Ó An Roinn Talmhaíochta, Bia agus Mara
Foilsithe
An t-eolas is déanaí
Chríochnaigh an tAire Martin Heydon, TD, an tAire Stáit a bhfuil freagracht ar leith aige as Margaí Nua a Fhorbairt ag an Roinn Talmhaíochta, Bia agus Mara, céim Vítneam inniu de Mhisean Trádála Agraibhia na hÉireann go dtí an tSeapáin, Singeapór agus Vítneam.
Chuir an misean trádála le scothcháil na hÉireann as táirgí bia, acmhainn teicneolaíochta talmhaíochta agus córais bhia inbhuanaithe le príomhpháirtithe leasmhara sa tSeapáin, i Singeapór agus i Vítneam agus i réigiún níos fairsinge na hÁise Thoir Theas. I measc na n-éachtaí suntasacha, tá forbairt bhreise a dhéanamh ar an bpríomhchaidreamh polaitiúil agus tráchtála idir Éirinn agus an tSeapáin, Singeapór agus Vítneam, a chuireann ár straitéis Fís don Bhia 2030 chun cinn agus páirt a ghlacadh i bplé ar theacht ar an margadh a fheabhsú.
Chas an tAire Heydon, i gceann den phríomh-idirchaidreamh, le hAire Aireacht Talmhaíochta agus Forbartha Tuaithe Vítneam, Minh Hoan, áit ar fógraíodh go gcuirfidh Vítneam foireann cigireachta go hÉirinn faoi dheireadh na bliana chun iarratas ar theacht ar mhairteoil a thabhairt chun cinn.
Agus fáilte á cur aige roimh an ngealltanas, dúirt an tAire Heydon:
Thug mé roinnt saincheisteanna tábhachtacha maidir le teacht ar an margadh chun solais i mo chruinniú leis an Aire. D’aontaigh an tAire lenár n-iarratas ar theacht ar mhairteoil a thabhairt chun cinn go dtí an chéad chéim eile, cuairt iniúchta roimh dheireadh na bliana.
Dúirt an tAire Heydon,
Shainaithin mo Roinn Vítneam mar thosaíocht maidir le teacht ar mhargadh nua. Is ionann an chuairt chigireachta seo agus dul chun cinn mór i dtreo teacht a bheith ag Vítneam ar mhairteoil na hÉireann. D’aontaíomar freisin lenár Meabhrán Tuisceana reatha a athnuachan, a chuirfidh lenár gcomhar i roinnt limistéir chomhspéise, go háirithe i limistéar na talmhaíochta inbhuanaithe.
Mar chuid den Mhisean Trádála, d’oscail an tAire Heydon comhdháil teicneolaíochta talmhaíochta freisin i Hanáí a d’eagraigh Fiontraíocht Éireann, ina raibh cuideachtaí bunaithe teicneolaíochta talmhaíochta Éireannacha agus a gcontrapháirteanna i Vítneam bainteach.
Ag labhairt dó maidir le teacht ar mhargadh Vítneam, dúirt Kevin Ryan, Stiúrthóir ASEAN ar Fhiontraíocht Éireann,
Tugadh chun solais inár gcomhdháil i Hanáí an toilteanas agus an uaillmhian mhór atá ag na húdaráis i Vítneam chun glacadh le teicneolaíochtaí Éireannacha. Aithnítear Éire go fairsing i ngeall ar a hagraibhia ardchaighdeáin agus inrianaithe, agus aithnítear chomh maith céanna acmhainn teicneolaíochta cuideachtaí Éireannacha a oibríonn san earnáil teicneolaíochta talmhaíochta anseo san Áise Thoir Theas. Chualamar príomhchuideachtaí teicneolaíochta talmhaíochta Éireannacha, cosúil le Abbey Machinery, Combilift agus Keenans, ag caint inniu. Ghlac Celtic Sea Minerals páirt freisin, agus an bealach á stiúradh acu i dtaobh cothú ainmhithe. Tá bunú á dhéanamh ag na cuideachtaí seo sa réigiún seo cheana féin.
Tá ceann de na misin trádála is cuimsithí agus is fairsinge faoinar thug Éire le blianta beaga anuas tagtha chun críche anois. Chuir toscaireacht na hÉireann leis an gcáil atá ar agraibhia na hÉireann sa tSeapáin, i Singeapór agus i Vítneam i gcaitheamh an mhisin 10 lá agus rinne siad an cháil sin a chur chun cinn. Chinntigh an comhoibriú rathúil a baineadh amach leis an misean trádála idir an Roinn Talmhaíochta, Bia agus Mara, an Bord Bia, Fiontraíocht Éireann agus Córais Bhia Inbhuanaithe Éireann gur forbraíodh príomhchaidreamh rialtais agus tráchtála, gur fairsingíodh an teacht ar an margadh atá ag táirgí Éireannacha agus gur taispeánadh táirgí ardchaighdeáin agraibhia Éireannacha do lucht féachana nua.
Mar fhocal scoir, dúirt an tAire Heydon:
Áiteanna margaí an-tábhachtacha iad an tSeapáin agus an Áise Thoir Theas agus chinntigh iarrachtaí Fhoireann na hÉireann i rith an mhisin trádála go leanfaidh an rath a bheith ar naisc agus comhpháirtíochtaí trádála na hÉireann leis an réigiún sna blianta amach anseo.
Nótaí d’Eagarthóirí:
D’aontaigh Vítneam le Comhaontú Trádála leis an AE a tháinig i bhfeidhm in Eanáir 2020. Eascróidh laghduithe suntasacha ar tháillí talmhaíochta ar easpórtálacha agraibhia Ballstát as seo.
Geilleagar sóisialach meánioncaim níos ísle in Oirthear na hÁise atá i Vítneam ina bhfuil breis agus 100 milliún duine ina bhfuil infheistíocht mhear á déanamh agus borradh mear ag teacht ar tháirgiúlacht. Tá lucht saothair óg léannta ann.