Foilsiú Táscairí Oideachais d'Éirinn 2023 fógartha ag an Aire Foley agus ag an Aire Harris

D'fhógair an tAire Oideachais Norma Foley TD agus an tAire Breisoideachais agus Ardoideachais, Taighde, Nuálaíochta agus Eolaíochta Simon Harris inniu [1 Aibreáin 2024] foilsiú Táscairí Oideachais d'Éirinn 2023 – tuarascáil ina gcuirtear sraith chuimsitheach táscairí oideachais i láthair don chóras oideachais in Éirinn.

Clúdaíonn an tuarascáil seo gach leibhéal oideachais ag tosú leis na luathbhlianta agus ag obair trí oideachas scoile, breisoideachas agus ardoideachas agus tríd an bhfoghlaim ar feadh an tsaoil. Agus é sin á dhéanamh, tugtar léargas sa tuarascáil ar obair na Roinne Oideachais agus na Roinne Breisoideachais agus Ardoideachais, Taighde, Nuálaíochta agus Eolaíochta araon.

Soláthraíonn an tuarascáil nuashonraithe seo sonraí suas go dtí an scoilbhliain/an bhliain acadúil 2022-2023 agus an bhliain sin san áireamh nuair is féidir, chomh maith le súil siar ar an gcaoi a ndeachaigh ár gcóras oideachais chun cinn thar na cúig bliana 2018-2022.

Tugann an t-eagrán seo roinnt léargas ar an gcóras oideachais bunscoile agus iar-bhunscoile, lena n-áirítear:

Tá méadú os cionn 8,258 tagtha ar líon iomlán na múinteoirí ó 2018 i leith
Tá méadú os cionn 4,342 tagtha ar líon iomlán na gcúntóirí riachtanas speisialta (CRSanna)
Tá an cóimheas daltaí-múinteoirí tite ó 15.2 go 13.4 ó 2018, agus san iar-bhunscoil tá sé tite ó 12.7 go 12.5
Tháinig ardú ar chéatadán na ndaltaí a rinne an Idirbhliain idir 2021 agus 2022
Tá líon iomlán na scoláirí atá ag déanamh chlár na hArdteistiméireachta tagtha ar leibhéal seasta tar éis méadú mór a fheiceáil idir 2018 agus 2021
Tá méadú mór tagtha ar líon na ndaoine atá cláraithe ar phrintíseachtaí le blianta beaga anuas, méadú ó thart ar 15,000 in 2018 go dtí thart ar 26,000 in 2022.
Tá gnóthachtáil oideachais fhoriomlán an daonra ag ardú go seasta le himeacht ama, agus tá rátaí dífhostaíochta fós níos ísle go seasta dóibh siúd a bhfuil leibhéal níos airde oideachais acu
D'ardaigh líon na rolluithe taighde iarchéime go 12,025 in 2022, agus ba mhic léinn phD lánaimseartha a bhformhór

I measc na n-ábhar a chlúdaítear sa tuarascáil tá:

Cineálacha scoile
Conairí na hArdteistiméireachta
Oideachas speisialta
Rochtain ar an ardoideachas
Líon na gcéimithe
Rolluithe breisoideachais agus oiliúna.

Is í seo an t-aon tuarascáil ina gcuirtear sonraí ó gach cearn den earnáil oideachais agus oiliúna i láthair le chéile. Agus é sin á dhéanamh, tugtar léargas sa tuarascáil ar an gcóras oideachais ar fad ag pointe ama amháin agus léiríonn sí an dul chun cinn atá déanta againn le cúig bliana anuas.

Maidir le hoideachas bunscoile agus iar-bhunscoile, áirítear sna torthaí ar tarraingíodh aird orthu sa tuarascáil méadú ar líon foriomlán na múinteoirí; titim ar chóimheas na múinteoirí daltaí ag leibhéal na bunscoile agus na hiar-bhunscoile araon; méadú ar líon na gcúntóirí riachtanas speisialta agus méadú ar líon iomlán na scoláirí atá ag déanamh chlár na hArdteistiméireachta.

I réimse an bhreisoideachais agus na hoiliúna agus an ardoideachais, léiríonn na torthaí ar tarraingíodh aird orthu fás ar líon na mac léinn a bhaineann leas as deiseanna cianfhoghlama; méadú ar líon na bprintíseach; leathnú ar dheiseanna printíseachta agus méadú ar rannpháirtíocht i gcláir Skillnet Ireland.

