim orthu a chur ar fáil do dhaoine a ndéantar damáiste dá dtithe ó thuilte agus ó imeachtaí drochaimsire agus nach bhfuil in ann freastal ar chostais do riachtanais riachtanacha, earraí tí agus i gcásanna áirithe deisiú struchtúrach. Ní chuimsíonn sé caillteanais atá clúdaithe cheana féin ag polasaí árachais, nó caillteanas nó damáiste do chóiríocht phríobháideach ar cíos nó cóiríocht údaráis áitiúil.
Tar éis droch-imeacht aimsire, déanann baill foirne i Seirbhís Leasa Pobail na Roinne monatóireacht ar an scéal ar an talamh agus téann siad i dteagmháil leis na húdaráis áitiúla ábhartha agus le gníomhaireachtaí eile chun a chinntiú go gcuirtear tacaíochtaí ar fáil dóibh siúd atá buailte chomh tapa agus is féidir.
Eisítear íocaíochtaí tacaíochta ioncaim éigeandála chun nithe riachtanacha ar nós bia, éadaí agus earraí pearsanta a chlúdach go tapa díreach i ndiaidh na hócáide. D'fhéadfadh go dtógfadh tacaíochtaí airgeadais i dtreo earraí bána, earraí bunúsacha troscáin agus earraí riachtanacha tí eile a athsholáthar níos faide mar mbeidh méid iomlán an damáiste do thithe ar eolas go dtí go maolaíonn an t-uisce tuile agus go dtriomóidh tithe amach.
Clúdaíonn an tacaíocht airgeadais níos fadtéarmaí oibreacha feabhais riachtanacha agus is féidir plástráil, líneáil thirim, ath-leagan urlár, ath-sreangú leictreach agus péinteáil a áireamh. D'fhéadfadh sé roinnt míonna a thógáil sula gcríochnófar an chéim seo den fhreagra agus go n-eiseofar íocaíochtaí deiridh.