Dúirt an tAire Foley:

"Fáiltím roimh fhoilsiú thuarascáil an lae inniu a thugann léargas dúinn ar an gcóras oideachais ina iomláine agus is uirlis luachmhar í chun polasaí amach anseo a chur le chéile.

"Is ábhar misnigh a fheiceáil go bhfuil roinnt príomhtháscairí ag dul i dtreo dearfach i gcónaí, go háirithe an feabhas suntasach atá feicthe againn ar chóimheas na ndaltaí múinteoirí sa bhunscoil agus san iar-bhunscoil agus an méadú suntasach ar Chúntóirí Riachtanas Speisialta agus méadú ar líon na scoláirí a úsáideann seirbhísí iompair scoile ar fud na tíre. Leanfaimid orainn ag obair chun aghaidh a thabhairt ar na príomhréimsí seo agus cinnteoimid go bhfuil dul chun cinn á dhéanamh ar fud na hearnála oideachais."

Dúirt an tAire Harris:

"Léirítear sa tuarascáil seo leathnú ár dtairiscintí oideachais agus oiliúna ar fud na hÉireann.

"Trí na conairí oideachais atá ar fáil a leathnú, táimid ag ligean d'fhoghlaimeoirí dul i ngleic lena dturas oideachais agus oiliúna agus leanúint ar aghaidh leis ar bhealach a oibríonn dóibh, ag aon chéim den saol.

"Léiríonn an fás atá tagtha ar an gcianfhoghlaim san ardoideachas agus an méadú atá tagtha ar líon na bprintíseachtaí go bhfuil foghlaimeoirí réidh le leas a bhaint as réimse deiseanna chun a gcáilíocht a bhaint amach."

Tá an tuarascáil iomlán ar fáil ar líne anseo .

Torthaí

Oideachas Bunscoile agus Iar-bhunscoile

Tá ardú de bhreis agus 8,258 tagtha ar líon iomlán na múinteoirí ó 2018 i leith, ó 65,815 go 74,073. Tá an cóimheas idir daltaí agus múinteoirí tite ó 15.2 go 13.4 ó 2018, agus san iar-bhunscoil tá sé tite ó 12.7 go 12.5;
Mhéadaigh líon na gcúntóirí riachtanas speisialta (CRSanna) ó 14,877 in 2018 go 19,219 in 2022;
Tá céatadán na ndaltaí atá ag déanamh na hIdirbhliana ardaithe ó 72.3 faoin gcéad de dhaltaí in 2018 go 79.2 faoin gcéad in 2022;
Tháinig méadú ar líon iomlán na ndaltaí a rinne clár na hArdteistiméireachta (sa 5ú agus sa 6ú bliain araon) ó bheagán faoi bhun 84,000 in 2018 go dtí os cionn 91,000 in 2021 sular thit sé go dtí thart ar 85,000 in 2022;
B'ionann an ráta coinneála go dtí an Ardteistiméireacht i scoileanna DEIS agus 85.0% don chohórt iontrála in 2016, méadú beag ó chohórt 2012, sin 84.7%. Dúnadh an bhearna choinneála idir scoileanna DEIS agus scoileanna neamh-DEIS thar an tréimhse ó 8.7% in 2018, go 8.4% in 2022.
Mhéadaigh líon na scoláirí san iar-bhunoideachas príomhshrutha a úsáideann iompar scoile ó 65,499 go 71,095 idir 2018 agus 2022, agus mhéadaigh líon na scoláirí le riachtanais speisialta oideachais a úsáideann iompar scoile ó 12,751 go 16,401 san am seo.

Breisoideachas agus Oiliúint agus Ardoideachas

Tháinig méadú ar líon na scoláirí a bhain leas as deiseanna cianfhoghlama san ardoideachas go dtí os cionn 15,000 in 2022, méadú ó 10,933 sa bhliain díreach roimh COVID-19 (2019);
Mhéadaigh líon na bprintíseach ó 24,212 in 2021 go 26,325 faoi dheireadh 2022. Cé gurb ionann printíseachtaí ceardaíochta agus formhór na gclárúchán i gcónaí, is ionann printíseachtaí eile agus thart ar 15% de líon na bprintíseachtaí mar gheall ar dheiseanna printíseachta a leathnú;
Sháraigh rannpháirtithe i gcláir Skillnet Ireland 89,000 den chéad uair, lena n-áirítear thart ar 3,400 duine dífhostaithe;
Lean líon iomlán na dtaighdeoirí iarchéime ar aghaidh ina threocht maidir le fás seasta, ag ardú ó 10,065 in 2018 go 12,025 in 2022.